ئیرۆ ب خەم و ئێشەکا کوور ڤە، بیرانینا دوانزدە سالیا تاوانا جینۆسایید و کۆمکوژیا وەلاتیێن مە یێن ئێزدی ب بیر تینین. د ڤێ بیرانینا ب ئێش دا، سەرێ رێز و حورمەتێ ل بەر گیانێ پاکێ شەهیدان دچەمینن و ب هەموو رێز و وەفاداریێ ڤە وان ب بیر تینین.
تاوانا جینۆساییدا ئێزدیان و دیلگرتنا کچ و ژینێن وان و وێرانکرنا مال و پەڕستگەهێن وان، برینەکا ڤەکری یا دل و دەروونا گەلێ کوردستانێ یە. مخابن وەلاتیێن مە یێن ئێزدی پشتی دوانزدە سالان ژی، هێ ژی باچا ناکوکیێن سیاسێ و ئامادەبوونا هێزێن چەکدار یێن نەیاسایی ددن.
د ڤێ بیرانینێ دا ئەم تەکەز دکن کو ئەڕکا حکومەتا ئیراقا فیدرالە کو ئەولەهی و ئاڤەدانیێ بۆ شنگالێ ڤەگەرینە، رێکەفتنا ئاساییکرنا رەوشا شنگالێ ب حکومەتا هەرێما کوردستانێ را جیبەجی بکە، کار بۆ پارێزگەهبوونا وێ بکە و هێزێن نەیاسایی هەرێمێ ب جه بهێلن دا کو کۆچبەر ڤەگەرن سەر جهو وارێن خوە.
ئەم وەلاتیێن خوە یێن ئێزدی پشتڕاست دکن هەتا کو رەڤاندیەک ژی مابە، تیما نڤیسینگەها مە دێ بەردەوام بە ل سەر کارێن خوە یێ ژ بۆ رزگارکرن و ئاشکەرەکرنا چارەنڤیسا وان. هەروەها ئەم بەردەوام دبن د هەولێن خوە یێن د قادا ناڤنەتەوەیی دا هەتا کو تاوانێن داعشێ ل سەر ئاستا جیهانێ ب تەمامی وەکو جینۆسایید بهێنە ناسکرن.
ئەم سپاس و رێزدارییا خوە یا کوور پێشکێشی خەلکێ مێڤانپەروەر یێ دهۆک و بەهدینانێ ب گشتی دکن کو د کێلیێن دژوار دا دەریێ مال و دبیستان و مزگەفتێن خوە ژ ئاوەرێن ئێزدی را ڤەکرن. هەروەها سپاس و رێزداری بۆ وان هەموو وەلاتیێن کو وێ تاوانێ وەکو جینۆسایید ناساندینە و ب هەر شێوەیەکی بە ئالیکاریا ئێزدیان کرینە.
سلاڤ ل بەرخوەدانا جڤاکا ئێزدی، سلاڤ ژ بۆ گیانێ پاک یێ شەهیدان و وان هەموو پێشمەرگەیێن قەهرەمان یێن کو د وان رۆژێن دژوار دا ب فەرماندارییا جەنابێ سەرۆک مەسعود بارزانی، ئەفسانەیا داعشێ تێکشکاندن و جانێ خوە ژ بۆ ئازادکرنا شنگالێ و پاراستنا رۆمەتا نیشتیمان بەخشین.
نێچیرڤان بارزانی
سەرۆکێ هەرێما کوردستانێ
2026.08.03
