داخویانییا نەرازیبوون و ئیدانەكرنێ ژ لایێ ستافێ مالپەرا “سبەهی” ڤە
بۆ رایا گشتی و ناڤەندێن رۆژنامەڤانیێ
د دەمەكێ دا كو لایەنێن پەیوەندیدار و دەزگەهێن راگەیاندنێ كار بۆ بەرفرەهكرنا ئاقارێ ئازادیا رادەربڕینێ و پاراستنا كەرامەتا رۆژنامەڤانان دكەن، مخابن دوهی (٢٠٢٦/٦/٢٢) ل بەر چاڤێن میدیاكاران، كریار و رەفتارەكا نەچاڤەرێكری ژ لایێ سەرۆكێ ئێكەتییا نیشتمانی یا كوردستانێ، بافل تالەبانی، بەرامبەر رۆژنامەڤانەكی هاتە كرن.
د دەمێ ئاراستەكرنا پرسیارەكێ ل سەر سروشتێ تێكلیێن د ناڤبەرا ئێكەتییێ و تەڤگەرا نەوەی نوێ دا، سەرۆكێ ئێكەتییێ ل جهێ پێشكێشكرنا بەرسڤەكا سیاسی و بەرپرسیارانە، هێرش كرە سەر وی رۆژنامەڤانی و پەیڤێن نەشیاو وەكی (هەی حوشتر) د بەرسڤا وی دا هەبوون.
ئەم وەك ستافێ مالپەرا سبەهی، ڤێ رەفتارا بافل تالەبانی ب رەفتارەك بێبەرپرسیارانە و دوور ژ بهایێن دیمۆكراسییێ دزانین. ئەڤ سڤكاتیكرنە ب تەنێ بێڕێزی نینە بەرامبەر وی رۆژنامەڤانی، بەلكو ئیهانەكرنەكا زیقە بۆ سەرجەم رۆژنامەڤان و دەزگەهێن راگەیاندنێ ل كوردستانێ، و دیسان وەك دەستپێكەكا مەترسیدار بۆ بێدەنگكرن و كێمكرنا بهایێ پێشەیا رۆژنامەڤانییێ دبینین.
ئەركێ رۆژنامەڤانی پرسیاركرن و گەهاندنا راستیانە بۆ رایا گشتی و چ پۆست و پێگەهێن سیاسی ماف نینە بێرێزیێ ل مەدیاكاران بكەن.
ژبەر هندێ، ئەم ب دژواری ڤێ رەفتارا بافل تالەبانی شەرمەزار و ئیدانە دكەین، و را دگەهینین كو دڤێت سەرۆكێ ئێكەتییێ ب فەرمی داخوازا لێبورینێ ژ وی رۆژنامەڤانی و هەموو رۆژنامەڤانێن كوردستانێ بكەت، دا كو ئەڤ جۆرە رەفتارە نەبنە نەریتەك د ناڤبەرا دەسهەلاتا سیاسی و كار و پێشەیا رۆژنامەڤانییێ دا.
ستافێ مالپەرا سبەهی
٢٣ێ حوزەیرانا ٢٠٢٦
