رەفەرەندوما شەرمزاركرنێ
سەردار هێتوتی
دەمەکێ درێژە مللەت ب گشتی ل هیڤیا ڤێ رەفەرەندومێ یە، رەفەرەندومەک کو راستبێژ و تێکدەر ژێک بهێنە ڤاڤارتن، رەفەرەندومەک کو نەتەوەپەرێس و خوەپەرێس ژێک بهێنە ڤاڤارتن، رەفەرەندومەک مافخاری و مافزەبتکری ژێک بهێنە ڤاڤارتن.
دڤێت ساڵانە ل ڤێ هەرێمێ رەفەرەندوم بهێن ئەنجامدان دا راستی ژێک بهێنە ڤاڤارتن، نابە ب تنێ چاڤێ مە ل سەر گرنگی و سەنگا رەفەرەندوما سەربخۆیێ بە، بەلکو دڤێت بۆ گەلەک پرسێن دیتر ژی ئەڤ یەکە بهێتە ئەنجام دان.
ل هەرێما کوردستانا عیراقێ، ل ژێر دەستێ حکومەتا کوردی، مللەتی نێزیکی 30 سال ب رێ کرن، لێ هێشتا ب درستی یاسا بنەجهـ نەبوویە، ماف ب درستی نەهاتینە دان، کوردپەروەر ل دوور مانە و جاش و خۆفروش ل سەر شیلانا رائێخستینە.
حەق و ناحەق یێ سەرێ ئێک دخون، گەل یێ کەفتیە گێلەشوکا وان، نزانن کێ موچە بریە؟ نزانن کینە موچە نادەن؟ نزانن یاسا ل کیڤە ئاسێ مایە؟ لێ ب تنێ یا زەڵال ئەوە کو ساڵانە بەرێ گەنجان ددەنە دەریا ئیگە و دبنە مێهڤانێن رێ قەدەرەکا نەدیار.
دەم هاتیە مللەت ژ ڤێ خەوا گران رابە و ب هشیاریا ڤان چیایان و ب بلنداهیا رۆژێ ل سەر پێیان بن و گەرماتیێ بدەنە ژیانێ و بۆ هەر نەدادیەکێ ب بڵندی بێژن نا.
دەما بۆ جارا ئێکێ موچە وەک کارتا فشارێ و ب پشتەڤانیا هندەک کەسان ل دژی هەرێمێ ژ لایێ حکومەتا نوری مالکی (سەرۆكوەزیرێ بەرێ یێ عیراقێ) ڤە هاتیە بکارئینان و بودجە و موچە بویە یاریا سیاسی، ل وێ رۆژێ ئەگەر ئەم گەلەکێ هشیار باین و مە رێاكسیۆن نیشان بدایە، د نها دا رەوش یا هوسا نەدبوو و رەوشا فەرمانبەرێ کوردستانێ ل ڤی ئاستێ لاوازیێ نەدبوو.
موچە هاتە برین، هندا دەست د قوتان و هندا ژی خۆ بێ دەنگ دکر و سلوگانێن نەتەوایەتی د گوهێ مللەتیدا د قیراندن و مللەت ژی پێ دچوو د ناڤا خەوا گران دا هەتا هەر تشت چووی، لەورا د نوکە پاش دا دڤێت ژ بۆ ڤان گەندەڵە بەرپرسێن تێکدەرێن نەتەوی رەفەرەندوما شەرمزاركرنێ بهێتە ئەنجام دان و گەل ب هشیاری رابە سەر لنگان.
