ڕۆژا ره‌ش   نابە ئه‌م ژبیر بكین

نڤیسینا: سیپانێ باڤی – ستوكهۆلم


كاره‌ساتا كو د 2014.08.03ێ  دا‌ ل ده‌ڤه‌را شه‌نگالێ ب سه‌رێ مه‌ دا‌ هاتی، د ڤێ ببە هێڤێنێ ژخه‌وا بێ ئاگه‌هیێ هشیار بین و ئێكگرتن و رابوونا مه‌ گشت كورد و كوردستانییان.
باوه‌ریێن ئۆلی ب جهێ خوه‌. ژ بۆ بیروباوه‌ریێن هه‌ركه‌سی و هه‌ر مله‌ته‌كی رێزا من هه‌یه‌ ، لێ ده‌ما مرۆڤ ب حیكمه‌ت و دوور ژ سه‌رهشكی یا ئۆلی ل پێڤاژۆیا داگیركرنا چه‌كدارێن داعشان هوور و كوور دبە، ب تایبه‌تی كا چما ئێكه‌م جار ده‌ڤه‌را شه‌نگالێ و خه‌لكێ مه‌ یێ كو هێشتا و سه‌ره‌رای 73 فه‌رمانێن هۆڤانه‌، شیاینه‌ ئۆل و زمان و چاندا بابوكالێن خوه‌ یێن كورد یێن كه‌ڤناره‌ هه‌تا راده‌یه‌كی ژ هێرشێن هۆڤانه‌ یێن داگیركه‌ران و تێكچوونێ بپارێزن.

 پێره‌ هێرش برنە سه‌ر كۆبانێ، كه‌ركووكێ، عه‌فرینێ و سه‌رێكانیێ و كا چ ئانین و تینن سه‌رێ خه‌لكێ وان ده‌ڤه‌ران، ب تایبه‌تی خووشك و برایێن مه‌ یێن ئێزدی ل ده‌ڤه‌رێن شه‌نگالێ و عه‌فرینێ ب هێجه‌تا كو نه‌ موسلمانن.
باش دییار دبە كو ژ بۆ داگیركه‌ران  كورد هه‌ر كورده‌ و د ڤێ نه‌مینن؛ ئێزدی بە، فله‌ بە، جوهی بە یان موسلمان بە. داگیركه‌رێن مه‌ هینگێ ژ مه‌ د گه‌رن، یان مه‌ ب كوژن و زارۆ و ژنێن مه‌ وه‌ك به‌نی، كۆله‌ و كه‌نیزه‌ك ژ خوه‌ را‌ ببن یان ژی، ژ ترسێن سه‌ربرین و كوشتن و تالان و نامووسهه‌تكاندنێ   ئه‌م قه‌بوول ب بكین كو ژ وان را‌ ببین به‌نی و كۆله‌.


ئیرۆ دبهیسم كو هنده‌ك ئێزدی ژ دلشه‌واتا خوه‌ دبێژن كو ئێزدی نه‌ كوردن، یان هنده‌ك كوردێن موسلمان ژ سه‌رهشكی یا ئۆلی و نه‌زانین دبێژن ئێزدی نه‌ كوردن. ئه‌ڤ دیتن ژ بلی كو نه‌ وه‌یه‌ و شاشییه‌ك مه‌زنه‌، دروست ئه‌وه‌ یاكو داگیركه‌رێن مه‌ یێن عه‌ره‌ب، تورك و فارسان ب سه‌دێ سالانه‌ كار و جه‌نگ ژ بۆ كرنه‌ و به‌رده‌وام ژ بۆ كار دكن.


ئه‌ڤ جۆره‌ دیتن ژ بۆ مه‌ كوردان له‌نگی و مالوێرانییه‌ك مه‌زنه‌، لێ د هه‌مان ده‌م دا ژ داگیركه‌رێن مه‌ را‌ سه‌ركه‌فتنه‌ك مه‌زنه‌.
دورست ئه‌ڤه‌ به‌رهه‌مێ وی تۆڤی یه‌ یێ كو سه‌دێ سالانه‌ داگیركه‌رێن مه‌ ب زه‌برا شوور و خوینێ وه‌كا ستری و درییان د ناڤ مه‌ كوردان دا‌ ل هه‌ر پێنج پارچێن كوردستانێ دا‌ چاندنه‌ و هێشتا دچینن.
له‌وما  رۆژ هاتی یه‌، ئه‌گه‌ر نه‌ هنده‌ك دره‌نگ ژی بە، كو ئه‌م ژ خه‌وا بێ ئاگه‌هیێ هشیار بین، هنده‌ك راوه‌ستین و سه‌ر ژ نووڤە ل سه‌ر رێیا نه‌ته‌وه‌یی و رزگاركرنا ئاخا وه‌لاتێ خوه‌ كوردستانێ یه‌ك بگرین و خه‌باتا ئازادی و رزگاریێ هه‌تا سه‌ركه‌فتنێ به‌رده‌وام بكین.


ژبلی ئێكگرتنه‌ك پاك و موكم رێیه‌كا دن یا رزگاریا مه‌ قه‌ت نینه‌.

سیپانێ باڤی – ستوكهۆلم
2020.08.07
نێرین / شیرۆڤە