خوەش-باوەر
د. فازل عومەر
ئەم كورد دبێژین: مرۆڤ باوەر ژ دەڤی دكەت، ما دێ ژ كیدرێ باوەر كەت! وا دیارە كورد ژ مالا خودانی خوەش-باوەرن، پتر باوەر ژ دەڤی دكەن و كریار بۆ وان پاشی دھێن. ب گۆتنەكا دی؛ ل نك كوردان گۆتن جھگیرن و كریار بەرگوھۆڕن! لەو، كی چ بێژتە كوردان زوو باوەر دكەن، و ھیچ ئەگەر یان خەمەكا ئەو گۆتن درەو بت ناخون تاكو بار دھێتە سەر گوھێن گای و درەو ئاشكرا دبت.. ھینگێ ژی گەلەك درەنگە چارەیەك ل دەرەنجام و ڤەڕێژا باوەركرنا بێ بنەما بھێتەكرن. لەو، ژیانا مە ھەمی تراجیدیایە د ناڤ كۆمیدیایێ دا، ژ خوەشباوەریێ.
راستە ئەڤ دلپاكیا ئەز ژێ دبێژم ژ رەوشتەكێ خوداییێ بلندە، لێ دەگمەنە رەوشتێ ھەمی كۆمێن مرۆڤان بت، بەلكو بەرەڤاژ، فەند و فێل و خاپاندن و سێلماندن، پتر نێزیكی رەفتار و رەوشتێ بەربەلاڤە ل ناڤ مرۆڤان ژ دلپاكی و خوەشمرۆڤیێ.
ئەڤ خوەشباوەریا مە، سەرھاتیەكا ئەرەبی دئینتە بیرا من، دبت پچەكێ كرێت ژی بت لێ سەرھاتیە، سەرھاتی بۆ سەربۆرێ دھێنە ڤەگوھاستن نە بۆ لبەر پیڤانێ. ئەسەفەدی (الصفدی) د پرتووكا خوەیا مەزن دا (الوافي بالوفيات) دنڤیستێ
عومەرێ وەرراق گۆت: من ئەلعەتتابی دیت ل سەر رێكێ ل بەر دەرگەھێ شامێ نان دخوار.
من گۆتێ: كوڕۆ ما تو شەرم ناكەی؟ (شەرم ناكەی لسەر جادێ نانی دخوەی- ھینگێ شەرم بوو).
ئینا گۆت: ما ھەكەر تو د جھەكیڤە دگەل چێلان بی، تو شەرم دكەی ل پێشچاڤێن وان زادی بخوی؟
من گۆتێ: نەخێر.
گۆت: بێھنا خوە ل من فرەھ بكە تاكو بۆ تە دیاربكەم ئەو چێلن.
پاشی دەست ب ئەندەرزكرنێ كر و چیڕۆك ڤەگێڕان و لاڤ ژ خودای كرن تاكو خەلك لێ قڕژین، ئینا گۆتێ: ژ ئالیەكێ دیڤە بۆ مە ھاتیە گۆتن كو ئەوێ ئەزمانێ وی بگەھتە سەرێ دفنا وی ناچتە دۆژەھێ.
گۆت: ئێك نەما ئەزمانێ خوە نە دەراندی و بزاڤ نەكری كانێ دێ گەھینتێ یان نە.
گۆت: وەختێ خەلك ڤەڕەڤین ئەلعتتابی گۆت: ما من نەگۆتە تە چێلن!
خوەش باوەری تشتەكێ ھۆسا دئینتە سەرێ مرۆڤی، كەسەك دێ مرۆڤی كەتە چێل و وەختێ مرۆڤ دزانت، وەخت یێ بۆری و مرۆڤ یێ بوویە دەبەنگ و پێتڕانگ.. لەو، بلا ژ كریاران باوەر بكەین نە ژ دەڤی، بلا باوەریا مە لسەر بنەمایەكێ ھۆش و مەنتقی بت نە فلانی و بێھڤانی گۆت.
