به‌شیکچی و تێگه‌ها ده‌مۆکراسی و ئازادیا پەكەكێ
ڤان رۆژێن پشتی کو ئیسمائیل بەشیكچی ره‌خنه‌یێن بنگه‌هین ل پەكەكێ گرتن و سیاسه‌تا پەكەكێ یا ل هەمبه‌ر حكومەتا هه‌رێما کوردستانێ ب تووندی ره‌خنه کر، مه‌دیایا پەكەكێ، هه‌وادار و لایه‌نگرێن وێ، ئێرشه‌ک بێویژدانی ئاژۆتن سه‌ر مامۆستا بەشیكچی، ته‌ڤایی خه‌بات و رابردوویێ بەشیكچی ل با پەكەكێ و لایه‌نگرێن وێ پووچ كرن. ئه‌م باوه‌رن گه‌ر بەشیكچی بده‌ست رایه‌دارێن پەكەكێ ب که‌تا ئان ژی وانا ده‌رفه‌ت ب دیتنا وێ بەشیكچی ب کوشتانا ژی، لێ ئه‌ڤ زه‌مین ژ بۆ پەكەكێ نینه. ب نێرینا مه پەكەكێ ب ڤی هه‌لوێستێ هانێ خوه کوشت، ب ڤی ئێرشا نه مرۆڤانه بۆ سه‌ر که‌سایه‌ته‌ک زانستی و به‌رخوه‌دانڤانه‌کی ئازادیخواز و مرۆڤدۆست وه‌که بەشیكچی، پەكەكێ ئیسپات کر کو، ئه‌و روحێ که‌مالیزمێ و فاشیزمێ دپارێزه. ته‌ڤایی پرۆپاگاندا وان ژ بۆنا ئازادی، ده‌مۆکراسی و دادپه‌روه‌رییێ ڤرێن ڤالانه و ده‌ره‌ون. ئه‌م باوه‌رن ئه‌ڤ هه‌لوه‌ستا پەكەكێ ئه‌وێ ل با گه‌لێ کورد و دۆستێن کوردان ژی گه‌له‌کی گران ل سه‌ر پەكەكێ ته‌مام ببه..
1-ئەگه‌ر مرۆڤی نێرینه‌کا زانستی و تێگه‌هیشتنه‌ک دیرۆکی یا راست هه‌به، پێویست ناکه چ جاران مرۆڤان زێده مه‌زن بکه، ئان ژی مرۆڤان بکه خودێ، چونکی مرۆڤ چه‌ند مه‌زن و چه‌ند بووهادار بن، چه‌ند روومه‌تدار بن دیسان ژی مرۆڤه، چ قاسی باشی و روومه‌تێن بلند هه‌بن، د به کو شاشتی و ئالییێن وان یێن نه‌رێنی ژی هه‌بن. لێ ئه‌ڤ کلتوورا بلندکرن و مه‌زن نیشاندانا مرۆڤان ژ پەكەكێ و ره‌ژیمێن دیکتاتۆرێن ده‌ڤه‌رێ، وه‌که که‌مالیستان، ره‌ژیمێن بەعسا ل سووریێ و ئیراقێ که‌ت ناڤا بزاڤا کوردان. نه خاسمه پەكەكێ ئاپۆ وه‌که خودێیەك نیشانی کادرۆ و خه‌لکێ خوه دا و ئه‌و خستن جهێ وه‌لات، گه‌ل، دۆز و ته‌ڤایی روومه‌تان. هه‌تا گه‌ها وێ ئاستێ کو د خوەپیشاندان و ته‌ڤایی موناسه‌به‌تێن پەكەكێ دا نە نه‌خشێ کوردستان، نه سیمبۆلێن نه‌ته‌وی و نه چ که‌سه‌ک دن ناهێتە دیتن ته‌نێ ئاپۆ هه‌یه. لێ مه ته‌ڤا ب چاڤێن خوه دیت ئه‌ڤ ئاپۆیێ کو پەكەكێ كربوو خودێ چاوا ل هه‌مبه‌ر له‌شکه‌رێن ترکا ره‌زیل و ستۆخوار سه‌کنی، د دادگه‌هێ دا ل هه‌مبه‌ر ته‌ڤایی مه‌دیایا جیهانێ وه‌که دانپێنه‌ره‌ک( ئیعتیرافچییه‌ک) ده‌رکه‌ت پێشییا مه‌دیایایێ. که‌ساتیا خوه، دۆزا گه‌لێ کورد و ئه‌و بزاڤا کو ب ده‌هان هه‌زار شه‌هید دابوون ته‌ڤ کرن سفر و روومه‌ت نه‌دا ڤام بهایان، هه‌می کرن قوربانا خوه. ئه‌و ده‌م هه‌ر مرۆڤه‌کی ئازادیخواز و کوردپه‌روه‌ر تێگه‌هیشت کو چ مه‌زناهی و روومه‌تا ئاپۆ نینه و ئه‌و وه‌ک بالۆنه‌ک ڤالا بوو. سه‌خمه‌راتی ڤێ راستییێ ژی نه کۆنسه‌یێ، نه ژی رێخستنێن پەكەكێ گۆتنه‌ک ژی ل سه‌ر ئاپۆ و هه‌لوێستێن ئاپۆ نه گۆتن، ئه‌و کادرۆیێن پەكەكێ ژی ئه‌وێن ل هه‌مبه‌ر ده‌رکه‌تن ته‌ڤ هاتن ته‌سفییه کرن، یان هاتن کوشتن ئان ژی نه‌چار مان ره‌فێن پەكەكێ هێلان. له‌ورا یێ کو ئەو قاسی ره‌زاله‌ت و شه‌رمه‌زارییێ قه‌بوول بکه، یێن کو که‌سه‌کی وه‌که ئاپۆ ته‌سلیمییه‌تکار و ئیتیرافچی ب سه‌رۆکێ خوه قه‌بوول بکه ئه‌و ب چی ئاواهی نکارن ره‌خنه ل مرۆڤه‌کی وه‌که بەشیكچی بگرن ئه‌و بەشیكچییێ کو ته‌ڤایی ژییێ خوه د گرتیگه‌هێن فاشیزمێ دا ده‌رباز کر و ته‌نێ رۆژه‌کێ ژی نه هزرا خوه گوهه‌رت نه ژی ل سه‌ر دۆزا کورد ژ پره‌نسیپێن خوە ییێن زانستی ھاتە خوار تەسلیمی چ ده‌سهلاتا نەبوو. به‌شیکچی دوھی ل هه‌مبه‌ر ترکا پاراستنا دۆزا کورد کرییه، پاراستنا راستییا کرییه، ئیرۆ ژی ل هه‌مبه‌ر پەكەكێ راستییان د پارێزه، دوھی پەکەکە، پاراست لێ ئیرۆ ژی پەكەكێ ره‌خنه دکه، ئه‌ڤ گه‌له‌ک نۆرماله، چ شاشیتی و نه راستی تێدا نینه.
2- ئەگه‌ر چ که‌س بەشیكچی ناس نه‌که و بێ ئاگه‌ھ بن ل سه‌ر ده‌رباسبوویێ بەشیكچی، پەكەك و ده‌ردۆرێن پەكەكێ بەشیكچی باش ناس دکن، مه‌دیایا پەكەكێ ب هه‌زاران رووپه‌ل ل سه‌ر به‌رخوه‌دان و هه‌لوێستێن بەشیكچی وه‌شاندنه، ب سالان بەشیكچی مانشه‌تێن رۆژنامەیا سه‌رخوه‌بوون و ئۆرگانێن راگه‌هاندنا پەكەكێ بوو، لێ ئیرۆ بەشیكچی بوویه ئارمانجا ئێرشێن پەكەكێ. ئه‌ڤە ئه‌و هزر و رامانا فاشیزمێیه یا کو دخوازه هه‌ر مرۆڤه‌ک د خزمه‌تا وێ دا به، ئەڤە ھزر و رامان و سیاسەتا پەكەكێ یە، هه‌رکه‌سێ د خزمه‌تا پەكەكێ و به‌رژه‌وه‌ندییا پەكەكێ دا به، ب نێرینا پەكەكێ ئه‌و وه‌لاتپارێزه، ئه‌و راست و دروستە، لێ ئەگه‌ر نه د خزمه‌تا پەكەكێ دا به ئه‌و خائین و وه‌لاتفرۆشه. ئه‌م دزانن پەكەكێ ب سه‌دان کادرۆیێن خوه یێن سه‌رکرده ب ڤی ئاوایی کوشتنه و مۆرا ئیخانه‌تێ ل وان خستنه. گه‌لۆ چاوا چێ دبه د ناڤ شه‌ڤ و رۆژه‌کێ دا مرۆڤێن قه‌هره‌مان د بن خائین، خائین ژی د بن قه‌هره‌مان ل گۆر کیژان یاسا، ل گۆر کیژان ده‌ستوور ئه‌ڤ حوکوم تێ دایین؟ ئه‌ڤ بێ مۆرالی و بێ پره‌نسیپیا پەكەكێ ل هه‌ر ده‌رێ، ل ته‌ڤایی دیرۆکا پەكەكێ خوه نیشان دده. ئه‌ڤ بزاڤێن ب ڤی ئاواهی خوه تێخن شوونا ته‌ڤایی روومه‌تێن جڤاکی، نه‌ته‌وی و مرۆڤی د درێژییا دیرۆکێ ده ژ ده‌رڤی وێرانکرن، حه‌لاندنا جڤاکێ و چنەكرنا به‌هایێ ژییانێ چ مفا نه‌دانه چ جڤاکا، چ جاری خزمه‌تا ئازادی و ده‌مۆکراسییێ نه کرنه، وه‌لات ئاڤا نه کرنه. میناکا پارتییێن کۆمۆنیست، و سۆسییال- ناسییۆنالیست میناکێن به‌رچاڤن. دیرۆک شاهده كا چاوا ئه‌وانا جیهان د ناڤا خوینێ دا گه‌ڤزاندن. ئه‌م ته‌ڤ دزانن پارتییا کۆمۆنیستا سۆڤییه‌تێ، نازییێن ئالمان چاوا ئه‌و ره‌وشه‌نبیر و که‌ساتییێن هزرمه‌ند یێن کو وه‌که وانا نه فکرین بێ ده‌نگ کرن. گه‌ر پەكەكە ب ڤان ئیمکانێن کێم و ده‌سهلاتا خوه‌یی سینووردار ده‌ما وه‌ها ئێرشی که‌ساتییێن هزرمه‌ند دکه، باشە ده‌ستهلات بکه‌ڤه ده‌ست وان و زه‌مین ژ پەكەكێ را به‌رهه‌ڤ ببه، ئه‌و دێ رێ نه‌ده چ هزرێن ئازاد. هه‌ر مرۆڤێ وه‌که پەكەكێ نه فکره ئه‌و دێ مافێ ژییانێ نه‌ده وانا.
3- ئه‌م باوه‌رن پرسگرێکا پەكەكێ ب ئیسمائیل بەشیكچی را نه یا ئیرۆیه، نه ژی ژ به‌ر وێ چه‌ندێیه کوو ره‌خنه ل سییاسه‌تا پەكەكێ یا ل هه‌مبه‌ر حکومه‌تا هه‌رێما کوردستانێ یه. به‌لکی پەکەکە هه‌رتم ل ده‌لیڤه‌یان د گه‌ره دا کوو هه‌می ئه‌و که‌سێن به‌هسا ده‌وله‌تا کوردی دکن، هه‌می ئه‌و هزرێن کوو ده‌وله‌تبوونا کوردستانێ دپارێزن بێ ده‌نگ بکه.
پشتی گرتنا ئۆجالان، پەكەكێ ل گۆر ستراته‌ژییا ئیمرالی پرسا کورد، کوردستانیبوون ژ رۆژه‌ڤ و سیاسەت و ستراتەژیا خوه ده‌رخست، ھەتا ناڤێ کوردستان ژی ل سه‌ر رێختنێن خوه راکر. ل رۆژاڤا ناڤێ پارتییا وان پارتییا یه‌کێتییا ده‌مۆکرات (پەیەدە)، ل باكور پارتییا ده‌مۆکراتیکا گه‌لان (ھەدەپە)، ل باشوور، پارتییا چاره‌سه‌رییا ده‌مۆکراتیک (پەچەدە)، ل رۆژهلات پارتییا ژییانا ئازاد (پژاک)، ئاڤا کرن. د ته‌ڤایی شرۆڤه و داخوویانییێن ئاپۆ و رایه‌دارێن پەكەكێ دا داکۆکی ل سه‌ر وێ چه‌ندێ تێ کرن کو ئه‌و ده‌وله‌تبوونا کوردستانێ نا خوازن، ئه‌و یه‌کێتیا خاکا ترکیێ، ئیرانێ، ئیراق و سووریێ دخوازن. ئه‌ڤ هزرا کو پەكەكە دپارێزه هزرا که‌مالیزمێ، با بەعس و ئیرانچیتیێ یه کو زێده‌ی سه‌د سالن بزاڤێن شۆڤینی یێن ترک، عه‌ره‌ب و فارسان ل هه‌مبه‌ر کوردان د پارێزن و ئه‌ڤ هزر سه‌ده‌ما ته‌ڤایی کۆمکوژی، مالوێرانی و ئه‌نفالێن کوردستانێ یه. ئیسمائیل بەشیكچی به‌ره‌ڤاژی ته‌ڤایی ڤان هزران پشتگیریێ ل سه‌رخوه‌بوونا کوردستانێ دکه. بەشیكچی پشتگرییێ ل ده‌وله‌تبوونا کوردان دکه. ئه‌ڤ هه‌لوێست و رامانا بەشیكچی ل دژی هزر و رامانێن ئاپۆ یه، کو ئیرۆ ئه‌ڤ هزرێن ئاپۆ نوونێنه‌راتییا ده‌وله‌تا کوور یا ترک دکه. ژ به‌ر ڤێ چه‌ندێ پەكەكە نه ته‌نێ شه‌رێ که‌ساتییا ئیسنائیل بەشیكچی دکه، به‌لکوو د که‌ساتییا به‌شکچی دا شه‌رێ هزرا سه‌رخوه‌بوونا کوردستانێ د که.
د بن ناڤێ دژاتیا بەشیكچی دا شه‌رێ ته‌ڤایی وان هزرێن ئازاد دکه ئه‌وێن هزرا ده‌وله‌تبوونا کووردستانێ د پارێزن. به‌رگریکرن ژ هه‌رێما کوردستانێ ناهێتە واته‌یا به‌رگریکرن ل پارتییه‌کێ ئان ژی ل رێبازه‌کێ، هزرمه‌ندێن وه‌که بەشیكچی باش دزانن هه‌بوونا پارچهیەک خاکا ئازاد ب ناڤێ کوردستان ژ بۆنا کوردان چقاس بوهادار و گرنگه، له‌وما هه‌ر که‌سێ قاسی سه‌رێ ده‌رزییێ ژی خه‌مخوه‌رییا کوردا هه‌به ئه‌وێ ڤێ هه‌رێمێ ب پارێزه، هه‌ولدانێن تێکدان و خه‌رابکرنا ڤێ هه‌رێمێ هه‌ولێن دژمنکارینه، هه‌ولێن نه‌یار و دژمنانه، ده‌ما بەشیكچی پێ ل ته‌ڤایی به‌رژه‌وه‌ندییێن شه‌خسی دده و ره‌خنه ل کریارێن تێکده‌ر یێن پەكەكێ دگره، تێکلییێن پەكەكێ و حەشدا شه‌عبی شه‌رمه‌زار دکه، ئه‌ڤه ژ هه‌لوێسته‌ک مرۆڤی یێ به‌رپرسییارییه‌ک ئازادیخوازی تێ، لێ پەكەكێ کو ده‌ستێ خوه دایه ده‌وله‌تا کوور یا ترکییێ و ده‌زگه‌هێن تاری یێن ئیران و وه‌لاتێن ده‌ڤه‌رێ دخوازه راستییان ڤه‌شێره، دخوازه بەشیكچی بکه رۆژه‌ڤ، بەشیكچی تۆمه‌تبار بکه، راستییان به‌ره‌ڤاژی بکه.
4-ده‌ستپێکا دامه‌زراندنا پەكەكێ و هه‌یا ئیرۆ شه‌رێ پەكەكێ شه‌رێ چنەكرنا روومه‌ت و بوهایێن نه‌ته‌وا کوردن، شه‌رێ چنەكرنا که‌لتوور و ژییانا کورده‌وارییه، شه‌رێ نه‌هێلانا که‌ساتییێن کوورد و ره‌سه‌ناتی ( ئۆرژینالیته‌یا) کوردییه. ئه‌ڤ شه‌رێ ئیرۆ ل هه‌مبه‌ر بەشیكچی ژی تێ کرن پارچهیەک ژ ڤێ سییاسه‌تێ یه. راسته ئیسمائیل بەشیكچی مرۆڤه‌ک ب ره‌گه‌ز نه کورده، ترکه، لێ بەشیكچی ژ ده‌ما کو چوویه له‌شکه‌رییا ترکییێ د ته‌مه‌نێ گه‌نجتییا خوه دا هه‌تا ئیرۆ ب جڤاکا کوردان را، ب که‌ساتییێن کورد را، ب بزاڤا کورد را، ب ده‌رد و ژانێن گه‌لێ کورد را دژیت، ئه‌و ژ کوردان باشتر شاره‌زایێ جڤاک و دیرۆکا کوردایه. ئه‌و بوویه سه‌مبۆله‌ک بۆ که‌ساتییه‌که ده‌مۆکرات و ئازادیخواز ل ده‌ڤه‌رێ. سه‌ده‌مێ مه‌زنبوونا بەشیكچی ژی پێداگرییا وییه ل سه‌ر ره‌وابوونا دۆزا کورد. ب واته‌یه‌ک دن بەشیكچی و دۆزا کورد وه‌که گۆشت و هه‌ستی ب هه‌ڤره هاتنه گرێدایین، یا هه‌ری بالکێش ژی ئه‌وه کو بەشیكچی چ به‌رژه‌وه‌ندییێن که‌سی د ڤێ پرسێ ده نینه. ب ڤی ئاوایی بەشیكچی بوویه سه‌مبۆله‌ک، بوویه میناکه‌ک بۆ که‌ساتییه‌ک ده‌مۆکرات د رۆژهلاتا ناڤین دا، هه‌ر مرۆڤه‌ک ترک، عه‌ره‌ب ئان ئیرانی به‌هسا ده‌مۆکراسییێ بکه، دکاره بەشیكچی وه‌که میناک ببینه. لێ ده‌ما پەكەكە ب ڤی ئاوایی، دخوازه ڤان سیمبۆلان نەھێلە، ڤان میناکان ره‌ش بکه، ل ڤێرە په‌یامه‌ک کوور هه‌یه، په‌یاما داگیرکه‌ران هه‌یه، په‌یام ژی ئه‌ڤه: “نه‌کەن، چ که‌سه‌ک ترک، عه‌ره‌ب ئان ژی فارس پارێزڤانییا دۆزا کورد نه‌کن..! هه‌ر که‌سێ پارێزڤانییا کوردا بکه، کورد ب خوه دێ وی ره‌زیل بکن، چاوا پەكەكێ بەشیكچی ره‌زیل کر، هه‌رکه‌سه‌ک به‌رگرییێ ل کوردا بکه ئه‌وێ ره‌زیل ببه..!” ل ڤێرێ مه‌به‌سته‌ک دژمنکاری ستراته‌ژیک هه‌یه، ئارمانچ ئه‌وه چ که‌س دۆستینیا کوردان نه‌که، یێن کو بکن ژی وانا ره‌زیل بکن. ئه‌ڤ ئارمانجه‌ک نینە كو ب رێکه‌فت هاتبه هلبژارتن، به‌لکی ئه‌ڤه ب زانه‌بوون و ب حه‌ساب تێ کرن.
ب کورتی پەكەكە د بێژه:
– هه‌رکه‌سێ وه‌که پەكەكێ نه فکره ئه‌و خائینه، ئه‌و دژمنێ کوردانه.
– پەكەكە، کێ ب په‌ژرینه ئه‌و وه‌لاتپارێز، ده‌مۆکرات و ئازادیخوازه، یێ کو پەكەكە نه په‌ژرینه ئه‌و وه‌لاتفرۆشه، پاشڤه‌رۆ و که‌ڤنه‌په‌ره‌سته.
– پەكەكە ل كیڤە به ئه‌و ده‌ر کردستانه، رێخستنا پەكەكێ ل كیڤە به ئه‌و ده‌ر کوردستانه، ده‌رڤی ڤێنا چ کوردستان و چ هه‌بوونا کوردان نینه.
– هه‌رکه‌سێ پشته‌ڤانییا پەكەكێ نه‌که، خه‌بات و کارێن پەكەكێ نه په‌ژرینه، مافێ ژییانێ نینه و دڤێ بمره.
– پەكەكە، د بێژه پەكەكە پیڤانا هه‌می راستییانه، هه‌می راستی دڤێ د فیلته‌رێ پەكەكێ را ده‌رباز ببن، یێن کو ده‌رباز نه‌بن چه‌وتینه ناهێن په‌ژراندن
ئه‌ڤ هزرا پەكەكێ هزره‌ک فاشیستیه، هزره‌ک ستالینیستیه، هزرا رژێمێن دیکتاتۆره، د درێژییا دیرۆکێ دا ڤان هزرێن ب ڤی ئاوایی چ جڤاک ئازاد نه‌کرنه، چ جڤاک ئاڤا نه کرنه، لێ بەرڤاژی وان جڤاک هه‌رفاندنه، جڤاک وێران کرنه، جڤاک به‌ر ب تاریبوون و بێچاره‌تییێ برنه. دیرۆکا پەكەكێ د چل سالێن ده‌ربازبوویی دا ڤێ راستییێ نیشا مه دده، و هه‌ر رۆژ پەكەكە میناکێن تازه ژ بۆنا ڤان راستییان زێده دکه، وه‌که ئیرۆ ئێرشی ئیسمائیل بەشیكچی دکه، ئه‌ڤ میناکه‌ک گه‌له‌ک بالکێشه.
2020.12.27
