ب ئامادەبوونا سەرۆکێ حکومەتا هەرێما کوردستانێ مەسرور بارزانی ئەڤرۆ (دوشەمب، ٣ێ تەباخا ٢٠٢٦ێ) مەراسیمەکا گرێدایی ساڵڤەگەرا ١٢ێ یا جێنۆسایدا ئێزدیان و کۆمکوژیا شنگالێ ب ڕێڤەچوو.
سەرۆکێ حکومەتا هەرێما کوردستانێ مەسرور بارزانی ژی د ناو وێ مەراسیمێ دە گۆتارەک پێشکێش کر، ئاڤە ژی ناڤەرۆکا گۆتارا وی یە:
ب ناڤێ خودێ مەزن و دلۆڤان
ئامادەبوویێن ڕێزدار و گرانبها،
هوین هەمی ب خێر هاتن، سەر سەران و سەر چاڤان.
ئەز سپاسییا ئامادەبوونا وە یا گرنگ دکەم، ئەز سپاسییا ئامادەبوونا میر حازم تەحسین بەگ، جەنابێ بابێ شێخ، جەنابێ پاتریارک، نوێنەرێ ڕێزدار عەلی زەیدی، جەنابێ د. فوئاد، کۆنسول و هەمی ئامادەبوویێن هێژا دکەم.
ئەڤرۆ ئەم ساڵڤەگەرا ١٢ێ یا جێنۆسایدا خوشک و برایێن خوە ئێن ئێزدی ب بیر تینین، کو ل سەر دەستێ ترۆریستێن داعشێ مەزنترین تاوان ل دژى خوشک و برایێن مە ئێن ئێزدی هاتە کرن. تاوانەک کو ویژدانا هەمی مرۆڤایەتیێ هەژاند؛ نە تەنێ ل کوردستانێ، لێ ل دەرڤەیی کوردستانێ و ل سەرانسەری جیهانێ ژی.
د وێ ڕۆژا کو ئەڤ تاوانە هاتیە کرن دا، جەنابێ سەرۆک بارزانی سۆز دا کو دڤێت ئەم تۆلا ڤێ تاوانێ هێلینن و دڤێت ئەم شنگالێ جارەکا دی ژ دەستێ ڤان ترۆریست و خێرنەخوازان ئازاد بکەین.
١٠٠ ڕۆژان پشتی وێ سۆزێ، ئەز د خزمەتا جەنابێ سەرۆک دا بووم و ئەم گەهشتینە سەر کۆپیتکا چیایێ شنگالێ؛ چیایێ شنگالێ، باژێرێ شنگالێ و هەمی دەڤەر ژ دەستێ ڤان تاوانباران هاتن رزگارکرن. ب سەدان پێشمەرگەیان خوینا خوە پێشکێش کر و بوون قوربانی. ئەز ب خوە شاهێدێ قوربانیدانا ڤان پێشمەرگەیێن قەهرەمان بووم، دا کو شەرف و کەرامەتا خوشک و برایێن مە ئێن ئێزدی بێتە پاراستن و ئەڤ تۆلهەلدانە ژ دژمن و ترۆریستان بێتە کرن.
ب سەربلندی ڤە ئەم د خزمەتا جەنابێ سەرۆک دا گەهشتینە شنگالێ و ئو دەڤەر ب گشتی هاتە رزگارکرن، لێ ئەڤ تاوانە ناهێتە ژبیرکرن. ب هەزاران خوشک و برایێن مە ئێن ئێزدی بوون قوربانیێن ڤێ جێنۆسایدێ؛ گەلەک ژ وان هاتن گرتن و دیلکرن، گەلەک ژی هاتن کۆمکوژکرن.
ژ وێ ڕۆژێ هەتا ئەڤرۆ، کابینەیا حکومەتێ بەردەوام د دۆڤچوونێ دا بوویە، دا کو ل وان قوربانیان بگەرێت. هەتا نوکە زێدەتری ٣٥٠٠ خوشکێن مە ئێن ئێزدی هاتینە دیتن و ژ دەستێ ڤان تاوانباران هاتینە رزگارکرن، لێ هێشتا ژی زێدەتری ٢٧٠٠ کەسان مانە و نەهاتینە دیتن. هیڤیا مە ئەوە کو هەر کەسێ بڤێت هاریکاریا مە بکەت، ئەم بشێین ب هەڤ ڕا وان بببینین و رزگار بکەین.
د جهێ خوە دا یە کو ئەز سپاسییا هەڤپەیمانان بکەم، بۆ وێ هاریکاری و پشتیڤانیا کو د شکاندنا ترۆریستێن داعشێ دا پێشکێشی مە کری، و بۆ هەڤکاریا وان دا کو ئەم زێدەتر خزمەتا خوشک و برایێن مە ئێن ئێزدی ئێن ئاوارە بکەین، یێن کو جهـ و وارێن خوە هێلاین و هاتینە کوردستانێ، کو گەلەک ژ وان ژی ژ دەرڤەیی هەرێمێ چوونه وەلاتێن ئەورۆپایێ.
هەمیا دەرگەهێن خوە بۆ ڤان خوشک و برایان ڤەکرن. ڕاستە تو جهەک وەکی مال و ئاخا مرۆڤی نابێت، لێ د جهێ خوە دا یە کو ئەز سپاسییا هەمی وان دەولەت و ڕێکخراوێن سڤیل بکەم یێن کو هاریکاریا مە کری، و ب تایبەتی ئەز سپاسییا خەڵکێ کوردستانێ دکەم کو هەمیا دەرگەهێن خوە بۆ ڤان خوشک و برایان ڤەکرن.
مخابن هێشتا ژی زێدەتری ٢٠ هەزار مالباتێن ئاوارەیێن ئێزدی د ناڤ کەمپان دا دژین. هەرچەندە ئەڤرۆ د وەلاتێ خوە دا ئاوارەنە، لێ دەما مرۆڤ نە ل سەر مال و حالێ خوە بیت، ب تەنێبوویێ ژیان زەحمەتتر دبێت. هیڤیا مەیە کو ئەم ڕۆژەکێ بشێین ڤان مرۆڤان ب سەربلندی ڤەگەڕینینە سەر جهـ و وارێن وان؛ بۆ شنگالێ و بۆ هەمی گوند و دەڤەرێن کو نەچار بووین ژێ بار بکەن.
ئەم سپاسییا دەستلاتدارێن حکومەتا عیراقێ ژی دکەین، بۆ هەڤکاریا وان د دیتنا گۆڕێن ب کۆم دا و هەڤاهەنگیا وان دگەل حکومەتا هەرێما کوردستانێ بۆ ڤەگوهاستنا تەرمێن قوربانیان بۆ جهێن وان. لێ هێشتا ژی داخوازیێن مە هەنە؛ داخوازیێن مە ئەڤن کو حکومەتا فیدرال هاریکار بیت دا کو ڕەوشا شنگالێ جارەکا دی ئاسایی ببیت، خەڵکێ شنگالێ ب سەربلندی ڤەگەڕێتە جهێن خوە، و ئابوور و ئێمناهی و بڕێڤەبرنا ئیدارەیا شنگالێ ژی بۆ خەڵکێ شنگالێ ڤەگەڕێت.
ئەڤ داخوازیە ژ حکومەتا فیدرال هەیە و حکومەتا هەرێمێ ژی دێ بەردەوام بیت دا کو جارەکا دی هەم شنگال و هەم دەورۆبەرێن شنگالێ بێنە ئاڤادانکرن. مە دەمێ خوە دا دگەل نەتەوەیێن ئێکگرتی و ب تایبەتی دگەل تیما (یونیتاس) گەلەک بزاڤ کر دا کو دادگەهەکا تایبەت ب تاوانێن داعشێ بێتە ئاڤاکرن، بۆ دادگەهکرنا وان کەسانێن کو ئەڤ تاوانە ل دژى خوشک و برایێن مە ئێن ئێزدی کری، لێ مخابن حکومەتا بەری نوکە هەڤکاریا مە نەکر. هیڤیا مە ئەڤە کو ڕۆژەکێ ئەڤ دادگەهه بێتە دامەزراندن و هەر کەسێ دەستێ وی د ڤێ تاوانێ دا هەبیت بگەهێتە سزایێ خوە.
داخوازییا مە ژ جڤاکا نێودەولەتی ژی ئەوە کو هەتا وێ ئاستا کو چێببیت بۆ کێمکرنا ئێشێن قوربانیێن دەستێ ترۆرێ هاریکار بن، ب تایبەتی خوشک و برایێن مە یێن ئێزدی. چی تشتێ ژ دەستێ مە هاتبێت مە کری یە و ئەم دێ بەردەوام ژی بین، ب تایبەتی بۆ وان خوشک و برایێن کو هاتینە رزگارکرن؛ بۆ وان خوشکێن هاتینە دیتن و رزگارکرن، ل سەر ناڤێ حکومەتا هەرێمێ مە سەنتەرەکێ چارەسەریێ بۆ وان ڤەکریە دا کو ئازارێن وان بێنە کێمکرن.
هەرچەندە ئەڤ تشتە ل بەرامبەر وێ هەمی زیان، خەدر و زۆلمێ نە تشتەکە، لێ هەتا ژ دەستێ مە بێت ئەم ئامادەنە و دێ بەردەوام بین. ئەو قوتابیێن کو خوەستین ل زانکۆیێ خویندنا خوە بەردەوام بکەن، مە بورسێن خویندنێ زەمالە بۆ وان دابین کرینە و نوکە گەلەک ژ وان زانکۆ تەمام کریـە و جهێ وان دیارە.
ئەز جارەکا دی دبیژم: دڤێت ئەم هەمی ب هەڤ ڕا کار بکەین دا کو ئەڤ تاوانە دۆباره نەبیت؛ نە ل دژى خوشک و برایێن مە یێن ئێزدی، نە ل دژى خوشک و برایێن مە یێن کریستیان، و نە ژی ل دژى خوشک و برایێن مە یێن موسلمان. تەرۆر نە دینی دناسێت و نە ژی نەتەوەیێ، تەرۆر ل دژى مرۆڤایەتیێ یە. ژ بەر وێ، هاریکاری و پشتیڤانیا هەمیا پێدڤی یە دا کو ئەم ب هەڤ ڕا کار بکەین کو تەرۆر جارەکا دی ل عیراقێ سەرێ خوە بلند نەکەت. ئێک ژ ڕێکێن ڕێگرتنێ ل سەرهەلدانا تەرۆرێ ئەوە کو دادپەروەری هەبێت، وەکهەڤی هەبێت، و ڕێز ل مافێن هەمی دین و نەتەوان بێتە گرتن.
ئەم وەکی حکومەتا هەرێمێ، ب هەڤکاریا هەمی دۆستێن خوە و ب تایبەتی ل سەر ئاستێ حکومەتا فیدرال ژی دێ بەردەوام بین، دا کو جارەکا دی توندوتیژی ڤەنەگەڕیتە ڤی وەلاتى. گەلێ مە وەستیایە، پێدڤیا مە ب ئارامیێ هەیە، پێدڤیا مە ب پێشکەفتنێ هەیە، پێدڤیا مە ب وێ هەیە کو ئەۆلادێن (زارۆکێن) مە پشتڕاست بن کو پاشەرۆژەکا ڕوونتر ل هیڤیا وانە. دڤێت ئەم ترسا کوشتن، گرتن و ڕەڤاندنێ د وەلاتێ خوە دا نەهێلین. ئەم داخوازێ ژ هەمی دۆستێن خوە دکەین کو دەستێ خوە بدنە دەستێ مە دا کو هاریکار بن و ئەم ڤێ مەترسیێ و ڤان تاوانان ب داوی بینین.
جارەکا دی ئەز داخوازێ ژ حکومەتا فیدرال دکەم کو بۆ بجھئینانا پەیمانا شنگالێ هاریکار بیت، دا کو هەمی خەڵکێ مە ب سەربلندی ڤەگەڕیتە باژێر و گوندێن خوە، ژیانا وان بێتە دابینکرن و ل بەرامبەر ڤان هەمی تاوانێن نەحەق یێن کو ل دژى وان هاتینە کرن، بێنە قەرەبووکرن.
جارەکا دی ئەز سپاسییا ئامادەبوونا وە هەمیا دکەم. بیرئینانا ڤێ تاوان و جێنۆسایدێ دڤێت نە تەنێ مەراسیمەک بیت بۆ ڕۆژەکێ، لێ دڤێت ببێتە سۆزەک دا کو ئەم هەمی ب هەڤ ڕا خەبات و تەکۆشینێ بکەین، ب هەڤ ڕا کار بکەین دا کو ڤان هەمیا ب داوی بینین و ژیانەکا سەربلند بۆ خوشک و برایێن خوە یێن ئێزدی و هەمی خەڵکێ کوردستان و عیراقێ ڤەگەڕینین.
جارەکا دی ئەز سپاسییا ئامادەبوونا وە هەمیا دکەم، هەر سەربلند و سەرکەفتی بن، و کوردستانی مە ژی هەر ئاڤا بیت.
