ترک و پەکەکە و باشوور
پەکەکە بۆچی ل باشوور بنەجھ بوویە؟ ئەو و ترک دزانن بۆچی. رەنگە ئەم ژی بزانین بۆچی. لێ هەمی کەس نزانن بۆچی. هندەک دترسن بێژن. هندەک دزانن و باش ژی دزانن، لی خۆ تێناگەهینن بۆچی و هندەک ژی وێ پرسێ ژ بۆ بەرژەوەندیا خوە یا کەسی ئان سیاسی، بەروڤاژی راستیێ بکاردینن.
گۆتنەک هۆسا ژی هەیە دبێژن: “ئەگەر مری یێ مەلعون نەبیت، قەبر لێ تەنگ نابیت”.
ئەگەر پەکەکە ژی یا کوردینیێ با، باکورێ کوردستانێ گەلەکا بەرفرەھ و بەردڕیایە. یا ب شاخ و داخ، دۆل و نهال و ب دەشت و داروبارە، پێتڤی ب خەوهەرماندنا زارۆکێن باشووریان نە دکر!
هەلبەت، هندەک ب ناڤ چالاکڤان و رۆشبنبیر ژی هەنە، وەسا دزانن ئەگەر رەخنەک ل پارتیێ (پەدەكێ) گرت، ئێکسەر ئەو دێ د ناڤ خەلكی دا وەکی کەسێن رۆشنبیر و وەڵاتپارێز هێنە هەژماردن و پایێ وان دێ بڵند بیت و دێ بنە تشتەکێ دی.
ئەو دبێژن كو پارتی بارەگایێن ترکیێ ل باشوور دپارێزە. ئانکو پارتی ترکان ژ پەکەکێ دپارێزە و هندەک دەق و تێکستان ل ڤێرە و وێرێ ڤەدگوهێزن و ناڤێ خودانان ژی ل سەر نانڤیسن.
پەکەکە دبیژە: ئەم ل باشوورین دا ترکیێ راکێشینە ڤێرە و دێ ڤێرێ ل وان کەینە ڤێتنام و دێ حەیفا دیرۆکێ ل ترکان هەلینین و دێ وان کەتومات کەین و دێ بۆ تەتەرستانێ ڤەگەرینین.
سەرۆکێ پەکەکە، ئەڤدلا ئۆجەلان، گۆت، ئارمانجا مە تێکدان و نەهێلانا هەبوونا (کیانێ) باشوورە. باشە!
پاشی ئەو ژ سوریێ ھاتە دەرخستن و ب رێیەکا دوور و درێژ خوە گەهاندە کینیا و ل وێرێ ژی دەمانجا وی شول نەکر و ڤەگەراند ئەنقەرەیێ و گۆت “ئەز ئامادەمە خزمەتێ بکەم و دایکا من ژی تورکە”. لی ئارمانج تشتەکێ دی بوو. .نوکە ژی دبێژیت، هەما جهێ من یێ خوەشە و دێ ل ڤێرە بم
باشە، ئەم بێژین ل باشوور پارتی دكەڤە پێش لەشکەرێ ترکیێ و بنگەهێن وان دپارێزە!
ما گەلو، پارتی ل باکور ژی هەیە؟ ئانکو پێشمەرگە یێن پارتیێ چۆنە باكورێ كوردستانێ، ھەتا ل دێرسم، باتمان، مێردین، جزیر، وان و هەکاری
مل ب ملێ جەندرمان ل دژی پەکەکێ شەر کربیت و ئەو ل وێرێ هەلقاند بن و بەرەڤ زنارێ کێستە، گارە، قەندیل ڤە .. .. و .. کربن؟
گەلو، پارتی ل عەفرین، سەرێ کانیێ، گرێسپی .. و .. کەتنە پێشیا جەندرمان، پەکەکە ل ویرێ هاژوتبە باشوور؟
گەلو، بۆچی پەکەکە نەوێریت ل سنوورێ ئیرانێ گوللەیەکێ بەرەڤ بنگەهەکێ ترکان ڤە بپەقینیت؟
گەلو، بۆچی، ل سنوورێ ئێکەتیێ (یەنەكە)، ئوتومبیلێن وان دبنە نێچیرا درونێن ترکان؟
هەما کورت و کورمانج، پەکەکە، پرۆژەیەکێ ترکیێ یە و ژ بۆ بەرژەوەندیا خوە بکاردینن. هەر جهەکێ تركیێ بڤێت، دێ پەکەکێ هنێرنە وێرێ، و ئەو ژی دێ پەکەکی کەنە هەجەت و دێ وی جهی داگیر كن.
گوتنەک هەیە دبێژن:
پەکەکە ل سوریێ شەبیحەیە.
ل ئیرانێ پازدارە
ل عیراقێ حەشدە
و ل ترکیێ ئەز نابێژم، بلا بۆ وان چاڵکڤانان بمینیت.
2021.05.24
