دهولهت و مهههپە و باخچهلی نەهاتینه گوهرین یێن کو هاتینە گوهرین ئۆجالان و پەکەکە نە
ڕۆژا كو، باخچهلی بەحسێ پرۆسهیا “توركییا بێ ترۆر” كری ههتا نها گوهرینێن كو چێدبن، دیار دكهن كو، دهوڵهت، مهههپە و باخچهلی نەهاتینه گوهرین و دهست ژ دیتن و بیرۆكێن خوە یێن د دهربارێ كوردان و تهڤگهرا كوردی دا بهرنەداینه. گهلهك ڤهكری و ب ئاوایهكێ زهڵال دیار بوو كو، پەکەکە و سهرۆكێ پەکەکێ ئۆجەلان هاتنه گوهرین و ژ ڕۆژا ئۆجەلان ب ڕێكا شاندەیا دهم پارتییێ بهرسڤا باخچهلی دایی ههتا نها ڕۆژ ب ڕۆژ پێنگاڤ ب پێنگاڤ بهر ب سیاسیهتا دهوڵهتێ و یا باخچهلی ڤه دچت.
بێ گومان ئهڤ یهكه د بنگەهێ خوە دا نه گوهرینهكه، لێ ئاشكهرابوونا ئهركێ ئۆجەلان و سیاسیهتا پەکەکێ یا ب دههان ساڵان یا ژناڤبرنا كوردان و داخوازا مافێن وان ئێن ڕهوا نه.
بهری چهندهكێ، وێنهیێن باخچهلی و ئاڵایێن مهههپێ ل سهر دیوارێن کەلا دێرین و دیرۆکی یا دیاربهكرێ هاتنه هلاویستن. وێ ڕۆژێ کەلا دیاربهكرێ ئهو دیوارێن سەمبۆلا بهرخۆدانا شێخ سهعید و ئهو شوورێن بووینه شاهێدێن خوینا ههزاران شههیدان سهرێ خوە چهماندبوون. ئهڤرۆ ژی ئاڵایێن مهههپێ ل پرا بسملێ ڤە ههڵواسین. ڤێجا مرۆڤ چو بێژت ڤاڵایه.
د مەدیایا جڤاكی دا بهلگهیهك هاته بهلاڤكرن. د ڤێ بهڵگهیێ دا بەحسێ سهركهفتنا ئۆجەلان و گرێدانا وی ب دهزگههێ ههری تاری یێن دهوڵهتێ ڤە هاتییه ئیسپاتكرن. بهڵگه یا تهقدیركرنا گرێدانا ئۆجەلان ب دهوڵهتێ ڤە یه.
ڤێجا یا كۆرت ئهوه كو، چ ببە بلا ببە عهبدولا ئۆجەلان ل ههمبهر حەلاندنا كوردان ئهركێ خوە ب جێ ئیناییه. ئهڤرۆ دگهڵ نوێنهرێ دهوڵهتێ باخچهلی پلانا ب تهمامی حهلاندنا كوردان دكهن…
لێ ئهڤرۆ سوباهی دێ كورد ب ڤێ یهكێ گههن و ڤێ یارییا تاریی كو بوویه ئەگەرێ شههیدكرنا ب دههان ههزار گەنێن كورد، یا كو بوویه ئەگەرێ ڤالابوون و تالانكرنا كوردستانێ، یا كو جڤاكا كورد سهرۆبن كری و تێكدانێن مهزن د ناڤ جڤاكێ دا پهیدا كرین، یا كو نرخێن نهتهوهبوونێ شكاندین، دێ ژ هۆلێ ڕاكهن و دێ ههولدهن ل سهر هێلهكا نهتهوهیی ژ نوو ڤه شین ببن…
