ئارمانجا سەردانا ھەدەپێ یا باشوور ئاشكەرا بوو

ل گۆر داخوویانیا هەدەپێ شاندەكا وێ پارتیێ دێ سه‌ردانا کوردستانا باشوور بکه‌. شاندەیا هەدەپێ ب سه‌رۆکاتیا هه‌ڤسه‌رۆکێ وێ پارتیێ، سه‌زای ته‌مه‌ڵی، دایە و ژ ڤان که‌سان پێک دھێت: هه‌ڤسه‌رۆکێ کەجەدێ و پارلامه‌نته‌رێ ئاگری به‌ردان ئۆزتورک، به‌رده‌ڤکا فراکسیۆنا هەدەپێ ل پارلامه‌نتۆیا ترکیێ فاتما کورتولان، به‌رده‌ڤکا دیپلۆماسیا کۆمیسیۆنا ژنان یا هەدەپێ فه‌له‌کناز ئوجا، جیگرێ هه‌ڤسه‌رۆکێ هەدەپێ نازمی گور، پارلامه‌نته‌ر ئیمام تاشچه‌ر، ل نوونه‌رتیا هەدەپێ ل هه‌رێما کوردستانێ موزه‌ییه‌ن گونه‌ش و به‌رپرسێ ئۆفیسا هەدەپێ ل هه‌رێما کوردستانێ ئابید ئیکه‌.

ل گۆر داخوویانیا هەدەپێ، شاندەیا وان ب ئارمانجا پیرۆزباهیا پێکانینا کابینه‌یا نوو یا حکومه‌تێ، سه‌ردانا سه‌رۆکاتیا هه‌رێمێ و سه‌رۆکاتیا حکومه‌تا هه‌رێما کوردستانێ بکن.

ئه‌ڤ سه‌ردانا هەدەپێ بالکێشه‌. بێ گومان هه‌ر ئالیه‌ک کورد و کوردستانێ سه‌ردانا باشوورێ کوردستانێ دکه‌ و ل گه‌ل ده‌ستهلاتا کوردستانێ و ئالیێن سیاسی هه‌ڤدیتنا دکن. لێ ده‌ما هەدەپە ڤێ یه‌کێ بکه‌ بالکێشه‌ و گه‌ره‌ک مرۆڤ به‌حسا چه‌ند خالا بکه‌.
هه‌ر ئالیه‌ک سیاسی دکاره‌ ڕه‌خنا ل ئالیێن سیاسی و ده‌ستهلاتا باشوورێ کوردستانێ بکه‌. ئه‌ڤ یه‌ک گه‌له‌ک نۆرماله‌ و دڤێ بێ کرن ژی. لێ ده‌ما مرۆڤ دژمناتیا باشوورێ کوردستانێ و ده‌ستکه‌فتیێن نه‌ته‌وی ل باشوور بکه‌ و گه‌له‌ک مناسه‌به‌تان دا حه‌قاره‌تێ ل ڕێڤه‌برێن کوردستانێ بکه‌ و وان هه‌تا ڕاده‌یه‌کی ب خیانه‌تێ ئیتهام بکه‌، واته‌یا سه‌ردانا وان ژی دھێتە گوهه‌رتن و مرۆڤ ب ئاوایه‌ک دن ل ڤێ هه‌لوه‌ستا وان دنێره‌.

که‌سێن د شاندەیا هەدەپێ دا جھ دگرن ژی بالکێشن. ته‌مه‌لی، ھەڤسەرۆكێ وێ پارتیێ، د ده‌مه‌کی دا داخوویانیه‌ک د مه‌دیا جڤاکی دا ڕاگهاند و حه‌قاره‌ت ل که‌سایه‌تیا سه‌رۆک بارزانی کر. ئه‌ڤ یه‌ک ل بیرا هه‌رکه‌سه‌کیه‌. لێ ئیرۆ مرۆڤ بێژه‌ کو، هێزێن سیاسی سه‌ردانا هه‌ڤ دکن و دڤێ دیالۆگ ژی هه‌به‌. باشە ژ بۆ چ ڕۆژا ته‌مه‌ڵی حه‌قاره‌ت ب سه‌رۆک بارزانی کری وان ئالیان ده‌نگ نه‌کرن ؟

ئیمام تاشچه‌ر د کۆنفه‌رانسێن ڕۆژنه‌مه‌ڤانی دا، پەدەکێ ب دکتاتۆری ئیتهام دکه‌ و پشترا وه‌ک تشته‌ک نه‌بوویی وه‌سفێ باشوورێ کوردستانێ دده‌.

یانی ب کورت و کورمانجی هه‌لوه‌ستا پەکەکە/هەدەپێ ل هەمبه‌ر باشوورێ کوردستانێ و تایبه‌تی ل هەمبه‌ر پەدەکێ گه‌له‌ک خرابه‌ و وان ب خیانه‌تێ ئیتهام دکن. لێ ئیرۆ وه‌ک تشته‌ک نه‌بوویی سه‌ردانا وان دکن..

هەدەپە ده‌ما سوندخوارنا سه‌رۆکێ هه‌رێما کوردستانێ نێچیرڤان بارزانی، ژ بۆ ڕه‌ورسمێ هاتن ڤه‌خواندن، لێ نه‌هاتن. نه‌هاتنا وان ب هه‌لوه‌ست بوو. لێ ئیرۆ دخوازن پیرۆزباهیا جه‌نابێ وی بکن.

ڕاستیه‌ک هه‌یه‌ مرۆڤ چ جارا ده‌ریێن خوه‌ ل که‌سه‌کی ناگره‌، لێ دڤێ ئه‌وێن د وی ده‌ری ڕا ده‌رباس ببن ژی سه‌رێ خوه‌ بدن به‌ر خوه‌ و شه‌رمێ ژ خوه‌ ، داخوویانی و هه‌لوه‌ستێن خوه‌ بکن.

ده‌ما مرۆڤ ل که‌سێن د شاندەیا هەدەپێ دا ئەندامن به‌رچاڤ را ده‌رباس دکه‌، دیار دبە کو ئه‌و ب داخوازیا قه‌ندیلێ ڤێ سه‌ردانێ دکن. ئه‌ڤ ژی بالکێشیه‌ک دنه‌.

نووچه‌/ئەنالز
2019.09.05

نێرین / شیرۆڤە