رۆژا دوشهمێ ١٨\٥\٢٠٢٦ێ نێچیرڤان بارزانی، سهرۆکێ ههرێما کوردستانێ، ژ ئالیێ قهداسهتا پاپا لیۆ یێ چاردههێ، پاپایێ ڤاتیکانێ ڤه هاته پێشوازیکرن و پشتره د جڤینەکێ دا، سهرۆک نێچیرڤان بارزانی بەحسێ ڕهوشا پێکهاتهیان ل ئیراقێ و ههرێما کوردستانێ کر و تهکهز کر کو کریستیان و ههموو پێکهاتهیێن ئۆلی و نهتهوهیی، بهشهک ڕهسهنن ژ دیرۆک، کولتوور و ناسنامهیا نیشتمانی یا ههرێما کوردستانێ و ب ههڤ را پاشهرۆژا وهلات ئاڤا دکن.
سهرۆک نێچیرڤان بارزانی پێزانینا کوور یا ههرێما کوردستانێ ژ بۆ ڕۆلا ههرتمی و دیرۆکی یا ڤاتیکانێ یا پێشڤهبرنا دیالۆگێ و بههڤراژیانێ ل جیهانێ دیار کر، ههر وها تهڤی بلندنرخاندنا بیرانینا سهرهدانا دیرۆکی یا پاپایێ کۆچکری پاپا فرانسیس، داخوازنامهیهکه فهرمی پێشکێشی قهداسهتا پاپا لیۆ یێ چاردههێ کر کو سهرداناکرنا ههرێما کوردستانێ بکە.
ژ ئالیێ خوه ڤه، قهداسهتا پاپا شابوونا خوه یا ژ بۆ ڤێ دیتنێ دیار کر و پهسنێ کولتوورێ لێبۆرینێ، بههڤرهژیان و قهبوولکرنا ههڤدو ل ههرێما کوردستانێ کر. ههر وها ڕۆلا ههرێما کوردستانێ یا ڤهحهواندن و پاراستن و مسۆگهرکرنا ژیانهکا ئارام ژ لێقهومی و کریستیانان را د قۆناخێن گران و دژوار دا، بلند نرخاند.
د چارچۆڤهیا سهرهدانا خوه یا فهرمی یا بو بۆ ڤاتیکانێ (رۆژا دوشهمێ ١٨\٥\٢٠٢٦ێ) نێچیرڤان بارزانی، سهرۆکێ ههرێما کوردستانێ، دگەل کاردینال پیێترۆ پارۆلین، سهرۆکوهزیرێ ڤاتیکانێ جڤییا.
د جڤینێ دا، پێشڤهبرنا پهیوهندیێن ههرێما کوردستانێ دگەل ڤاتیکانێ، ڕهوشا سیاسی و ئهولههی یا ئیراقێ و ڕهوشا پێکهاتهیێن ئۆلی و نهتهوهیی هاتن گۆتووبێژکرن. ههردو ئالیان تهکهزی ل سهر گرنگیا بهردهوامیا دیالۆگێ و کوورکرنا بهایێن بههڤراژیانێ و لێبۆرینێ ل ناڤچهیێ کرن.
سهرۆک نێچیرڤان بارزانی ب ناڤێ ههرێما کوردستانێ سپاسییا پشتگریا بهردهوام یا ڤاتیکانێ یا ژ بۆ پێشڤهبرنا ئاشتی و ئارامیا وهلات دوباره کر. ژ ئالیێ خوه ڤه، سهرۆکوهزیرێ ڤاتیکانێ پهسنێ پێگهها ههرێما کوردستانێ کر وهکی نموونهیهکا زندی و سهرکهفتی یا بههڤرهژیانا ئاشتیانه یا ئۆل و پێکهاتهیێن جودا یێن ل ناڤچهیێ.
نێچیرڤان بارزانی، سهرۆکێ ههرێما کوردستانێ، ل ڕۆمایێ (رۆژا دوشهمێ ١٨\٥\٢٠٢٦ێ) دگەل گویدۆ کرۆسێتۆ،، وهزیرێ بەرەڤانییێ یێ ئیتالیایێ جڤییا
د جڤینێ دا، پێشڤهبرنا پهیوهندیێن ههرێما کوردستانێ یێن ب ئیتالیایێ را د وارێ لهشکهری و ئهولههیێ دا و هاریکاریا ههڤبهش ژ بۆ پێشیگرتنا ل مهترسیێن تهرۆرێ هاتن گۆتووبێژکرن.
سهرۆک نێچیرڤان بارزانی ل سەر ناڤێ ههرێما کوردستانێ سپاسییا ڕۆلا گرنگ یا ئیتالیایێ یا د چارچۆڤهیا ههڤپهیمانیا ناڤدهولهتی دا دوباره کر، ب تایبهتی ژ بۆ پێشکێشکرنا شێور، مهشق و ڕاهێنانان ژ هێزێن پێشمهرگهیان را.
