سەرۆکوەزیرێ هەرێما کوردستانێ، مەسرور بارزانی، د چاڤپێکەوتنەکا تایبەت دا دگەل “ئەلمۆنیتۆر”، تیشک ئێخستە سەر پاشەڕۆژا پەیوەندیێن هەرێما کوردستانێ و ئەمریکا، خوەڤەکێشانا هێزێن ئەمریکایێ و سیستەمێ بەرگرییا پاتریۆت ژ هەرێما كوردستانێ، هێرشێن درۆنان، پەیوەندی دگەل بەغدایێ، ڕەوشا دەڤەرێ و ئاستەنگێن بەردەم پێکهێنانا حکومەتا هەرێما کوردستانێ.
مەسرور بارزانی جەخت کر، هەرێما کوردستانێ چو گەفەک بۆ سەر ئاسایشا وەلاتێن جیران چێنەکریە و ڕاگەهاند، “ئەڤ هەولە تەنێ بۆ ترساندنا هەرێما کوردستانێ نە و دڤێن کوردستانێ بکێشنە ناڤ هەڤڕکیەکێ كو ئالییێ کوردی ب توندی دژایەتییا وێ دکەت. بۆچی هێرشێ دکەنە سەر مە، پرسیارەکە دڤێت ژ دەسەلاتدارێن ئیرانێ بێتە پرسیارکرن.”
هێرشێن ١٧ێ تەباخێ و جۆرێ درۆنێن ئیرانی
سەرۆکوەزیر مەسرور بارزانی د ڤێ هەڤپەیڤینێ دا هەموو ئەو هێرشێن بێ بهانە یێن ژ دەستپێکا جەنگێ ئەمریکا و ئیسرائیل دژی ئیرانێ د ٢٨ێ شوباتێ دا هاتینە سەر هەرێما کوردستانێ كو ژمارەیا وان گەهشتییە ١٠٠٠ هێرشێن درۆنی شەرمەزار كرن، ئاشکرا ژی کر، هێرشێن ١٧ێ تەباخێ یێن کو نڤیسینگەها تایبەت یا وی و مالا بەڕێوەبەرێ ئاژانسا پاراستنێ کربوونە ئارمانج، “گەفێن ڕاستەوخۆنە بۆ سەر ئاسایشا هەرێمێ.”
سەبارەت ڕەتکرنا بەرپرسایەتیێ ژ لایێ وەزیرێ دەرڤە و جێگرێ سەرۆککۆمارێ ئیرانێ ڤە، مەسرور بارزانی گوت، “ئەو درۆنێن هاتینە بکارئینان ژ جۆرێ ‘حەدید-١١٠ توربۆ’ دروستکریێن ئیرانێ نە و ژ ناڤ خەکا ئیرانێ هاتبوون، دڤێت بەرپرسێن ئیرانێ خوە بەرسڤێ بدن و لێکۆلینێ بکن چاوان ئەڤ جۆرە فڕۆکەیێن بێفڕۆکەڤان یێن تەنێ دەف وان هەین، ژ لایێ کەسێن دی ڤە بۆ هێرشکرنا سەر دەرڤەی وەلاتێ وان دهێنە بکارئینان.”
هەڤدەمی ئاماژە ب سەردانا محەمەد باقر قالیباف، سەرۆکێ پەرلەمانێ ئیرانێ بۆ عێراقێ کر و ڕاگەهاند، چاڤەڕێ دکەت سەرۆکوەزیرێ عێراقێ ئەڤێ بابەتێ دگەل بەرپرسێن ئیرانێ بەحس بكەت، چونکی بەغدایێ ب فەرمی ئەو هێرش شەرمەزار كرینە و داخۆازا لێکۆلینێ کریە.
ڤەکێشانا پاتریۆت و داخوازیاسیستەمێ بەرگرییا ئاسمانی
مەسرور بارزانی، دلگرانییا جور ژ ڤەکێشانا هێزێن مەشق و ڕاهێنانا ئەمریکایێ و ڤەگوهاستنا سیستەمێن بەرگرییا ئاسمانی یا “پاتریۆت” بەری وەختێ ٣٠ێ ئیلۆنێ نیشان دا و ڕاگەهاند; “مە نەشیایە وان سیستەمێن کاریگەر ب دەست ڤە بینین یێن دشێن مە ژ وان گەفان بپارێزن، بەلێ هەول بەردەوامن. ڤەکێشانا ئەڤان سیستەمان مە دئێخیتە مەترسیێ و ئەم ناخوازن ڤالاهییەكا ئهمنی بجهـ بهێلیت.”
سەرۆکوەزیر ئاماژە ب هەوێ ژی دا، هەرچەندە هەڤکارێن ئەمریکی سەرکەفتی بوون د تێکشكاندنا پتریا مووشەک و درۆنان دا، بەلێ کوردستان د مەترسیێ دا یە و مانەڤەیا هێرشان ژی یا قبوولکری نینە، ل دۆر ڤێ چەندێ داخواز ژ هەمی دۆستێن هەرێما کوردستانێ کر هەڤکارییا وان بکن دا ببنە خودانێن سیستەمێ ئاگەهدارکرنا پێشوەختە، سیستەمێ دژەدرۆن و بەرگرییا ئاسمانی بۆ پاراستنا هەووڵاتییان، ژێرخانا ئابووری و کەرتی وزێ.
دەربارەی ئاخفتنێن تۆم بەڕاک، بالیۆزێ ئەمریکایێ ل ترکیێ و نێردەیێ تایبەتێ ئەمریکایێ بۆ عێراق و سوریا، کو د چارچۆڤەیا ئیدانەکرنا هێرشێن ١٧ێ تەباخێ دا، مەسرور بارزانی ب “هەڤال و هەڤپشکەکێ ب نرج” ب ناڤ كر و هەرێما کوردستانێ ژی ب “هەڤپەیمانەکا جهێ باوەرییا ئەمریکایێ” ن ناڤ كر.
سەرۆکوەزیر ڕاگەهاند، پەیوەندییا هەرێما کوردستانێ و ئەمریکا گەلەک ب نرخە و شانازیێ پێ دکەین، هیڤی ژی خواست هەڤپشکییا ناڤبەرا وان پشتی کێمکرنا هێزێن ئەمریکایێ ژی ب ئاوایێن جودا بەردەوام بیت.
پشتەڤانی بۆ سەرۆکوەزیرێ عێراقێ و ژچەكکرنا گرووپێن چەکدار
پەیوەندیدار ب ڕەوشا سیاسی یا عێراقێ، مەسرور بارزانی، عەلی زەیدی، سەرۆکوەزیرێ عێراقێ ب دۆستەکێ ڕاستەقینە و جهێ باوەریێ وەسف کر کو کار بۆ بەرژەوەندییا وەلاتی دکەت، پشتەڤانییا ب هێز یا خوە بۆ پێنگاڤێن وی د ڕووبەڕووبوونا گەندەلیێ، سەپاندنا سەروەرییا یاسایێ و ژچەكکرنا گرووپێن چەکدار دوپات کر.
سەبارەت دواکات کو زەیدی بۆ ژچەككرنا گرووپێن چەکدار د ٣٠ێ ئیلۆنێ دا دیارکری، سەرۆکوەزیر هیڤی خواست ئەڤ گرووپێن چەکدار بەری وی وەختی چەکێن خوە تەسلیمی حکومەتێ بکن و بێنە ناڤ هێزێن ئاسایشێ، گوت ژی “باوەرناكەم کەسێ بڤێت هەڤڕکییا سەربازی یا ئاژاوەیێ د وەلاتێ دا ببینیت، بەلێ پێویستە حکومەت ئەوا پێویست بۆ پاراستنا هەووڵاتییان و سەروەرییا وەلاتێ جێبەجێ بکت، ئەگەر هەڤکارییا سەرۆکوەزیر ژی نەهێتە کرن، دێ ڕووبەڕووی ئەنجامێن خرا بن.”
سەرۆکوەزیرێ كوردستانێ ڕوون ژی کر، هەر دەم کێشەیێن عێراقێ ب ڕەوشا ئیرانێ ڤە گرێدەن، بەلێ پێویستە عێراقی بەرژەوەندییا نیشتمانی و ئاسایشا وەلاتێ خوە بێخنە بەری هەمی تشتا، بێی کو سەح بکنە هەڤڕکیێن ئیرانێ بەر ب کێڤە دچن.
ڕەوشا ئابووری، ڕۆلێ هەرێمێ ددەڤەرێ دا و کەرتی نەفتێ
ژ لایێ ئابووری ڤە، سەرۆکوەزیرێ هەرێما کوردستانێ پشتیوانییا خوە یا تمام بۆ سیاسەتا ئیدارەیا دۆناڵد ترەمپ د بن دروشمێ “بازرگانی نەکو هەڤڕکی” دەربڕی، ئاماژە ب کۆنفرانسێ وزەیێ یێ ئەلمۆنیتۆر کر کو ب بەشدارییا کریس ڕایت، وەزیرێ وزەیێ یێ ئەمریکا هاتبوو بڕێڤەبرن و ڕاگەهاند “حکومەتا هەرێمێ پێنگاڤێن مەزن هاڤێتینە ب جێبەجێکرنا میکانیزمەکێ ب پالپشتییا واشنتن بۆ فرۆتنا نەفتێ ب ڕێیا کۆمپانیا ببازاڕکرنا نەفتا عێراقێ (سۆمۆ) دگەل کۆمپانیێن ئەمریکی و نێودەوڵەتی.”
مەسروور بارزانی جەخت کر، دەرگەهێ کوردستانێ یێ ڤەکرییە بۆ کۆمپانیێن ئەمریکی نە تەنێ د کەرتی وزەیێ دا، لێ بەلێ د کەرتی چاندنێ، ژێرخانێ و تەکنەلۆجیایێ ژی دا، ب پێویست ژی زانی ژینگەیەک بێتە دابینکرن کو وەبەرهێنان و کارمەندێن وان ب پاراستی بمێنن.
هەڤدەمی ئاماژە ب پەیوەندیێن باشێن هەرێما کوردستانێ دگەل ترکیێ و حکومەتا نوو یا سوریایێ کر و ڕاگەهاند، هەرێما کوردستانێ هەر دەم فاکتەرەکێ ئەرێنی بوویە بۆ هەڤکاریکرنا دەستپێشخەریا ئاشتیێ ل ترکیێ و تێکەلبوونا سیاسی ل سوریایێ.
دواکەوتنا پێکهێنانا حکومەتێ وچالاککرنا پەرلەمانی
سەبارەت ڕەوشا ناوخخوە یا هەرێما کوردستانێ، مەسرور بارزانی دلگارانییا خوە دەربڕی کو پشتی پتر ژ ٢٠ مەهان ژ هەلبژارتنێن تشرینا ئێکێ یا ٢٠٢٤ێ هێشتا حکومەت نەهاتییە پێکهێنان.
مەسرور بارزانی ئاشکرا ژی کر، “داخوازا مە ئەڤە بوو ئێکسەر حکومەتەکا گشتگیر پێکبینین و یەکێتییا نیشتمانییا کوردستانێ هەڤپشکێ مە یێ سەرەکی بیت، بەلێ وان ڤیا چاڤەڕێی هەلبژارتنێن عێراقێ بکن، سەرباری هندێ کو پارتی دیموکراتی کوردستان پترین دەنگ ل سەرانسەری عێراقێ و کوردستانێ ب دەست ڤە ئینان، بەلێ دیسان حکومەت نەهاتە پێکهێنان.”
سەرۆکوەزیران داخوازا چالاککرنا ئێکسەر یا پەرلەمانێ کوردستانێ کر و ڕاگەهاند “دەستێ دۆستایەتیێ بۆ هەموو ئالیێن سیاسی درێژ دکەین دا بێن و بەشدار بن د پێکهێنانا حکومەتێ دا، کو ئەڤە د بەرژەوەندییا بالایا خەلکێ کوردستانێ دا یە.”
کێشانا هێزێن ئەمریکا و ئاسۆیاپەیوەندییان
سەرۆکوەزیر مەسرور بارزانی جەخت کر، هەرێما کوردستانێ پشتیوانیێ ژ بڕیارا ڤەکێشانا هێزێن ئەمریکایێ ل عێراقێ دکەت، بەلێ هیڤیدارە ئەڤ پێنگاڤە ڤالاهییەكا ئهمنی دروست نەکەت. گۆت ژی “مە دڤێت پەیوەندیێن خوە یێن ب هێز دگەل ئەمریکایێ د دەرڤەی هەڤکاریێن سەربازی دا د بوارێن ئابووری و سیاسی دا پتر فراوان بکن، و هەرێما کوردستانێ وەک جهێ باوەرپێکراوترین و دلسۆزترین هەڤپشکێ ئەمریکا د دەڤەرێ دا دێ مینیت
