ئۆجەلان “ئەم ھەموو ژ نەتەوەیا تركن” و ھەلوەستا ھندەكان
گه‌له‌ک جارا ده‌ما به‌هسا پەكەكێ تێ کرن پرانیا ڕه‌وشه‌نبیر و سیاسه‌تمه‌دار ئه‌ولێ دفکرن و پشتره دئاخێڤن، ژ به‌ر کو ئه‌ڤ جوره‌یێ مرۆڤان دیتنێن خوه یێن ژ دل نابێژن و ل گۆرا بایێ سیاسه‌تێ به‌هسا پەكەكێ دکن. ژ به‌ری هه‌ر تشته‌کی گه‌ره‌ک هه‌ر کورده‌ک كو ب سیاسه‌تێ ڤه موژله یان ژی ڕه‌وشه‌نبره‌ک، هوونه‌رمه‌نده‌ک یان ژی که‌سایه‌تیه‌ک نشتمانپه‌روه‌ر دڤێ د ده‌ربارێ پەكەكێ دا دیتنا خوه زه‌لال بکه و ل گۆرا ڤێ ژی د سیاسه‌تێ دا ته‌ڤبگه‌ره.
د ڤێ قۆناغێ دا پەكەكە ب هه‌لوه‌ستا خوه و کریارێن خوه د ڕێیا ده‌ستخستنا مافێن نه‌ته‌وی ده ئاسته‌نگه‌ك مەزنە. پەكەكە نه ته‌ڤگه‌ره‌ک کوردستانیه و چو نرخێن کوردستانی ناس ناکه. پەكەكە ئالا کوردستانێ قەبوول ناكە. پەكەكە ل دژێ ده‌وله‌تبوونا کوردستانێ یه. پەكەكە ل سه‌ر ده‌ستکه‌فتیێن سه‌دسالان یێن کوردستانێ گەڤا هه‌ری مه‌زنه. ئه‌ڤ یه‌ک ژ ده‌ستپێکێ هه‌تا وه‌ک ئیرۆ ژی بنگه‌هێ ئیدیۆلۆژیا پەكەكێ یه.
به‌رێ خوه بدەنێ سه‌رۆکێ پەكەكێ ئۆجەلان د ئاخاڤتنه‌کا خوه ده چ دبێژه:
“ئه‌ز تشته‌کی ژ ده‌وله‌تێ (مەرەم ژێ دەولەتا تركیێ یە) ناخوازم. نه پله‌یه‌کی نه ژی پۆسته‌کی دخوازم. ئه‌ز ته‌نێ دخوازم دەرفەتا خزمه‌تێ بدەن من. ئه‌زێ ڕوومه‌تا ترکیێ و ترسا وان پێشده ببم. ئه‌زێ ژ بۆ ترکیێ پالانا مه‌زن چێبکم، ئه‌زێ کارێن مه‌زن بکم، ئه‌گه‌ر ئه‌ز مله‌تێ کورد ده‌وله‌تێ ڤه گرێنه‌دم، ئامه‌رکا دخوازه ب ڕێیا بارزانی ده‌وله‌تا کوردا ئاڤا بکه. ئه‌گه‌ر ئه‌ڤ ببه پەیوەندیا ترکیێ ب ئاسیا ڕا قوت دبه. ئه‌ز نه کورده‌ک خالس و موخلسم، ئه‌ز ژ هه‌ر ترکه‌کی بێهتر خوه ترک دبینن، د پراتیکێ دا ئه‌ز ترکه‌ک باشم”.
ئۆجەلان د به‌رده‌وامیا ئاخاڤتنا خوه ده دبێژه: “ماموستایێ من یێ ده‌رسا قورئانێ ژ من را دگۆت: ” ئه‌گه‌ر تو هالێ هه‌ری تو دبی ئه‌ولیایه‌ک” هون باندۆرا بارزانی و تالابانی بچووک نه‌بینن. د ڕاستیێ دا هێزێن خۆرت ل پشتا وان هه‌نه. ئه‌و جومهوریه‌تا تركیێ دفرۆشن باوه‌ریێ ب وان نه‌ینن. ئه‌م به‌ر ب سه‌نته‌زه‌ک هێژا یا جومهوریه‌تێ ڤه دچن. هونێ ئه‌نجاما ڤێ یه‌کێ د ده‌مه‌ک نێزیك دا ببینن. زمانێ ترکی ژ به‌رێ پتر تێ ئاخاڤتن. بالا خوه بدەنێ ل هاککاری ترکیا ستانبولێ گه‌ره‌ک ژ به‌رێ به‌هتر بێ فێرکرن. ئه‌ز نه‌بووما ، دێ قه‌ومیا کوردی پێشڤه‌تر بکه‌تا. به‌رێ من دگۆت تركیێبوون لێ نها ئه‌ز دبێژم نه‌ته‌وه‌یێ ترک. ئه‌م ژ نه‌ته‌وه‌یێ ترکن.”
ڕێبه‌رێ پەكەكێ ئۆجەلان گه‌له‌ک ئاخاڤتنێن ب ڤی ئاوایی کرنه و ئۆجەلان ده‌ما هاتی گرتن ژی ل به‌ر چاڤێ دنیایێ هه‌موویێ ڕاستیا خوه یا کو خولامیا ده‌وله‌تا تركیێ بکه ئا‌شکه‌ره کریه. ئۆجەلان گه‌له‌ک ڤه‌کری ئیدیئۆلۆژیا پەكەكێ دده ئاشكەرا كرن. لێ پرسگرێکا مه‌زن ئه‌وه کو گەلەك ئاقلمه‌ندێن سیاسی، ڕه‌وشه‌نبیر و سیاسه‌تمه‌دار ڤێ یه‌که تێناگەهن. یان ژی ناخوازن تێبگەهن. ئه‌و نه ئه‌وقاس کێمئاقلن کو تێنه‌گەهن، لێ ناھێتە هه‌سابێ وان تێبگەهن. ژ به‌ر کو ئه‌و ژی ب ڤێ هه‌لوه‌ستا خوه دبن شریکێ دیتنێن ئۆجەلان و خزمه‌تێ ژ ڤان دیتنان ڕا دکن و د ڕاستیا خوه ده دبن خوولامێن خوولاما.
پەكەكە ئیرۆ دو تشتێن گه‌له‌ک خراب دکه:
یه‌ک: ژێ ئه‌وه کو هه‌ولدده هیڤیا کوردا، هیڤیا ده‌وله‌تبوونا کوردا ل باشوورێ کوردستانێ ژناڤ ببە. ژ بۆ ڤێ یه‌کێ ب هه‌موو هێزا خوه ل سه‌ر ئاخا باشوورێ کوردستانێ شه‌رێ پەدەکێ دکه. بێتفاقیێ تێخه د ناڤبه‌را ئالیێن کوردی ل باشوورێ کوردستانێ دا. ره‌وشا جڤاکی و ئه‌وله‌هیا کوردستانێ ئالۆز دکه. هه‌ول دده وه‌ک سیخووریا ئیرانێ و شیعه‌یێن ئیراقێ ستاتویا کوردستانێ تێک بده و جاردن کورد وه‌ک پارێزگەھان ب به‌غدایێ ڤه بێنه گرێدان. ئه‌گه‌ر د ڤێ دا ژی سه‌رنه‌که‌ڤه، هه‌ولدده سلێمانیێ ژ هه‌رێما کوردستانێ ڤه‌قه‌تینه و ب به‌غدایێ ڤه گره بده. ئیرۆ تشتا ل شنگالێ و مه‌خمور دکه ئه‌ڤه. ل شنگالێ بوویه به‌شه‌ک ژ حه‌شدا شەعبی و ڕێ دگره کو شنگال کوردستانێ ڤه بێ گرێدان. ئیران و ئیراق ژ بۆ جێبەجێنەكرنا ماده‌یا 140 ێ پەكەكێ ب کار تینن.
دو: هه‌لوه‌ستا پەكەكێ ل ڕۆژاڤایێ کوردستانێ دیارە. پەكەكە د سه‌ری دا وه‌ک چه‌کدارێن رژێما سوریێ ده‌ست ب كریارێن خوە كر و ب ڕێیا ئیران و ئیراقێ ل ڕۆژاڤایێ کوردستانێ ب جھ بوون. به‌شێ د بن ده‌ستێ سیاسه‌تا پەكەكێ دا، ئالا کوردستانێ قه‌ده‌خه‌یه، ناڤێ کوردستانێ نایێ ب کارئانین و هه‌موو نرخێن کوردستانی وندا کرنه. ب ده‌هان ئالیگر و به‌رپرسیارێن پارتیێن دن کرن زیندانان دا و ئێشاندن. ئاڤاهیێن وان شه‌وتاندن و مافێ ژیانێ ژ وان را نه‌هشتن.
ب هه‌ولدانێن ده‌ستهلاتیا باشوورێ کوردستانێ و ئەمریكایێ هیڤیه‌ک یا یه‌کرێزیا کوردا ل ڕۆژاڤایێ کوردستانێ ده‌رکه‌ت هۆلێ. هه‌ڤدیتن پێکهاتن گاڤێن باش هاتن ئاڤێتن. لێ پەكەكە هه‌موو هه‌ولدانا دکه کو ئه‌ڤ خەباتێن یه‌کرێزیێ نه‌چنه سه‌ری. ئه‌گه‌ر ئالیێن کوردێن ڕۆژاڤا ڤه خوە ژ پەكەكێ خلاس نەكن ئەو ناگەهن چو ئه‌نجامه‌کی. لێ ئەگەر یه‌کرێزیا کوردێن ڕۆژاڤا سه‌ربکه‌ڤه، ل کوردستانا ڕۆژاڤا ستاتویه‌ک یا کوردا پێکتێ و ئه‌ڤ یه‌ک دبه ده‌ستکه‌فتنه‌ک دیرۆکی ژ بۆ هه‌موو کوردستانێ.
هه‌ر کورده‌ک و تایبه‌تی سیاسه‌تمه‌دار ڤێ یه‌که دزانن و دبنن. ئه‌گه‌ر ھێشتا پشتگریا ڤی تاوانا پەكەكێ بکن ، دڤێ ئه‌و ژی د هه‌موو پلاتفۆرمان دا بھێنە ئا‌شکه‌ره کرن و ل همبه‌ر وان هه‌لوه‌سته‌ک بھێتە نیشاندان. ئێدی هه‌لوه‌ستا ل همبه‌ر پەكەكێ بوویه پیڤانه‌کا نشتمانپه‌روه‌ریێ. بوویه پیڤانا کورداتیێ.
نه حه‌وجه‌یه کا مرۆڤ پەكەكێ تازی بکه، ژ خوه ئۆجەلان و ڕێڤه‌به‌رێن قه‌ندیل پەكەكە ژ زووده تازی کریه. ڤێجا ئه‌گه‌ر ھێشتا مرۆڤ تێنه‌گهە، ئه‌ڤ ژی ژ سڤکاهیا ئاقلییه.
2021.01.10
نووچه/ئانالیز
