سه‌رۆک نێچیرڤان بارزانی یەکەمێن ئیسال خەلات دکە
سه‌رۆک نێچیرڤان بارزانی دێ سکۆلەرشیپ بده خوه‌نده‌کارێن لیسه‌یێ یێن یه‌که‌م، دویه‌م و سێیه‌م یێن ئیسال
برێز نێچیرڤان بارزانی سه‌رۆکێ هه‌رێما کوردستانێ، رۆژا دوشه‌مێ ٢٠٢٣/٧/١٠ێ ل باژارێ هه‌ولێرێ، پێشوازیا ده‌رچوویێن لیسه‌یێ یێن یه‌که‌م، دویه‌م و سێیه‌م ل سه‌ر ئاستا هه‌رێما کوردستانێ و دەیک و باب و که‌سووکارێن وان کر.
د دیداره‌کێ دا کو، وه‌زیرێ په‌روه‌رده‌یێ یێ حکومه‌تا هه‌رێما کوردستانێ و هژماره‌که به‌رپرسێن وه‌زاره‌تێ تێ دا ئاماده بوون، سه‌رۆک نێچیرڤان بارزانی گۆتاره‌ک پێشکێش کر و ب گه‌رمی پیرۆزباهی ل ده‌رچوویان کر و هێڤیا سه‌رکه‌فتنێ ژ بۆ وان خوه‌ست.
سه‌رۆک نێچیرڤان بارزانی دوپات کر کو، مالبات و که‌سووکارێن وان و هه‌رێما کوردستانێ ب گشتی شانازیێ ب وان دکه و ئه‌و دلره‌حه‌ت کرن کو سکۆلەرشیپ ژ بۆ هه‌موو ده‌رچوویێن یه‌که‌م، دویه‌م و سێیه‌م یێن لسه‌یێ یێن ئیسال دابین دکه داکو، ل زانینگه‌هێن ناڤخوه و ده‌رڤه به‌رده‌وامیێ ب خواندنا خوه بدن و ژ بۆنا ڤێ یه‌کێ ژی وه‌زیرێ په‌روه‌رده‌یێ یێ حکومه‌تا هه‌رێما کوردستانێ ژ بۆ تەدبیرێن پێویست ئه‌رکدار کر
سه‌رۆک نێچیرڤان بارزانی سپاسی و پیرۆزباهی ل مالباتێن ده‌رچوویان، مامۆستایان، وه‌زیرێ په‌روه‌رده‌یێ و ستافێ وه‌زاره‌تێ کر و ئه‌و وه‌ک به‌شه‌ک ژ وێ سه‌رکه‌فتنێ دازانین و ته‌که‌ز ل سه‌ر وێ یه‌کێ کر کو ده‌رچوویێن لیسه‌یێ د وێ ئاستا بلند دا سه‌رکرده‌یێن پاشه‌رۆژێ یێن وه‌لاتن و دکارن خزمه‌تا گه‌ل و وه‌لاتێ خوه بکن.
ژ ئالیێ خوه ڤه، برێز ئالان حه‌مە سه‌عید وه‌زیرێ په‌روه‌رده‌یێ، ده‌رچوویان و مالباتێن وان سپاسیا سه‌رۆکێ هه‌رێما کوردستانێ کر کو ژ بۆ دابینکرنا سکۆلەرشیپ و پشتگری و ته‌شویقکرنا وان.
د جڤینێ دا چه‌ندین نێرین ل سه‌ر پرۆسه‌یا خوه‌ندنێ، پرسگرێکێن وێ ب گشتی، ده‌رفه‌تێن کار ژ بۆ ده‌رچوویێن زانینگه‌هان و چه‌ندین مژارێن دن ئێن گرێدایی پرۆسه‌یا په‌روه‌رده و خوه‌ندنێ هاتن پێشکێشکرن. .
سه‌رۆک نێچیرڤان بارزانی د ده‌ستپێکا ئاخاڤتنا خوه دا گۆت:
“هوون هه‌موو ب خێر هاتن. هوون ژ هه‌ر ده‌را کوردستانێ هاتبن، هوون ب خێر هاتن سه‌رچاڤان. ئه‌ز دخوازم پیرۆزباهیه‌کا گه‌رم ل وه هه‌موویان بکم. هێڤیدارم کو هوون سه‌رفه‌راز و سه‌رکه‌فتی بن. وه قۆناغه‌کا پر گرنگ یا ژیانا خوه ب سه‌رکه‌تی قه‌داند، ئه‌ز هێڤی دکم هوون قۆناغێن دن یێن خوه‌ندنا خوه، وه‌که نها، ب سه‌رکه‌تی و به‌خته‌وەری تمام بکن.”
سه‌رۆک نێچیرڤان بارزانی، هه‌روەسا، رۆلا مالباتێن ده‌رچوویان بلند نرخاند و گۆت: “بێی پشته‌ڤانیا مالبات، دەیک و باب و خزمێن وه، ئه‌ز باوه‌رم ئیرۆ وه نکاریبوو ڤێ سه‌رکه‌فتنێ ب ده‌ست بخستا. پیرۆزباهیێ، ده‌ستخوه‌شیێ و ب گه‌رمی سپاسیا مالباتێن وه دکم و هێڤیدارم ئه‌و ژی سه‌رفه‌راز و سه‌رکه‌فتی بن.”
هه‌ر وها ژ ده‌رچوویان را گۆت: “وه د ڤێ قۆناغێ دا کو، وه ب جی هێلا و که‌تن د قۆناغه‌کا نوو یا خوه‌ندنێ دا، وه گه‌له‌ک ئێش کشاندیه ژ بۆ بده‌ستخستنا ڤێ یه‌کێ، ئه‌م ب راستی شانازیێ ب وه دکن، ئیرۆ کوردستانێ پێویستی ب وه هه‌یه. قۆناغا ئیرۆ یا کوردستان تێدایه پێویستی ب وه هه‌یه کو هوون خوه ب چه‌کێ قه‌له‌می و چه‌کێ زانینێ چه‌کدار بکن.”
سه‌رۆکێ هه‌رێما کوردستانێ د به‌رده‌وامیا ئاخاڤتنا خوه دا گۆت: “هوون پاشه‌رۆژا ڤی وه‌لاتی نه، پاشه‌رۆژا ڤی وه‌لاتی د ده‌ستێ وه دایه. یا کو جهێ کێفخوه‌شیێ یه ده‌ما هوون هاتن هوندر من دیت کو، گه‌له‌ک ژن و که‌چ د ناڤ سه‌رکه‌تیان دا هه‌نه، ئه‌ڤ ژی جهێ شانازیێ یه. پاشه‌رۆژا ڤی مله‌تی د ده‌ستێ وه دایه و پاشه‌رۆژا ڤی مله‌تی د ڤێ قۆناغێ دا زانست، خوه‌ندن و خوه‌په‌روه‌رده‌کرنه دا کو ئه‌م ژی خوه بگهینن کاروانێ وه‌لاتێن پێشکه‌تی. ڤی ئالایی هلگرن و کوردستانێ سه‌ربلند بکن، به‌ر ب پێش ڤه و به‌ر ب قۆناغه‌کا نوو ببن و پاشه‌رۆژ یا وه یه.”
سه‌رۆک نێچیرڤان بارزانی سپاسیا وه‌زاره‌ت و ستافێ وه‌زاره‌تێ کر و گۆت: “ئه‌ز سپاسیا جه‌نبێ وه‌زیر، جیگرێ وه‌زیر و هه‌موو که‌سێن کو دگه‌ل وه کار و خه‌بات کرنه، دکم، لێ ب تایبه‌تی سپاسیا مامۆستایێن وه دکم. ل ڤر دخوازم ده‌نگێ خوه بگەهینم وان و سپاسیا وان بکم و ژ وان را دبێژم کو ئه‌م سپاسیا هه‌ولێن وه دکن، ئه‌م سپاسیا وه دکن کو وه چو جاری رێ نه‌دا پرۆسه‌یا خوه‌ندنێ ل کوردستانێ بێ راوه‌ستاندن و هوون به‌رده‌وام بوون.
د داویێ دا، سه‌رۆک نێچیرڤان بارزانی، ژ ده‌رچوویان را گۆت: “پشتراست بن کو هوون جهێ شانازیێ نه ژ بۆ کوردستانێ ب هه‌موو پێکهاته‌یێن وێ ڤه، ئه‌ڤ ئه‌مانه‌ت د ده‌ستێ وه دایه و ب هه‌موو هێز و شیانا خوه ڤه ڤێ ئه‌مانه‌تێ وه‌ربگرن و به‌ر ب پێش ڤه ببن. ئه‌ز هێڤیدارم ته‌مه‌ن درێژ دبن و د ژیانا خوه سه‌رکه‌فتی دبن، جاره‌که دن ب خێر بێن”
