ئاکەپ وه‌ک دارا پاهیزێ په‌لێن خوه‌ دوه‌شینه‌

ئاک پارتیێ د ده‌ربارێ سه‌رۆکوه‌زیرێ به‌رێ ئەحمەد داڤوتۆگلو هه‌ولدا بریارا ژ پارتیێ دوورخستنێ بده‌. لێ داڤوتۆگلو نه‌ما هێڤیا بریارا ده‌زگه‌هێ دسیپلینێ یێ ئاکەپێ و د پرەسكونفەرەنسەكێ دا ژ ئاکپێ ئیستفا کر. داڤوتۆگلو دا خوویاکرن کو، چ که‌س نکاره‌ وان دووربێخه‌ ئه‌و ب خوه‌ دچن. د هه‌مان جڤینێ دا داڤوتۆگلو دا خوویاکرن کو ئه‌وێ ده‌ست ب ئاڤاکرنا ته‌ڤگه‌ره‌ک نوو بکن.

پشتی دەستژكاركێشانا داڤوتۆگلو گه‌له‌ک سیاسه‌تمه‌دارێن کو د ناڤا ئاکەپێ دا به‌رپرسیاری و پارله‌مه‌نته‌ری کرین ژ بۆ هه‌ڤالبه‌ندیا داڤوتۆگلو ژ پارتیا خوه‌ ئیستفا کرن. ڕۆژ ب ڕۆژ هژمارا که‌سێن کو ژ ئاکەپێ ڤه‌دقه‌تن گه‌له‌کتر دبه‌. بێ گومان یێن ژ ئاکەپێ ئیستفا دکن هه‌موو ژ بۆ ئاڤاکرنا پارتیه‌ک نوو ل گه‌ل داڤوتۆگلو ته‌ڤدگه‌رن.

ژ ئالیه‌ک دن جاردن ب پشتگریا سه‌رۆککۆمارێ به‌رێ عەبدولا گول ، وه‌زیرێ به‌رێ عەلی باباجان ژی دا خوویاکرن کو دێ د ناڤا 3 مه‌هان دا پارتیه‌کێ دامه‌زرینن.

ئه‌ڤ هه‌موو ژ ئاکەپێ ڤه‌دکشن و پێڤاژۆیه‌ک نوو ددن پێشیا ئاکەپێ. ئه‌و که‌سایه‌تیێن کو ئه‌ردۆگان ل گه‌ل وان ئاکەپ دامزراندی و ده‌مه‌ک درێژ د گه‌ل وان سیه‌سه‌ت کری، یه‌ک ب یه‌ک دچن ب گۆتنه‌ک دن ئاکەپ وه‌ک دارا پاهیزێ په‌لێن خوه‌ دوه‌شینه‌.

ئه‌ڤ ڕه‌وشا ئاکپێ، ترکیه‌ به‌ر ب پێڤاژۆیه‌ک نوو ڤه‌ دبه‌. ئیحتماله‌ک مه‌زن ب هلبژارتنه‌کێ دا ده‌ستهلات تێ گوهه‌رتن.

پشتی سیسته‌ما ڕێڤه‌به‌ریا ترکیێ هات گوهه‌رتن و سیسته‌ما سه‌رۆککۆماریێ د ده‌وسا سیسته‌ما به‌رێ دا هاته‌ دانین، ئه‌ردۆگان و پارتیا وی ژی به‌ر بگوهه‌رتنه‌کێ ڤه‌ چوون. ئه‌ردۆگان ژ ده‌زگه‌هان پتر وه‌ک سه‌رۆکه‌ک ب ته‌نێ ته‌ڤگه‌ریا، ژ پارتیێ پترگرینگی دا مالباتیێ و هنده‌ک که‌سێن کو نه‌ سه‌رکه‌فتی کرن خوه‌دی ئه‌رک و ڕێڤه‌به‌ری ڕاده‌ستی وان کر.

گروپه‌ک تایبه‌ت د ناڤا ئاکەپێ دا په‌یدا بووو ئه‌ردۆگان وه‌ک “ڕه‌ئیس” ب ناڤ کرن. ته‌نێ وه‌سفێن ئه‌ردۆگان دان، گه‌له‌ک که‌سایه‌تیێن بکاربن ئه‌ردۆگان ڕه‌خنه‌ بکن کرن ئارمانجا ئێریشێن خوه‌ یێن نه‌ ڕاست. مه‌دیا ئاکەپێ د ده‌ستێ وان دا بوو . ئه‌و ته‌نێ ژ بۆ دلێ ئه‌ردۆگان خوه‌ش بکن داخێڤن و دژاتیا خه‌لکه‌ک دن دکن. ڕۆلێ ڤێ گوروپێ د پاشکه‌تنا ئاکەپێ دا به‌ربشاڤ ده‌رکه‌ت هۆلێ.

ژ ئالیه‌ک دن ڤه‌ هه‌ڤکاریا ئاکەپێ د گه‌ل پارتیه‌ک وه‌ک مەهەپێ، ئه‌ردۆگان ژ لیبه‌رالیزمێ دوور خست و به‌ر ب قه‌ومیه‌تبوونێ ڤه‌ بر. پرانیا جهان دا سیاسه‌تا مەهەپێ هاته‌ ڕێڤه‌برن. ب ئاوایه‌ک دن مەهەپە هێدی هێدی سه‌رێ ئاکەپێ و ئه‌ردۆگان دخوه‌.

ڕێیه‌ک ته‌نێ هه‌یه‌ کو ئیحتمالە ئاکەپێ ژ ڤێ تێکچوونێ خلاس بكه‌ ئەو ژی؛ ئه‌گه‌ر ئاکەپ ل خوه‌ ڤه‌گه‌ره‌، خه‌له‌تیێن کو تێنه‌ کرن ببینه‌ و د ناڤا خوه‌ دا جاردن ئاشتیه‌کێ په‌یدا بکه‌ و ئه‌ردۆگان گۆتارێن خوه‌ یێن قه‌ومی بگوهه‌رە. لێ دخوه‌یێ پێڤاژۆیا کو ئاکەپە که‌تیێ زه‌حمه‌ته‌ کو شوونڤه‌ ڤه‌گه‌ره‌.

نوها پرسا هه‌ری مه‌زن ئه‌وه‌ کو به‌دیلێ ئاکەپێ ل ترکیێ کی یه‌؟ یان دێ جەهەپە و هه‌ڤالبه‌ندێن وێ بن، یان ئه‌ڤ هه‌ردو پارتیێن کو تێن ئاڤاکرن ل گه‌ل جەهەپێ و ئالیێن دن ب هه‌ڤکاریه‌کێ په‌یدا بکن دا کو ببن به‌دیل. یان ژی جاردن هنده‌ک ژ ڤان ئالیان د گه‌ل ئاکەپێ دمینه‌ ده‌ستهلاتێ دا.
ئه‌ڤ پرس گه‌له‌ک جهێ گۆتوبێژه‌ک زانیاریه‌. لێ ڕه‌وشا ترکیێ ژی ڕۆژانه‌ دکاره‌ بێ گوهه‌رتن، ژ به‌ر کو ئیستیقرارا سیاسی نه‌ ب هێزه‌.

2019.09.14

نێرین / شیرۆڤە