پەکەکە ژ دەستپێكێ ھەتا ئیرۆ

نڤیسین: ئازادێ باتیفی

دامەزراندنا پارتیا كاركەرێن كوردستانێ(پەکەکە) د دەمەکێ دا بوو کو تەڤگەر و حزبێن کوردی ل باکوورێ کوردستانێ سەرێ خوە هلددا، ب تایبەتی پشتی شۆڕەشا ئیلۆنێ ب چەند ساڵەکان ئێدی ترکیایێ نەدشیا ڕێ ل ئومێدێن کوردان بگرە.

گەنجێن کوردان تێهنیێن کوردینیێ بوون و دخواستن ژ بن وێ ستەما (زوڵما) ئەتاتورکی یا کو ل پشتی جەنگا جیهانی یا ئێکێ دەربکەڤن و جارەکا دیتر دەست ب سەرهلدانان بکن!

چەند حزب و تەڤگەرێن کوردی هەبوون و هندەک چەپێن تورکان ژی ل دژی دەسەڵاتا ترکیایێ سەرهلدابوون.

تەڤگەرا کوردی یا ناڤێ وێ ب تورکی (كیپ) بوو ئەگەر خەلەت نەبم ئانکو (Kurdistan îşçî partî

 پارتییا کارکەرێن کوردستانێ, حەتا هنگێ هێشتا ئەو پارتی یە نەهاتبوو دامەزراندن و کۆنگرەیا خوە نەکربوو، بەلکو وەکی کۆمەڵەیەکا نهێنی بوو و دڤیان زێدەتر خەلکێ ل خوە کۆم بکن و پاشی کۆنگرەیا خوە بکن.

دەولەتا ترکیایێ هەست ب لڤینێن وان تەڤگەرێن کوردی دکر و پچ پچە خراب دکرن.

عەڤدلا ئۆجەلان ب سەر وێ تەڤگەرێ هلبوو و ژ وان خواست کو ببە ئەندامێ وێ تەڤگەرێ، لێ ئەوان ب ساناهی باوەریا خوە ب کەسێ نەدئینا، لەوما ئەو وەرنەگرت و گۆتێ ئەم تە ناس ناکین. پشتی کو ئۆجەلان نەهاتی قەبوولکرن، وی چالاکییێن وان ب ناڤێ خوە بەلاڤ دکرن و ل سووک و بازاڕان دگۆت: تەڤگەرا مە هۆ کر و هۆ کر. ئەندامێن وێ تەڤگەرێ دمان حەییری، باشە، ئەڤە کی یە؟ و کێ ئەو چالاکی یە بۆ وی گۆتە؟ مانێ ئەو چالاکی یە مە یا ئەنجام دای، ڤێجا ئەو کی یە ب ناڤێ خوە بەلاڤ دکە؟ ب هەر حال، ئەندامێن وێ تەڤگەرێ تەڕا و بەڕا بوون و هاتن گرتن و کوشتن و دەربدەر بوون.

پاشی عەڤدلای ئەو پارتی یە ب ناڤێ خوە ئاڤا کر و ئێدی کەسێ نەدوێریا ب وی ناڤێ بەرێ خوە بدت ناسکرن.  پارتییا کارکەرێن کوردستانێ یێن بەری عەڤدلای، ناڤ ل خوە نا: پێشەنگ.

پەکەکێ ل دەستپێکا خەباتا خوە یا چەکداری ب درویشمێن مەزن هات مەیدانێ و داخوازا سەرخوەبوونێ بۆ هەر چار پارچەیێن کوردستانێ دخواست و دگۆت:

ئەم چو توخووبان ناس ناکین، کوردستان ئێک پارچە یە و هەر جهێ مە بڤێت ئەم دێ ل وێرێ خەباتا خوە بدۆمینین، لەوما گەنجێن کورد ب دل و جان دچوون ناڤ ڕێزێن پەکەکێ.

هەر ژ هنگێ ڤە، پەکەکە یا دژایەتیا مللەتێ کورد دکە و ل هەر جهەکێ دەستێ کوردان درێژ ببە، پەکەکە دژی وی دەستی یە.

میناک د مشە نە، بەرێ خوە بدن سیاسەتا وێ!

ل ساڵێن هەشتیان، شەڕێ چەکداری ل فژی تركیێ ڕاگەهاند، هینگێ ژمارەیا چەکدارێن وان ژ 50 کەسان نەدبوورین، ڕێککەفتن ل گەل پارتی دیموکراتی کوردستانی هەبوو کو ل سەر توخووبێن ترکیایێ چ شەڕێن چەکداری نەکن دا کو دو دەولەتان ب پێکڤە نەکن دوژمنێن خوە، لێ ب مخابنی ڤە پەكەكێ ڕێککەفتن بن پێ کر.

ل سالا 1984ێ شەڕێ پارتیا کۆمۆنیستا عیراقێ کر و ل گوندێن دەڤەرا گولیان، بگرە هەر ژ گوندێ دێریشکێ کو دکەڤە پشتا باتیفایێ و ب تنێ دو کیلۆمەتران ژ لیوایا باتیفایێ دوورە حەتا دگەهە گوندێ کەشانێ و حەفتەنینێ، ل هەر جهەکێ دیتبان دا کوشتنێ ژێ کن و کەمینان ل بەر دەینن و ل گەلەک جهان پێشمەرگەیێن پارتی دکەتن د ناڤبەینا نال و بزماران دا (ئەرێ ئەم پشتا کۆمۆنیستان بگرین ئان یا پەکەکێ؟) هەلبەت د ناڤبەینا ڤان دو بژاردەیان دا هەمی دەمان پەکەکە دهاتە پاراستن.

ئەڤ کارێ پارتیێ ببوو جهێ عاجزیا پارتیا کۆمۆنیست کو جەبهەیێ (جود) د گەل پارتی و پاسۆک و سۆشیالیست و گەل هەبوو، لێ پێشمەرگەیێن دەڤەرێ دخەبتین کو شەڕ ڕوو نەدە و پەکەکێ بپارێزە!

پەکەکێ دەست ب کوشتنا موختار و ئاغا و دەرەبەگان کر و ئەو کارێ وان بوو جهێ نەڕازیبوونا پارتی و تەڤگەرێن کوردی ژ لایەکێ ڤە و ژ لایەکێ دیتر ڤە خەلک ژی نەڕازیبوو ل سەر کوشتنا موختار و ئاغا و دەرەبەگان لەوما ئەو بوو ئەگەر کو ئێدی پەکەکێ نەحەوینن و هاریکارییا وێ نەکن.  هەلبەت گوند و دەڤەرێن کوردان هاتن چۆلکرن، هندەک ژ لایێ حوکمەتا ترکی ڤە و هندەکان ژی ژ نەچاری گوندێن خوە بەردان و قەستا باژێڕێن وەکی ستەنبۆل و ئەنقەرە و ئزمیرێ کرن دا کو خوە ژ وی شەڕێ بێ مفا بپارێزن. ئەڤ کارە گەلەک ب دلێ حوکمەتا ترکیایێ بوو چونکی دەڤەرێن کوردی ئێدی نەشێن هاریکارییا پەکەکێ بکن و ئەو دەڤەرێن نەھاتین چۆلکرن هەمی بوون جاش و چەکێ دوژمنی ب ملێن خوە ڤە کرن دا کو دژایەتیا پەکەکێ بکن.

پشتی ئەنفالێن ڕەش ب سەر مللەتێ مە دا هاتین، خەلکێ دەڤەرێ ژ نەچاری بەرێ خوە دان توخووبێن ترکیایێ و ئیرانێ، هندەک مەفرەزەیێن پێشمەرگەی ل دەڤەرێ مان.

ل بهارا سالا د دووڤ دا ئانکو ل ساڵا 1988ێ مەفرەزەیەکا پێشمەرگەی کو پێکهاتی بوو ژ؛ محەمەد حەمدی، سەعدولڵا ئاڤدەل، ئدریس جەرجیس (ئەحمەد کادر)، نزار محەمەد سلێمان، خالد ئادەم حسێن وەرمێلی و نەزمی ئەحمەد چۆلی وەرمێلی، پەکەکێ ئەو گرتن و پاشی ل نێزیکی گوندێ شیڤڕەزانێ ل ناڤ قەشووریان، باكورێ كوردستانێ،  کوشتن.

پشتی سەرهلدانێ و دەنگدانێن پەرلەمانێ کوردستانێ و دامەزراندنا ئێکەم حوکمەتا کوردستانێ، پەکەکێ ژی وەکی ترکیایێ و وەڵاتێن داگیرکەر خوە نەڕازی کر ب هەبوونا پەرلەمانێ کوردستانێ و هندەک کەس ب ناڤێ ڕوەشەنبیر و سیاسەتمەدار ل دۆرێن خوە کۆم کرن و  پەرلەمانەك دامەزراندن و ناڤ لێ نا پەرلەمانێ کوردستانێ یێ دەرڤەی وەڵاتی. هەلبەت ئەڤ کارە ب تنێ ژ بۆ تێکدانا هزروبیرێن کوردپەروەران بوو کو بەرێ وان ژ کوردپەروەری و وەڵاتپارێزیێ وەرگێڕن.

 هەر د وێ ساڵێ دا گەلەک دەستنەخوەشی بۆ خەلکێ دەڤەرێ چێ کرن و سەیتەرە دەینان د ڕێکان دا، ناسنامە ژ خەلكێ دەڤەرێ  دخواستن و گومرک ژێ دستاند، ئەڤە نە ل سەر چو توخووبان بوو، بەلکو د ناڤبەینا باژێڕ و گوندێن کوردستانێ دا بوو، ئانکو ل باشوورێ كوردستانێ بوو.

پەرلەمانێ کوردستانێ بڕیارەک دا کو دڤێت پەکەکە وان سەیتەرەیان ڕاکە و چ چالاکیان د ناڤبەینا گوند و باژێڕێن ھەرێما كوردستانێ دا ئەنجام نەدە، بەلێ هەر وەکی تو بلوولێ بۆ گای لێ بدی! ل 15-10-1992ێ بوو شەڕ د ناڤبەینا حوکمەتا کوردستانێ و پەکەکێ دا و ئەو بوو ئەگەرا لەشکەرکێشیا تركیێ بۆ دەڤەرێن بامەڕنێ و کانی ماسێ.

ل ساڵا د دووڤ داتر پەکەکێ “دەولەتا زابێ” ڕاگەهاند و ئەڤ کارە ژی هەر ژ بۆ ڕاکێشانا بالا خەلکێ بوو  و خوە ل جهێ حوکمەتا کوردستانێ ددەینا.

ل ساڵێن 1995-1996ێ بێی کو هیچ کەسەکێ ئاگاداریەک ل سەر گرژیەکێ هەبە د ناڤبەینا پارتی و پەکەکێ دا، د شەڤەکێ دا پەکەکێ هێرش کرن سەر زێدەتر ژ بیست بارەگایێن پارتی و هندەک ژ وان ب ئێمنی و بێبەختی گرتن. ئەو هێرشە ژی هەر ب فیتیا داگیرکەران بوو کو هەڤدەم بوو د گەل شەڕێ ناڤخوەیی یێ د ناڤبەرا پارتی و ئێکەتیێ دا و ب دیتنا پەکەکێ و ئێکەتیێ کو دێ هەر ئێک ژ وان ژ لایەکێ ڤە هێرشێ کن سەر پارتی و دێ ژناڤ ببن، لێ بەلێ وێ جارێ ژی “ئاڤ ل دویڤ جۆکا وان نەهات” پەکەکێ بارەگایێن خوە یێن سەرەکی ل دەڤەرێن سلێمانیێ ب جهـ کرن، و د دووڤ دا کۆمەکا پێشمەرگەیێن ئێکەتیێ ل قەرەداغ کوشتن و پاشی دەربازی ڕۆژهەڵاتێ کوردستانێ بوون.

ل وێرێ ژی جهێ پاسدار و بەسیجێن ئیرانێ گرت و دژی حزبێن ڕۆژهەڵاتێ كوردستانێ شەڕ کرن.

ل شواتا ساڵا 1999ێ عەڤدلا ئۆجەلان د سەفارەتا یۆنانێ ل نایرۆبی پایتەختێ کینیایێ ژ لایێ هێزەکا کوماندۆیێن ترکی ڤە ب ڕەزامەندیا زلهێزێن جیهانێ هات گرتن و دادگەهێ حوکمێ سێدارەدانێ دەینا سەر.

د ڕوینشتنا ئێکێ یا دادگەهێ دا، عەڤدلای داخوازا لێبوورینێ ژ دایکێن سەربازێن تورکی کر و گۆت : “ئەز داخوازا لێبوورینێ ژ دایکێن شەهیدان دکم”

عەڤدلای خوینا گەنجێن کوردان ژ بیر کر، هەکە سەربازێن ترکان شەهید بن، پا ئەو گەنجێن خوینا خوە د ڕێیا پەکەکێ دا ڕشتین چ نە؟

هەر ل وێ ساڵێ هندەک دانوستاندن د ناڤبەینا ئۆجەلان و حوکمەتا تورکی دا چێ بوون، ل ئیلۆنا وێ ساڵێ ئاگربەستەکا ئێک لایی هات ڕاگەهاندن کو ب هیڤیا ڕاگرتنا شەڕی ب ئێکجاری.

ترکیایێ هندەک مەرجێن سەیر ل سەر پەکەکێ سەپاندن، ئەو بوو کو دڤێت چەکدارێن پەکەکێ ژ ترکیایێ دەربکەڤن (هەلبەت مەرجەکێ سەیرە! ئەرێ چەک بۆ چی یە، هەکە چەکدارێن پەکەکێ ل تورکیایێ نەبن)

ڕازیبوونا پەکەکێ ل سەر ڤی مەرجی، ئانکو پێکهاتنا هەردو لایانە کو شەڕێ خوە ببن باشوورێ کوردستانێ ئان ژی ڕۆژئاڤایێ کوردستانێ، دا کو ترکیا ب وێ هێجەتێ لەشکەرکێشییێ بکە بۆ سەر هەردو پارچەیێن دیتر.

پشتی کو ئەو مەرجە قەبوول کرین، کۆمەکا چەکدارێن پەکەکێ بێ مەرج چوون خوە تەسلیمی حوکمەتا ترکیایێ کرن، دا کو فشارێ ل سەر عەڤدلای کێم بکن، حوکمەتا تورکیایێ ئەو کەسە هاڤێتن د زیندانان ڤە و چ  گرنگی ب وان نەدا.

ل ساڵا 2002ێ پەکەکێ ئاگربەستا ئێک لایی درێژ کر و هێدی هێدی دەست ب کارێ سیاسی کر. گەلەک شارەوانی کەتن دەستێن کوردان و ناڤ و دەنگێن وان بەلاڤ بوون. پارتییا هەدەپە پشکداری د دەنگدانێن ترکیایێ دا کر و گەلەک کورسییێن پەرلەمانی ب دەست خوە ڤە ئینان. کوردێن باکوور خوەشحالیا خوە بۆ وێ سەرکەفتنێ دیار کر و پتر کەیفا وان ب کارێ سیاسی هات ژ شەڕێ پەکەکێ بەرپاکریێ بێ ئەنجام.

ئەردۆگانی ڕێژەیا 10%ێ دەستنیشان کر، ئانکو یێ وێ ڕێژەیێ ب دەست خوە ڤە نەئینە، ناكەڤە پەرلەمانی. ژ بۆ کوردان ئەڤ ڕێژە یە وەکی مان و نەمانێ بوو لەوما ب دل و جان دەنگێ خوە دان هەدەپێ و ئەو بەربەستە ب ڕێژەیا 14%ێ شکاند. ژمارەیا ئەندام پەرلەمانێن کوردان گەهشت 81 کەسان.

سیاسەتمەدار و ڕەوشەنبیرێن کوردان شیرەت ل هەدەپێ کرن کو پشکداریێ د حوکمەتا ئاکەپێ دا بکە، دا کو پتر بشێن خزمەتا دەڤەرێن کوردی بکن. لێ ب مخابنی ڤە سەرکردایەتیا پەکەکێ ل قەندیلی بڕیار دا کو پشکداریێ نەکن و پشتی دەمەکێ کورت دو پۆلیس ل جزیرێ کوشتن و پەکەکێ کوشتنا وان ئێخست ستۆێ خوە. د دووڤ دا ل شەرنەخێ و سوورا ئامەدێ و نسێبینێ و جزیرێ خەندەک د کۆلان و شەڕەکێ بێ مفا ل وان جهان بەرپا کر.

ئەنجامێن وی شەڕی، ڕشتنا خوینا ب سەدان گەنجێن کوردان بوو، خرابکرن و مالوێرانیا ب هزاران مالان بوو، دەربدەربوون و مشەختبوونا کوردان بوو و هیڤی و ئومێدێن کوردان ب ئێکجاری ژ بن برن.

مایتێکرنا پەکەکێ د هەمی پارچەیێن کوردستانێ دا جهێ حێبەتیبوونێ یە، چونکی هەر جهێ دەستێ پەکەکێ بگەهتێ، وی جهی خراب دکە ئان ژی دبە ئەگەرێ لەشکەرکێشیا دەولەتا ترکیایێ بۆ وی جهی.

شەنگال هات داگیرکرن ژ لایێ داعشێ ڤە و ب هزاران خەلکێ مە کەتن دەستێن وان. پەکەکێ ھەولدا کو ئەو خەلکێ دامای یێن کو کەس و کارێن خوە ژ دەست داین بۆ خوە و ل ژێر ناڤەکێ نوی ڕێک بێخە.

چەند ڕێکخراو و حیزب ل وێرێ دامەزراندن، ل شوونا کو وان نێزیکی ئێک بکە و ل بن سیبەرا حیزبەکێ بن، هەمی ژێک بەلاڤ کرن و پارچە پارچەکرن.

ئومێدا کوردان ئەو بوو کو شەنگالێ ژ دەستێن چەپەڵێن داعشێ ڕزگار بکن، دەمێ هەڤپەیمانان پشتەڤانیا خوە بۆ ڕزگارکرنا شەنگالێ دیار کری و ڕۆژا هێرشێ دەستنیشانکری، پەکەکێ ئەو پلانە هەمی ئاشکرا کر و ل سەر کەناڵێن تلەڤزیۆنان ڕۆژ و سەعەتێن هێرشێ ب ناڤێ خوە بەلاڤ کرن کو ئەو دێ شەنگالێ ڕزگار بکن.

ژ بەر هندێ هێرش هات پاشئێخستن بۆ چەند ڕۆژێن دیتر، زێدەتر ژ پێنج هزار پێشمەرگەیێن باشووری كوردستانێ پشکداری د وێ هێرشێ دا کرن و شەنگال ڕزگار کر. دیسان ئەو دەستکەفتە پەکەکێ ب ناڤێ خوە دا بەلاڤکرن.

جارەکا دیتر ل گەل وان حیزبێن ئاڤاکرین داخوازا لەشکەرێ عیراقێ و حەشدا شەعبی کر کو بچن شەنگالێ، دا کو پێشمەرگە ل وێرێ نەمینن (ئەو ژی هەر د بەرژەوەندییا داگیرکەران دا بوو)

جاروباران پەکەکێ بەیان دەردکرن کو ئەو شەنگالێ بەرنادن، هەلبەت نە ژ بۆ پاراستنا خەلکێ شەنگالێ بوو بەلکو دڤیا سەربازێن ترکیایێ بکێشە وێ دەڤەرێ.

ل ڕۆژئاڤایێ کوردستانێ، باژێڕێ کۆبانێ ل بەر کەفتنێ بوو، هەمی دزانن زێدەتر ژ سێچارێکێن وی باژێری کەتبوون دەستێ داعشێ دا. پێشمەرگە ب چەکێن گران ڤە گەهشتن کۆبانێ و ژ دەستێن داعشان ئینان دەرێ و ئەو دەڤەرە هەمی ڤەگەڕاندن ڤە. پەکەکێ ئەو دەسکەفتنە ژی بۆ خوە حەسێب کر و ئاڵایێن پەکەکێ و وینەیێن عەڤدلای ل کۆبانێ و عەفرینێ بلند کرن.

ئەڤ کارە ئۆتۆماتیکی ڕێکێ ددە تررکیایێ کو هێرشێ بکە سەر عەفرینێ و ب ناڤ و هێجەتێن ژێک جودا. باژێڕ ژ لایێ تورکیایێ ڤە هاتن داگیرکرن و زلهێزان چاڤێن خوە نقاندن! پاشی تورکیا چوو سەرێ کانییێ و گرێ سپی ژی هەر ب وێ هێجەتێ کو یەپەگە سەر ب پەکەکێ ڤە یە، ئەو ژی داگیر کرن.

پەکەکە ئامادە یە هەمی کوردستانێ تەسلیمی داگیرکەران بکە، لێ نە ئامادە یە کو گوندەکێ بچووک ژی تەسلیمی برایێن خوە یێن کورد بکە! تشتێ هەری گرنگ ل دەف پەکەکێ ئەوە کو سلۆگانا “بێ سەرۆک ژیان نابە” ڤەگێڕن، بلا کوردستان هەمی تێك بچە.

ئێک ژ سالۆخەیێن پەکەکێ ئەوە کو مللەتێ کورد ژ هەڤ دوور بکە، کا چەوا ئاغا و بەگ و ئۆل و مەزهەبان کورد پارچە کرنە، وەسا پەکەکێ ژی ئەو کارە یێ ئەنجام دای و خرابتر ژی یا کری.

بەرێ خوە بدن ڤان حیزب و ڕێکخراوێن پەکەکێ دامەزراندین:

‏PKK, YPG, HPG, PÇKD, PAK, TAK, YJA STAR, YDG-H, PYD, YPJ, YPG, PJAK, YRK, HPJ, KODAR

هەروەسا هەر ئێک ژ ڤان حیزب و ڕێکخراوان ئاڵایەک یێ بۆ دروست کری و ئاڵایێ کوردستانێ قەبوول ناكن و ب ئێکجاری ڕاناکن. زێدەتر ژ 30 ئالایان ژ لایێ پەکەکێ ڤە یێن هاتین چێکرن هەر ژ بەر هندێ یە کو ئێدی کەس ئاڵایێ کوردستانێ ڕانەکە و ب پیرۆز نەبینە.

پەکەکێ ل دەستپێکا خەباتا خوە یا چەکداری ب درووشمێن مەزن و بریقەدار هات مەیدانێ و داخوازا سەرخوەبوونا کوردستانا مەزن دکر.

پشتی گرتنا عەڤدلای پچ پچە، درویشمێ خوە گوهاڕتن و نووکە دبێژن:

“دیموکراسی بۆ گەلان”!

ل دویماهییێ ژ بۆ مرۆڤی دیار دبە کو ئارمانجا پەکەکێ و دەولەتا ترکیایێ نەهێلانا کوردانە و هەر تشتێ ئەرگەنەکۆنێ دخواست ئەنجام بدە، پەکەکێ ئەو ب جهـ دئینا.

دامەزراندنا پەکەکێ ژی هەر ب ڕەزامەندیا وان بوو، ئەڤە نێزیکی 40 ساڵانە پەکەکێ تشتەکێ وەسا نەکریە کو مرۆڤ خوە پێ سەربلند ببینە، مخابن.

ئازادێ باتیفی
2020.07.06

نێرین / شیرۆڤە