شنگال و قڕکرنا ئێزدیان.
ئەوا دبێژنێ فەرمانا ٧٤ ێ ئەرێ دێ دوماهیک فەرمان بت؟؟
دەولەتا خیلافەتا ئێسلامی ئەوا دگۆتنێ داعش بدوماهیک هاتیە؟؟ هزروبیرێن داعشێ کێم بوینە یان هێشتا گەفێن مەزنن بۆ ئێزدیا و غەیری ئێزدیا؟؟
پێکڤەژیان یا بنەجهە یان یا لەرزۆکە؟؟
ئێزدی هەتا چ رادەی پشتراستن ژپاشەرۆژا خوە؟؟
پشتی بۆرینا دوازدە سالان هێشتا برین دئازرینە و چارەنڤیسێ نێزیکی نیڤەک ژ رەڤاندیان نەیێ دیارە. گەلەک گۆرێن بکۆمەل یێت ماین. ژبلی بەهرا هەرەپتر یا ئاوارا نەزڤرینە سەر جهو وارێن خوە و نەهاتینە قەرەبۆکرن.
راستە داعش ب فۆرمێ خوە یێ کلاسیک نەمایە بەلێ ب فۆرمەکی نوو ئو مکیاجکری ئینانە سەر دەسهەلاتێ ل شامێ داعشەکا هەتا رادەیەکی یا لغافکریە و چو گرەنتی نینن بمینت لغافکری.
هزرا داعشێ وەکی خوە مایەو کارێ خوە دکەتن ل ئیراقێ و کوردستانێ و ترکیا و هەموو دەولەتێن عەرەبی. دەمێ مرۆڤ وان ژمارەیێن خیتابا کەرب وکینێ دبینت ژئالیێ رێکخراوێن تایبەتمەند دڤی بواریدا هنگی دێ زانت ئەو دبێژنێ پێکڤەژیان چەندا لەرزۆکە، ئەگەر ئەم بەحسێ کوردستانێ بکەین دڤێت دراست گۆبین لگەل خو و خەلکێ خوە ئەگەر ژ ترسا حکومەتا هەرێما كوردستانێ نەبت و ژ پارتیێن نەتەوەیی و بتایبەت پارتی نەبت هند توندرەو یێن هەین کو داعشبوونا خوە بکریار بکاربینن هەر رۆژا ئەڤ حزب ل سەر دەسهەلاتێ نەمینن ئیزدی و مەسیحیا چ پاشەرۆژ نینە.
ل رۆژا ئێزدی بسەدێت هەزارا هاتینە کوردستانێ سەرەرای وێ مالوێرانیا هندە مەزن دلێ هەر مرۆڤەکی هەستێ مرۆڤاتیێ هەی خۆش ببو بوێ پشتەڤانی و هاریکاریا کێموێنە و دیرۆکی ئەوا ژئالیێ کوردێن بوسلمان ل کوردستانێ بۆ برایێن وان یێت خونێ واتە نەتەوی هاتیەکرن لێ مخابن هندەک ئالیێ سیاسی ئەوێن چاڤ ب وێ چەندێ نەرادبن کەفتە تەجنیدکرنا لایەنگرێن جوە و ئیزدی و بوسلمان ل سەر تۆڕێن جڤاکی بەردانە ئێک و هەتا نۆکەژی بەردەوامە و کارگەریەکا مەزنا ل سەر دەروونێ هەردوو ئالیان دروستکری و بتایبەتی یێ ئێزدیا دەمێ وان خیتاباتێن كەربوكینێ دبینن.
گەلەک بێئەمەکا ئەو قوربانیدانێن مەزنێ یێن پێشمەرگەی داین بۆ رزگارکرنا شنگالێ و ئەو رۆلێ مەزنێ سەرۆک بارزانی دیتی و گێرای ل بەرچاڤ نەگرتن و کەفتنە بەلاڤکرنا پۆست لایف وووو هتد ئەو گیانێ پێکڤەژیانێ لاواز کرن. ل ڤێرە ئەز بەحسێ مە دكەم وەکی ئێزدی، هەلبەت ئەوێن ئەڤ چەندە کرین پالدایبوەن ژ وان حزبێن ترسیاین ژوێ هەڤگەتنا ل ناڤبەرا ئیزدی و بوسلمانا دروست بووی پشتی فەرمانێ و ئەو چەندە دهاتە هژمارتن خالەکا بهێز بۆ پارتی لەوما ئەو بەردەوام بوون و دبەردەوامن ب پرۆگرام و پلان بۆ دوورکرنا ئێزدیان و جوداکرنا وان ژنەتەوەیێ وان.
ئەڤان لایەنا ل بن ناڤێ دلسۆزیێ بۆ ئێزدیا مەزنترین پیلانا دگێڕن بۆ بێکەسکرنا ئێزدیا. مخابن مللەتێ مە ژی دتاریاتیێدایە ونزانیت ئەڤە یێ مە ژێک جودا دکەن وەکو ئێزدی و یێ مە ژ ئاخامە ڤەدکەن کو کوردستانە و مە ژ رەهوریشالێن مە دەردئێخن کو نەتەوا کوردە.
کورد و کوردستان نەبت و حزبێن نەتەوەیی نەبن و پارتی و رێبازا بارزانی نەبن ئەم تێرا فەتوایا مەلایەکی توندرەو ناکەین.
ئێزدیۆ رابە ژ خەوێ.
فەرەج میرزا بەتناری
