راپۆرتەهەوال: سەرۆک بارزانی ب هەلکەفتا سالڤەگەرا شۆرەشا ئیلۆنێ پەیامەک بەلاڤ کر
هەولێر — ب هەلکەفتا دەربازبوونا 65 سالان ب سەر هەلبوونا چرویسکا شۆرەشا مەزنا ئیلۆنێ، سەرۆک مەسعود بارزانی پەیامەک بەلاڤ کر و تێدا تەکەزی ل سەر رۆلێ مێژوویی و نیشتمانی یێ ڤێ شۆرەشێ کر د بزاڤا رزگاریخوازیا گەلێ کوردستانێ دا.
سەرۆک بارزانی د پەیاما خوە دا دیار کر کو شۆرەشا ئیلۆنێ ژ ئیرادە و باوەریبخوەبوون و ڕوومەتا مروڤێ کوردستانی پێکهاتبوو و ب ڕێبەرایەتیا بارزانییێ نەمر بوو بەرهەڤکەرەکی ب هێز و ڕێکخستی بۆ بەردەوامیا تێکۆشینا گەلێ کوردستانێ د دژایەتیکرنا زۆرداریێ دا.
دەقێ پەیاما سەرۆک بارزانی:
ئەڤرۆ شێشت و پێنج سال ب سەر هەلگیرسانا شۆڕشا مەزنا ئیلۆنێ دا دەرباز دبن؛ شۆڕشەکا سەرتاسەری کو تێدا پێشمەرگە، سیاسی، ڕێکخستن، زانایێن ئایینی، مامۆستا، ئەدیب، ڕۆشنبیر، گەنج، ئافرەت و تەڤایا تەخ و توێژێن کۆمەڵگەهێ بەشداری د د خەباتا نەتەوەیی و دیمۆکراسیخوازییا گەلێ خوە دا کر.
شۆڕشا ئیلۆنێ هەڵقوڵایا ئیرادە، باوەریبخوەبوون و روومەتا مرۆڤێ کوردستانی بوو؛ بناغەکێ مۆکم و ڕێکخستنی بوو بۆ بەردەوامیا تێکۆشانێ و رابوونا گەلێ کوردستانێ ل بەرامبەر زۆرداریێ. ئەڤ شۆڕشا مەزن، ب بەهایێن خوە یێن بلند و ب پێداگیری و خوەڕاگریا بێوێنە یا سەرکردایەتی، پێشمەرگە و جەماوەری، دۆزا ڕەوا یا گەلێ مە ب پێنگاڤێن مەزن بەرەڤ پێش بر. شۆڕشا ئیلۆنێ ل ژێر ڕابەرایەتیا بارزانییێ نەمر، بوو چاڤکانییا هێزێ و ئیلهامبەخش بۆ قۆناغێن پاشتر یێن خەباتا ڕزگاریخوازیا گەلێ مە و خەباتکارێن کورد ل تەڤایا پارچەیێن دیتر یێن کوردستانێ.
د شێست و پێنجەمین سالییا ئەڤێ شۆڕشا شکۆدار دا، سپاسییێن خوە بۆ ڕۆلێ مێژوویی یێ هەموو وان پێشمەرگە و خەباتکارێن قارەمان دوپات دکەم کو بەشداری د تۆمارکرنا ئەڤێ سەروەریا نیشتمانی دا کری؛ چ ئەو شەهیدێن نەمر ئەوێن د شۆڕشا ئیلۆنێ دا گیانێ خوە بەخشینە خاکا نیشتمانی و ئەوێن د ژیانێ دا نەماین، چ ئەو ڕۆڵێن سەربەرز ئەوێن هێشتا وەک شایەتحالێن زندی یێن مێژوویێ د ژیانێ دا ماین. ئەو قارەمانە هێڤێنێ ئاڤاکرنا سەروەریێ بوون بۆ گەلێ خوە و جهێ شانازیێ نە.
مەسعود بارزانی
٢٠٢٦\٩\١١
