مەترسیێن هەلبژارتنێن پێشوەخت

 د. جمعه عەباس بەندي

مرۆڤ دكارە مەترسیێن هەلبژارتنێن پێشوەخت ل عیراقێ ل سەر هەرێما کوردستانێ و بارودوخێ ئەمنی یێ  عیراقێ ب كورتی د ڤان خالێن ل ژێر دا كۆم بكە:

1- ململانا ناڤخوە و ب تایبەتی ململانا گروپێن چەکدار دگەل دەزگەهێن دەولەتێ خالەکا بهێزە بۆ لاوازکرنا رەوشا ناڤخوەیا عیراقێ.

2- نێزیکبوونا هەلبژارتنێن ئیرانێ و ململانا وێ دگەل ئەمریکایێ د گۆرەپانا عیراقێ دا داكو مایتێکرنێن ئەمریکایێ ل سەر ناڤخوەیا ئیرانێ کێم بکەن و باشترین بەلگە بو ڤێ ئێکێ ژی هێرشێن هاتینە کرن برێکا (درونا)  ل سەر بنگەهێ (عەین ئەسەد) ل پارێزگەها ئەنبارێ.

3- دوبەرەکیا د ناڤبەر دەزگەهێ سی ئای یێ و هەوالگێرا بنتاگونێ ل دور چەوانیا رافتارکرنێ دگەل ئیرانی و بادەکێ ئەتومی و رێپێدانێ بو ئیسرائیلێ دناڤخوەیا ئیرانێ دا و تایبەت هەلبژارتنێن سەروکاتیا ئیرانێ دا.

4- گروپێن حەشدا شەعبی یێن بوینە بەدیل بو هێزێن رەسمی یێن دەولەتا عیراقێ، و پتریا پارتیێن شیعی ژی هوسا حەسدکەن، چنکو هەکە ئەو نەبان چ هێزێن دی نەدشیان بو وان کەرکوکێ و دەڤەرێن دی کونترول بکەن، لەورا دێ بێژین: ئەو هێز و پەرلەمانتارێن کورد ئەوێن دەنگ دایە ڤێ بیاساییكرنا حەشدا شەعبی دگونەهکارن و ل پاشەروژێ دێ بشێوەیەکێ باش تاما ڤێ تاوانێ زانن.

5- ململانا ناڤدەولەتی و تایبەت د ناڤبەرا ئەمریکایێ و ناتویێ دا ژلایەکی ڤە و روسیایێ ژ لایێ دی ڤە، و بزاڤێن روسیا كو  عیراق ب رەوشا سوریێ ڤە بێتە گرێدان ب هاریکاریا ئیرانێ، و حەزا هندەک لایەنێن عیراقی بۆ کرینا فروکە   سیخو 35 و لادانا سیستەمێ فروکێن ئێف 16یێن ئەمریكایی یێن.

6- مایتێکرنا دەولەتێن ئەقلیمی د كاروبارێن ناڤخوەیی عیراقێ دا و باشترین نموونە ژی تورکیا و ئیران و وەلاتێن کەنداڤی و هەر ئێک بۆ بەرژەوەندیەکا تایبەت.

7- هەلبژارتنێن پێشوەخت یێن چڤاتا نوینەرێن عیراقێ ئەوژی بویە ئەگەرەک بو تێکدانا رەوشا ئەمنی ل عیراقێ.

تێبینیەک بۆ سەرکردایەتیا کوردستانی:

هەلبژاتنێن پێشوەختێن چڤاتا نوینەرێن عیراقا فیدرال ئەوێن لبەرە هەیڤا دەها (10) ئەڤ سالە بێنەکرن دێ کارتێکرنەکا (سەلبی) هەبیت ل سەر رەوشا کوردستانێ و تایبەت ژلایێ ئابوری و دارایی ڤە، چنکو ئەڤە چەند هەیڤچون و هێشا رێکەڤتنا خالێن بودجا ئەڤ سالە نەهاتیە جێبەجێکرن د ناڤبەرا هەرێمێ و بەغدایێ دا، و هەردەمێ هەلبژارتنێن پێشوەخت هاتنەکرن وی دەمی حکومەتا بەرێز (مستەفا کازمی) دێ بیتە حکومەتەکا کاربرێکەر (تصریف الاعمال) هەتا حکومەتەکا نوی بێتە پێکهینان بۆ بەغدایێ.

ژ بو ڤێ چەندێ ژی لایەنێن عیراقی بکێمی پێدڤی ب شەش (6) هەیڤێن دیە هەتا بشێن بگەهنە ڕێکەڤتنێ و ب ڤی ئاوایی سالا 2023 ژی دێ هێت و چیت و دەولەتا عیراقێ چ بودجە نابن.

ب گۆتنەكا دی: هەرێما کوردستانێ دێ مینتە د ڤێ رەوشا هەیی دا و بێ گومان دێ رەوشا وێ یا سیاسی و ئابوری و دارایی ئالوزتر لێهێت و ئەڤ چەندە ژی دێ بیتە مەترسیاکا دی ل سەر هەبوونا قەوارێ هەرێما کوردستانێ.

 د. جمعه عەباس بەندي

2021.06.15

 دهۆک

نێرین / شیرۆڤە