وه‌ک کورده‌کێ باکوری داخوازه‌ک من ژ  نێچیرڤان بارزانی

نێچیرڤان بارزانی د ۱۰ێ حه‌زیرانا ۲۰۱۹ئ دا ژبۆ سه‌رۆکاتیا هه‌رێما کودستانێ سووند خواربوو و ده‌ست ب کار کربوو.

سالا یه‌که‌مین ئا سه‌رۆکاتیا وی قه‌دییا و سالا دویه‌م ده‌ست پێ کر.

ب ڤێ هه‌لکه‌ڤتێ ڕووداو ل سێ پارچه‌یێن کوردستانێ، ل ڕۆژاڤا، باکور و باشوور، ژ کوردستانیان دپرسه‌، کو سه‌رۆکاتیا نێچیرڤان بارزانی چاوا دنرخینن و د سالا دویه‌م دا داخوازێن وان ژ سه‌رۆکێ هه‌رێما کوردستانێ چ و چنه‌؟

کوردێن ژ ئامه‌دێ، د وارێ دیپلۆماسییێ دا نێچیرڤان بارزانی سه‌رکه‌فتی دبینن، ئالیکاریا وی یا ژبۆ ڕۆژاڤایێ کوردستانێ باش دنرخینن و دبێژن؛ „بلا نێچیرڤان بارزانی هه‌ڤکارییا مه‌ ژی بکه‌.“

کوردێن ژ قامشلۆ، هه‌لوه‌ستا نێچیرڤان بارزانی یا ژبۆ پشته‌ڤانیا نێزیکبوون و تێکلییێن ئالیێن کورد و ڕاکرنا ئاسته‌نگیێن ل به‌ر ڕۆژاڤایێ كورستانێ وه‌ک هه‌لوه‌سته‌کا‌ گرنگ دبینن و دبێژن: “ئه‌م هێڤیدارن، پشته‌ڤانیا کو وی ژبۆ مه‌ کر، دێ به‌رده‌وام به‌.“

کوردێن دهۆکێ، ب هێڤی نه‌ کو نێچیرڤان بارزانی ژبۆ چاره‌سه‌رکرنا کریزێن ناڤخوه‌ و باشکرنا ڕه‌وشا هه‌رێما کوردستانێ پتر هه‌ول بده‌ و پرسگرێکێن ناڤخوه‌یی چاره‌سه‌ر بکه‌.

کوردێن که‌رکووکێ، نێچیرڤان بارزانی که‌سایه‌ته‌کی نێزیکی هه‌موو ئالیان دبینن و دبێژن: “بلا ژبۆ که‌رکووکێ زێده‌تر ڕۆل وه‌ربگره‌ و پرسگرێکا که‌رکووکێ چاره‌سه‌ر بکه‌.“

کوردێن هه‌ولێرێ، سیاسه‌تا نێچیرڤان بارزانی یا ناڤخوه‌یی سیاسه‌ته‌ک پیڤاندار، ل ده‌رڤه‌ ژی بهێز دنرخینن و دبێژن: “بلا ڕکه‌به‌ریا د ناڤبه‌را پارتیا ده‌مۆکراتا کوردستانێ و یه‌کیتیا نشتیمانی یا کوردستانێ دا ھەیە‌، بدیماھیك بینه‌.“

کوردێن سلێمانیێ ژی نێچیرڤان بارزانی سیاسه‌تڤانه‌کێ ئه‌رکدار و پیڤاندار دنرخینن و دبێژن: “بلا ژبۆ یه‌کرێزیێ ڕۆلا خوه‌ بلیزه‌.“

کوردێن ژ هه‌ر سێ پارچه‌یێن کوردستانێ ژی، ژ سه‌رۆکاتییا نێچیرڤان بارزانی خوه‌دی هێڤی و داخوازن. جودابوونا هیڤی و داخوازێن وان ژی ژ پارچه‌بوونا کوردستانێ تێ.

بێگومان نێچیرڤان بارزانی ل هه‌ر چار پارچه‌یێن کوردستانێ ژی خوه‌دی ڕۆله‌کێ مه‌زنه‌. لێ به‌لێ ئه‌و سه‌رۆکێ هه‌رێما باشوورێ کوردستانێ یه‌ و سینۆرێ ئه‌رکدارییا وی ژی ئه‌و ده‌ره‌.

سه‌ده‌م ڤێ یه‌کێ یه‌، کو کوردێن باکور و ڕۆژاڤا ژ نێچیرڤان بارزانی داخوازا ئالیکاری و هه‌ڤکارییێ دکن.

کوردێن باشوور ژی ژ نێچیرڤان بارزانی داخواز دکن کو ئه‌و ڕۆلا ئه‌رکدارییا خوه‌ بینه‌ جھ. وه‌ک سه‌رۆکێ هه‌رێمێ، یه‌کرێزیا ناڤخوه‌یی یا کوردێن باشوور پێک بینه‌ و پرسگرێکێن هه‌رێمێ و که‌رکووکێ‌ چاره‌سه‌ر بکه‌.

هه‌رچقاس د سه‌ر سه‌رۆکاتیا نێچیرڤان بارزانی را ساله‌ک ده‌رباس ببه‌ ژی، ئه‌رکداریا و ژ سالا ۱۹۹۲ێ ڤە ده‌ست پێ دکه‌ و هه‌تا ڕۆژا ئیرۆ تێ.

د ده‌ستپێکێ دا جیگرێ سه‌رۆکوه‌زیر، دوورا ب سالان سه‌رۆکوه‌زیر، ئیرۆ ژی وه‌ک ئه‌رکدارێ یه‌که‌مین سه‌رۆکێ هه‌رێمێ یه‌.

نێچیرڤان بارزانی د وارێ سیاسه‌ت و ئه‌رکداریێ دا مرۆڤه‌کی خوه‌دی ته‌جرووبه‌ و زانا یه‌.

بێگومان، ئه‌و پرسگرێکێن باشوور ژ باشوورییان، پێویستیێن باکور، ڕۆژاڤا و ڕۆژهلات ژی ژ وان باشتر دزانه‌.

پێویستیێن هه‌ر سێ پارچه‌یان ژ سه‌رۆکاتی و ڕێڤه‌برییا باشوور تێن کرن، نه‌هاتبه‌ جھ، ئه‌و کێماسیه‌، کو ئه‌ڤ کێماسی ژی کێماسییا باشوور ته‌نێ نینه‌.

لێ پرسگرێکێن باشوور، ڕه‌وشا که‌رکووکێ، پرسگرێکێن ژبۆ یه‌کرێزییا ھێزا په‌شمه‌رگه‌ و ڕه‌ڤه‌بەریێ مرۆڤ نکارە و ب کێماسییێ ئیزاه بکه‌. ئه‌و تشته‌کی دنه‌، کو مرۆڤ ناخوازه‌ وێ ڕاسته‌راست ژی بناڤ بکه‌.

ئه‌ز ژی وه‌ک کورده‌کی باکوری داخوازه‌ک ژ سه‌رۆکێ هه‌رێما کوردستانێ نێچیرڤان بارزانی دکم.

داخوازا من ئه‌ڤه‌ کو ئه‌و د ده‌مه‌ک نێزیک دا تا كو ئەوکه‌رکووکێ ڤه‌نه‌گه‌رینه‌ سه‌ر هه‌رێما کوردستانێ ژی، ئەو دکاره‌ ب ڕۆل و ئه‌رکدارییا خوه‌، یه‌کرێزییا هێزا په‌شمه‌رگه‌ و ڕێڤه‌برییا باشوور پێک بینه‌.

ده‌ما کو ئه‌ڤ هه‌ردو پرسگرێک چاره‌سه‌ر بوون، وێ گاڤێ باشوور نه‌به‌ ده‌وله‌ته‌ک سه‌ربخوه‌ ژی، وه‌ک ده‌وله‌ته‌ک ب یه‌کهێز و یه‌کرێزییا خوه‌، داخواز و هێڤیێن کو هه‌ر سێ پارچه‌یێن دن ژێ دکن، دکاره‌ ب هێسانی بینه‌ جھ.

ب ئاوایه‌کی دن، ڤه‌گه‌راندنا که‌رکووکێ یا ل سه‌ر کوردستانێ ژی، هه‌ڤکاری و ئالیکاریا ژ بۆ پارچه‌یێن دن ژی، ب یه‌کهێزی و یه‌کرێزییا باشوور ڤە گرێدایی یه‌.

وه‌ک سه‌رۆکێ هه‌رێما کوردستانێ ئه‌رکدارێ یه‌که‌مین نێچیرڤان بارزانی یه‌ و بارێ هه‌ری گران ژی ل سه‌ر ملێ وی یه‌.

یا ئه‌وێ ژ بن بارێ خوه‌ خلاس به‌ و د کووراهییا دلێ هه‌موو کوردان جهه‌کێ مایینده‌ بگره‌، یا ژی ئه‌وێ د بن باردا بمینه‌…

بێگومان داخوازا من یا یه‌که‌مینه‌…

ئیكرام ئۆگوز

2020.06.12

نێرین / شیرۆڤە