بارزانی: سه‌رکه‌فتنا پارتی ئانکو سه‌رکه‌فتنا پره‌نسیپێن خه‌باتا گه‌لێ کورد

سه‌رۆک بارزانی د په‌یاما خوه‌ دا دبێژه‌: پێویسته‌ ئه‌ڤ سه‌رکه‌فتنا پارتی (پەدەکە) ببه‌ ئەگەرێ وێ یه‌کێ کو به‌رپرس، کادر و ئه‌ندامێن پارتی زێده‌تر خزمه‌تا خه‌لکێ بکن و هه‌رده‌م ئه‌و شیره‌تا ب نرخا بارزانی ل بیرا وان به‌: “ب سه‌رکه‌فتنێ مه‌غروور نه‌بن و ب شکه‌ستنێ ژی بێهێڤی نه‌بن”.

ب هه‌لکه‌فتنا سه‌رکه‌فتنا پرۆسه‌سا هلبژارتنا په‌رله‌مه‌نتۆیا ئیراقێ و سه‌رکه‌فتنا پارتیا ده‌مۆکراتا کوردستانێ، سه‌رۆک مه‌سعود بارزانێ د په‌یامه‌کێ دا پیرۆزباهیێ ل گه‌لێ کوردستانێ، ئه‌ندام و ئالیگرێن پەدەکێ دکه‌.

سه‌رۆک بارزانی دبێژه‌ کو سه‌رکه‌فتنا پەدەکێ ب واته‌یا سه‌رکه‌فتنا پره‌نسیپ، بوها و بنگه‌هێن خه‌باتا گه‌لێ کورد ل سه‌ر هاتیه‌ ئاڤاکرن.

ب ناڤێ خوه‌دایێ مه‌زن و دلۆڤان

ب هه‌لکه‌فتا سه‌رکه‌فتنا پرۆسه‌یا هلبژارتنا ئه‌نجوومه‌نا نوونه‌رێن ئیراقێ و سه‌رکه‌فتنا پارتیا ده‌مۆکراتا کوردستانێ د ڤان هلبژارتنان دا، ئه‌ز پیرۆزباهیێ ل گه‌لێ کوردستانێ دکم. پیرۆزباهیێ ل کادر،  ئه‌ندام و ئالیگرێن پارتی (پەدەکێ) دکم کو کارین د کێبرکێیه‌کا‌ مه‌ده‌نی و ئارام دا سه‌رکه‌فتنه‌کا‌ مه‌زن ژ بۆ پارتی و ڕێبازا وێ مسۆگه‌ر بکن و ڕوحێ شه‌هیدان به‌خته‌وه‌ر بکن.

 سه‌رکه‌فتنا پارتی د ڤان هلبژارتنان دا ب واته‌یا سه‌رکه‌فتنا پره‌نسیب و بوها و وان بنگه‌هانه‌ یێن کو خه‌باتا گه‌لێ کوردستانێ ل سه‌ر ھاتیە ئاڤا كرن‌ و په‌یامه‌که‌ ژ بۆ هه‌موو ئالیه‌کی کو گه‌لێ کوردستانێ د چو ڕه‌وشه‌کێ دا ده‌ستبه‌رداری دیرۆک و بوهایێن وێ نابە.

 پێویسته‌ ئه‌ڤ سه‌رکه‌فتنا پارتی ببه‌ ئەگەرێ وێ یه‌کێ کو به‌رپرس، کادر و ئه‌ندامێن پارتی زێده‌تر خزمه‌تا خه‌لکێ بکن و هه‌رده‌م ئه‌و شیره‌تا ب نرخا بارزانی ل بیرا وان  به‌: “ب سه‌رکه‌فتنێ مه‌غروور نه‌بن و ب شکه‌ستنێ ژی بێهێڤی نه‌بن”.

هه‌ر ب ڤێ هه‌لکه‌فتێ، ئه‌ز سپاسییا کۆمیسیۆنا بلندا هلبژارتنێ و ده‌زگه‌هێن ئه‌منی و هه‌موو ئالیێن په‌یوه‌ندیدارێن هه‌رێما کوردستان و ئیراقا فه‌ده‌رال دکم کو ب شه‌ڤ و ڕۆژ کارکرن و که‌دا وان هه‌بوویه‌ ژ بۆ سه‌رکه‌فتنا پرۆسه‌یا هلبژارتنا ئه‌نجوومه‌نا نوونه‌رێن ئراقێ و ده‌ستخوه‌شیێ ل وان دکم. هه‌ر وها ڕۆلا برێز سه‌رۆکوه‌زیر مسته‌فا کازمی د ئه‌نجامدانا هلبژارتنان دا بلند دنرخینین.

سه‌رکه‌فتنا پرۆسه‌یا هلبژارتنێ سه‌رکه‌فتنا ئیراده‌یا گه‌ل و سه‌رکه‌فتنا ده‌مۆکراسیێ یه‌. هه‌ر ژ بۆ ڤێ یه‌کێ ژی هێڤیدارم پشتی ڤان هلبژارتنان ئالیێن کوردستانی یه‌کرێز و ته‌مامکارێ هه‌ڤدوو بن. هێڤیدارم هه‌موو ئالی ب پێکڤه‌ و ژ بۆ یه‌ک ئارمانجا هه‌ڤبه‌ش و ژ بۆنا به‌رژه‌وه‌ندیێن بلندێن کوردستانێ و به‌رگریکرنا ژ ماف و ده‌ستکه‌فتێن گه‌لێ کوردستانێ کار بکن و ل سه‌ر بنگه‌ها هه‌ڤبه‌شیا ڕاسته‌قینه‌ په‌یوه‌ندیێن هه‌رێما کوردستان و ئیراقا فه‌ده‌رال بنیات بینن.

جاره‌که‌ دن سپاس ژ بۆ گه‌لێ کوردستانێ و سپاسیه‌ک تایبه‌تی ژی ژ بۆ خووشک و برایێن خوه‌راگر و خوه‌دی بیر و باوه‌ر ل که‌رکووکا دلێ کوردستانێ.

مه‌سعود بارزانی

2021.10.11

نێرین / شیرۆڤە