سمکۆ ئامێدی چەوا شەهید بوو
دەما ئەم چوینە شکەفتا حسارا ڤە (دەڤەرا نهێلیا) هندەك نڤینکێن دریایی و بێسەروبەر بژاندبوونە نیڤا شکەفتێ.
شەهید سمکۆ ناهلیکەك راکر دو سێ جاران ل دیوارێ شکەفتێ دا و باش داقوتا هەم ژبەر تۆزێ هەم ژی ژبەر کێچا، راکر و دانا سەر وی تەختکێ داری ئەوێ ل هەمبەر دەرێ شکەفتێ. هزردکر ئەگەر ل سەر تەختی بنڤیت دێ ژ عەردی بلندتر بیت باشترە هەم بۆ کێچا و هەم ژی بۆ توزێ.
تەخت ژی نەیێ سەر نڤستنێ بوو، ئەز باوەر دکم چێکربوو دا نڤینا داننە سەر.
وەك پشکێن چوویی ژی من نڤیسی بوو هەر روژا مە دزانی دێ جهەکی ڤەچڤین شەڤا بەرێ ئەم دروونشتین مە کومبوونەکا سەرپێ دکر
پلان و نەخشەرێیا خوە یا وێ رۆژێ دەستنیشان دکر.
وێ شەڤێ مە بریار دا خشتا زێرەڤانییا خوە چێکەین و سپێدێ زوو بەری دنیا زەلال بیت ژ شکەفتێ دەرکەڤینە وان لاتێن سەری هنداڤ نهالێ خوە حەساردەین، چاڤدێریا وێ نهالێ بکەین گەر لڤینەك یان هاتن و چوونەك هاتە کرن دا مە ئاگەھ ژێهەبیت.
دیسا چاڤدێریا جادەیا سەرکی ئەوا د ناڤبەرا ئامێدیێ و دێرەلۆك دا بکەین و جهەکێ هاریکار دەستنیشان بکەین هەم بۆ ڤەدانا لافیتا هەم ژی بۆ دانانا بۆسێ ( کەمینێ ) بەر دوژمنی.
بێ گومان هندی ئەم بەرەڤ سلال چووباین دا پتر بالادەستبین ل سەر دەڤەرێ و کارین چاڤدێریا وان دەردوورا و جادەیا سەرەکی کەین .
مە خشتا زێرەڤانیێ چێکر نۆبەداریا دوماهیێ یا هەڤال ناجی بوو .
بریار ئەو بوو کو پشتی نۆبەداریا وی بداوی دهێت مە هشیار بکەت دا ژ شکەفتێ دەرکەڤین
وەك بریار هاتیە دان بەری دنیا رونبیت کاك ناجی ئەم هشیارکرین، گۆت هلون رابن بەلێ بۆ زانین بەری نیڤ دەمژمێرێ تاڤەکا بارانێ یا خوش یا باری، لێ باشە شانسێ مە یا راوەستیای نها دونیا یا خوەشە
شەهید سمکۆ گۆت: مادەم بەری بێهنەکێ باران باریبیت ئەم نکارین دەرکەڤین، چونکە بهارە عەردێ تەرە ئەم نەشێن رەەنینە خوارێ .
ئەگەر شپێڤە ژی ب مینین دێ لڤلڤین چێبیت ئەم یێ ل بەرابەری فەوجا ( برکا هینێ) و سەنگەرێ گوهەرزێ دێ مە بینن و دوورنینە بالەفرێن هەلیکۆپتەر بێن لەشکەری دانە ژ مە پێهەل، ئەم یێ دبنێ چیا مە دەلیڤا پاشکێشیێ ژی نینە، ئەز باوەر دکەم مانا مە د شکەفتێ ڤە ئەولەھترە هاتن و چوونا مە هەمبەر دوژمنی، ما دێ کی هێتە ڤی چولێ خودێ؟ کەسی چ کار ل .ڤێرێ نینە
مە هەرسێکا گۆتێ ئەم یێ د دەڤێ دوژمنی دا چێنابیت مینینە د شکەفتێ ڤە، هندی ئەم هەرسێ هاتینێ قائیل نەبوو ژ شکەفتێ دەرکەڤین
جەولا مە هەمیێ گەلەك یێ هشیار و پلانساز بوو هەمبەر دوژمنی.
هەردەم ئەوی شیرەت ل مە دکرن و ئەم فێری رێنمایێن خوەپاراستنێ دکرین.
مە هەرسێکا گەلەك هەولدا قائیلکەین کو ژ شکەفتێ دەرکەڤین، لێ هەولدانێن مە دبێ ئەنجام بوون.
دوماهیێ مانا شکەفتێ ڤە ب دلێ مە نەبوو لێ مە دیتن و بۆچوونێن وی بەرچاڤارا دەربازکرن.
پشتی ئەم ژێ بێهیڤی بوون مە گۆتێ مادەم هەر دێ د شکەفتێڤە مینین ل خالەك بلند هنداڤی گەلی زێرەڤانیێ بگرین، ئەگەر هاتن و چوونەك ل ڤارا هاتە کرن دا مە ئاگەھ ژێ هەبیت و خوە بپارێزین.
گۆت دەما ئەم زێرەڤانیێ دگرین دێ هێن و چین و ئێك دو گوهرین دێ هێینە ئاشکراکرن.
هەڤال ناجی پاسەوان بوو دگەل دا، دیسا نێزیکترین کەسێ باوەریپێکەرێ وی بوو ، لەوما وێ جەولێ هەمیێ ئەو هەلبژارت بوو دا هەردەم دگەلدابیت.
ئەم ئەو هەر دو یێن دی ژی، هەم کەڤنەهەڤال و هەم جهێ باوەریا وی بوون.
ناجی گۆتێ: کاك سمکۆ ئەز دێ چمە جهەکی بلند تا دنیا تاری دبیت دێ مینمە ل وێرێ بلا کەس نە هێتە جهێ من دا هاتن و چوون چێنەبیت
هەمی جارا قائیل نەبوو. مە د گۆت شەڤا دوماهیێیە ئەم یێ د دەڤێ دوژمنی دا مە نەدخواست دیتن و بۆچوونێن ئێکودوو رەدکەین .
هەم جهەك هەستیار بوو هەم ژی ئەم د رەوشەکا نازك ئالوز دابوون
مە چو هەلبژارتنێن دی نەبوون ئەم ماینە د شکەفتێڤە بێ زێرەڤانی.
دەما هندەک جار دناڤ شکەفتێ ژی مە هاتن چوون دکر ب دلێ وی نەبوو.
بەرێ سیھ و چار سالا روژاکا وەکێ ئەڤرو ۱۹٨۹/٤/۱٠ دەمژمێر دەھ و بیست خولەکێن سپێدێ.
سمکۆ ل سەر تەختێ خوە یێ رازایی بوو پشتا تەختی شکەفت پێچەك یا دناڤەچووی بوو قەمسەلەکێ مغاویرا دبەربوو ئێخستبوو دانابوووێرێ و کەلاشنیکۆفا خوە یا کوبی ژی دانابوو سەر. پال کێلەکا وی بوو
دەما مروڤ دچیتە شکەفتێ ڤە ئالیێ دەستێ چەپێ شکەفت درێژ دبیت. من و ناجی و دیندار هندەك نڤینکێت بێ سەر و بەر رایێخستن مە هەرسێکا خوە ل سەر درێژ کر.
سمکۆ یێ ل بەرانبەر دەرێ شکەفتێ.
بەری هنگی بەر دەرگەهێ شکەفتی چەند میترەکێن چارگۆشە هاتبوونە دەشتکرن دەما سەقایێ دنیایێ یێ خوەش با لێدروەدنشتن و وەرزێ هاڤینێ ژی لێدنڤستن .
شەڤێ بارن باری بوو بەلێ روژێ ببوو ساهی پنیەکا عەڤری ل عەسمانی نەبوو.
جەحشەک ب ناڤێ ف.ب یێ دەڤەرا
لێ مخابن مەزن دبێژن : چو گەنمێت بێ زیوان نینن.
ژ ئالیێ گوهەرزڤە یێ ل وی گەلی سەرکەفتی ئەڤجا کا هاتیە نێچیرێ یان ژی کەلەپووری .
سەدێ سەد نەزانیە ئەم ل وێرێنە گەر ئەو بتنێ نەدهات
بەرف شکەفتێ هاتبوو، بەلێ وەسا دیاربوو ب ترس یێ هاتی کەلاشنیکۆفا خوە فیشەك بریە بەر یێ ئێخستیە سەر سەلیێ.
دوو و سێ میتران یێ نێزیکی دەرێ شکەفتێ بوو .
ئەم هەمی د هشیاربوون جەولامە هەمیێ شەهید سمکۆ دەفتەرەك و قەلەمەك د بەریکێ دابوون هەلبەست دنڤیسین.
هندەکا جارا دەما یێ رازایی ژی گەر برگەکا هەلبەستێ هاتبا بیرێ دارابیت قەلەم و دەفتەرێ ژ بەرێکا خوە ئینیتە دەرێ بەرچەقماقێ (ماکینا گوریێ ) یان بەر ئەلەمتریکێ، گەر جهێ نەسەقامگربا تاریێ دا دا نڤیسیت و جارەکادی دا رازێتەڤە .
هەردەما هەلبەستا وی ب داوی دهات
دەمەکێ گونجاودا دا بێژیت کا وەرن دا مە هەمیا کوم کەت مورالەکێ بەرز و ب دەنگەکێ بلند بۆ مە خونیت.
دا بێژیت یا چاوایە ؟.
هەوە چ تێبینی سەر هەنە ؟.
هەمی ژی سەر شۆرەشگێریێ و وەلاتپارێزیێ و ستەم و زورداریا دوژمنی دنڤیسین.
دەما مرۆڤ د جهەكێ تاری ڤە بیت چو د ئۆدەکێ ڤە بیت یان د شکەفتەکێ ڤە ئێك بێتە نێزیکی دەرگەھی دڤێت ئەوێ ژور زووتر یێ دەرڤە ببینیت چونکە ژور یا تاریە دەرڤە رونە .
بەلێ وەسا دیاربوو شەهید سمۆ د هزرو بیران دا نقوم ببوو .بەرێ وی نەمابوو دەرێ شکەفتێ.
ئەو جەحشك یێ ل دولێ سەرکەتی دو سێ میتران یێ هاتیە نێزیکی دەرێ شکەفتێ چاڤێ وی یێ ب شەهید سمکۆ کەتی و تڤەنگا خوە یا راستکریە سینگێ وی .
دەما چاڤێن سمکۆ ڤێکەتی لوولیا تڤەنگێ یێ یا ل هەمبەر سینگێ وی، چ لیڤین ژێ نەدهات.
ئەم هەرسێکێت دی یێن دوماهیا شکەفتێ پشتا بەرێ گەر، مە ئاگەھ چ نینە و بەر دەرگەهێ شکەفتێ نا بینین
دەما ئەم ژورڤە دئاحفتین هێدی بخلوەیڤە ئەم دگەلێك دئاخفتیت.
من هند گولێبوو سمکۆ ب دەنگەکێ بلند گۆت : نە- نە – نە – ئەز پسمامێ تە مە .
هێشا ئاخفتنا وی تەمام نەبووی سەلیەك بەردا سینگێ وی دگەل سەلیێ مە گولێبوو وی جەحشکی ب توڕییڤە گۆت: تو پسمامێ منی .
ئێکسەر دگەل سەلیێ سەرتەختی کەفتە خوار گۆت ئێك نیك من ب مینن. مخابن ئەو ئاختنا وی یاداویێ بوو من گولێبوو، هێشا سەرێ من دەرنەکەتیە
خەباتا پارتیزانیێ/پشکا ١٠٢
ژ بیرەوەریێن/ بازید نووهات
