پۆلیتبۆرۆیا پارتییا دیموکراتا کوردستانێ ب هەلکەفتا ۸۰یەمین سالڤەگەرا دامەزراندنا پارتییا خوە داخویانیەک بەلاڤکر. د داخویانییێ دا، تەڤی تەئکیدکرنا ل سەر پاراستنا دەستکەفتێن دەستووری یێن هەرێمێ و دوورئێخستنا وێ ژ ئالۆزی و شەڕێن هەرێمی، تەئکید ل سەر ئەکتیڤکرنا پەڕلەمانتۆیێ، پێکئینانا کابینەیا دەهەم، بهێزکرنا یەکرێزییا نیشتمانی و دەستپێشخەرییا ژ بۆ هەڤکارییکرنا ب هەموو ئالیێن عێراقی را هاتە کرن.
پۆلیتبۆرۆیا پارتییێ رۆژا ١٦ێ تەباخا ۲۰۲٦ێ، د داخویانیەکێ دا ب هەلکەفتا بیرئینانا ١٦ێ تەباخێ (۸۰ سالییا دامەزراندنا پەدەکێ) ڕاگەهاند، ئەڤ بیرئینان قۆناغەکا دیرۆکی یا تەڤگەرا ڕزگاریخواز یا گەلێ کوردستانێ و نیشانەیا کاروانەکێ بێوەستان یێ تێکۆشینێ یە ل سەر ڕێبازا بارزانییێ نەمر».
د داخویانییێ دا هاتە دیارکرن کو خەباتا پەدەکێ د شۆرەشێن ئیلۆن و گوڵانێ دا، پەیمانا ۱۱ێ ئادارێ و ڕاپەرینا سالا ۱۹۹۱ێ، دەلیلێن وێ یەکێ نە کو پەدەکێ هەڕ دەم هێزەکا پێشەنگ و پشتیڤانەکا گەل و هەموو پێکهاتەیێن نەتەوەیی و ئۆلی بوویە، و زمانێ دیالوگێ ژ بۆ بدەستخستنا ئارمانجان وەک بنگەهـ گرتییە.
دەقێ داخویانییا پۆلیتبۆرۆیا پەدەکێ
داخویانییا پۆلیتبۆرۆیا پەدەکێ ب بۆنیا ١٦ێ تەباخێ، ۸۰یەمین سالڤەگەرا دامەزراندنا پارتییا دیموکراتا کوردستانێ
جەماوەرێ خوەڕاگر، مالباتێن سەربلندێن شەهیدان و پێشمەرگەیێن قەهرەمان،
ئیرۆ ب شانازی ڤە ئەم سالڤەگەرا دامەزراندنا پارتییا خوە پیرۆز دکەین؛ ئەو پارتییا کو پارێزڤانەکا ڕاستین یا بەرژەوەندیێن گەلێ مە یە. ئەڤ بیرئینان قۆناغەکا پر گرنگ یا خەباتا دیرۆکی یا تەڤگەرا ڕزگاریخواز یا کوردستانێ و کاروانەکێ بێوەستان یێ تێکۆشینا سیاسی یە ژ بۆ پاراستنا مافێن نەتەوەیی و نیشتمانی و بنگەهێن دیموکرسیێ. هەڕ وەها بیرئینانا خەباتەکا هەشتێ سالی یا وەرچەرخان، قوربانییدان، ئەزموون و کانییا سروشتی یا نڕخێن ئازادی و دیموکرسیێ یە.
ئەڤ بۆنەیە نە تەنی بیرئینانەکا ئاسایی یا دامەزراندنا پارتییەکا سیاسی یە، بەلکی بەرجەستەکرنا ئیرادەیا ئازادیخوازانە یە ژ بۆ ڕەتکرنا پیلانێن دژمنان و زلم و زۆرداریێ ل سەر ڕێبازا حەکیمانە یا «بارزانییێ نەمر»، یێ کو وێ دەمێ زەمینەکا سەردەمیانە ژ بۆ تێگەها کوردیاتیێ دارشت و ب پەیرەوکرنا نڕخێن شۆرەشگەری، تەڤگەرا ڕزگاریخواز یا کوردستانێ پێش ئێخست.
خەباتا پرئالی یا پارتییا مە د شۆرەشێن ئیلۆن و گوڵانێ دا، رێکەفتنا ۱۱ێ ئادارێ و ڕاپەرینا ۱۹۹۱ێ، شاهیدێ وێ یەکێ نە کو پەدەکێ هێزەکا پێشەنگ و پشتیڤانەکا جەماوەر و هەموو پێکهاتەیێن نەتەوەیی و ئۆلی یە، و هەڕ دەم ب کلتوورێ دیالوگێ هەوڵ دایە ئارمانجێن نەتەوەیی ب دەست بێخت.
د سالڤەگەرا هەشتێ سالییا دامەزراندنا پارتییا مە دا، ئەم تەئکید دکەین کو وەفادارییا ژ بۆ دیرۆکا پەدەکێ و قوربانییدانا تێکۆشەرێن وێ نە تەنی بیرئینانە، بەلکی ئەزموونا وێ رابردوو و وێ دیرۆکێ، بەرپرسیارییەکا نەتەوەیی و نیشتمانی یە ل هەمبەر ئیرۆ و پاشەرۆژێ ب ڕێیا پاراستنا دەستکەفتێن مە و دوورئێخستنا هەرێما کوردستانێ ژ وان ئالۆزی، گرژی، شەڕ و پەڤچوونێن سیاسی یێن ل دەوردۆرا مە. هەڕ وەها پاراستنا کوردستانێ و ڕێگرتن ل وێ یەکێ کو ببە جیهێ کاریگەریێ ل سەر ئەولەهییا جیرانێن مە و ڕێزگرتنا دوئالی یا بەرژەوەندییان؛ ب هێزکرنا پێگەها دەستووری یا هەرێمێ و ئەکتیڤکرنا پەڕلەمانتۆیێ وەک ئەرکەکێ دیرۆکی، پێکئینانا کابینەیا دەهەم و حکوومەتەکا ب هێز، ب هێزکرنا یەکرێزیێ، ڕێزگرتنا ل زۆرییا پێکهاتەیان و خورتکرنا ئارامی و ئاشتیێ ل هەرێمێ.
گەلێ خوەڕاگر و بێهنفرەهـ یێ هەرێما کوردستانێ د ڤان سالێن بوری دا ئیسبات کریە کو حەزکرنا وەلات و گەلێ وان د سەر هەڕ تشتەکێ را یە؛ لەوما ئەم وەک ئەرکێ خوە دبینین کو ب هەموو شیانا خوە کار ژ بۆ چارەسەرکرنا ئاریشە و پەردگرێکان ب کەین ب مەبەستا دابینکرنا ئەولەهی و پێدڤییێن ژیانەکا سەرفەرازانە.
د بیرئینانا ١٦ێ تەباخێ دا، ئەم دەستێ دۆستانی و هەڤکارییکرنێ درێژی هەموو ئالیێن سیاسی یێن بەشدار د پرۆسەیا سیاسی یا عێراقێ دا دکەین. ئەرکێ مە هەموویانە کو ب جوداهییا بیر و بۆچوونێن سیاسی، باوەریێن ئۆلی و مەزهەبی ڤە، ب هەڤ را هەوڵ بدەین کو عێراق ژ بۆ هەڕ کەسی بە و وێ ژ تێکەلبوونا ناڤ شەڕ و ئالۆزی و فتنەیێن هەرێمی دوور بێخن. دڤێت هەموو پێکهاتە ب هەڤ را و ب بەرپرسیاری، شێوازەکێ حکوومڕانی یێ ڕاست و سەردەمیانە بگرن بەر خوە؛ ئەڤ یەک د بەرژەوەندییا گەلێ عێراقێ دا یە. وەک کو مە ب ئاشکرایی گۆتی، عێراق ڕووبرووی گەلەک ئاریشان بوویە و نە ڕەوا یە کو ئێدی د ناڤ ڤێ خەلەکێ دا بزڤڕت، ژ بەر کو گەلێ عێراقێ ئێدی نکارن ل بەر وان هەموو نەخوەشی و هەژارییان خوەبگرن؛ ئەڤ یەک بەرپرسیارییەکا ئەخلاقی، نیشتمانی و ئۆلی یە.
ب ڤێ بۆنەیا دیرۆکی، ئەم قوربانییدانا تێکۆشەر، پێشمەرگە و شەهیدان بلند دنرخینین؛ وان کەسان ئێن کو گیانێ خوە د ڕێیا ماف، ئازادی و سەروەرییا نەتەوە، ئاخ و گەلێ مە دا فیدا کری. هەڕ وەها ئەم تێکۆشین و خوەڕاگرییا نڤش ب نڤش یا ل سەر ڕێیا پارتییاتیێ و ڕێبازا بارزانییێ نەمر بیر دئینین.
د ڤێ بیرئینانا ب نرخ دا، ئەم پەیمانا خوە ژ بۆ گەلێ کوردستانێ و سەرۆک (مەسعود بارزانی) نوو دکەین کو ئەم ێ ل سەر ڕێبازا ڕەسەن ئا کوردیاتیێ بەردەوام بین ژ بۆ پاراستنا قەوارەیا هەرێمێ و بهێزکرنا بنگەهێن دیموکرسی و پێکڤەژیانێ.
سلاڤ ژ بۆ دامەزرێنەر و ڕێبەرێ ڕێبازا کوردیاتیێ (مستەفا بارزانییێ نەمر) و (کاکە ئیدریسێ هەڕدم د بیرا مە دا) و هەموو شەهیدێن کوردستانێ.
سپاس و پێزانین ژ بۆ کادڕ، ئەندام و ئالیگرێن پارتییا مە؛ هەڕ وەها پیرۆزباهییێن هەرە گەرم ل پێشمەرگەیێن قەهرەمان و گەلێ خوەڕاگر یێ کوردستانێ دکەین.
سەرکەفتن ژ بۆ خەباتا ڕەوا یا گەلێ مە یە، هەڕ بلند و ل با بە ئالا کوردستانێ.
