ئەمریكایێ ل دلێ ئیرانێ دا

  بكوژێ کوردان و ئینسانێن عه‌ره‌ب و فارس قاسم سوله‌یمانی ژ ئالیێ ئەمریكایێ ڤە‌ هات کوشتن.  کوشتنا وی ل ئیرانێ و ل عیراقێ و ل هه‌موو دنیایێ د ناڤ شیعیان دا دەنگڤەدانەك‌ مه‌زن چێکر. ئیرانێ ل هه‌مبه‌ری ئەمریكایێ ده‌ست ب ته‌هدیتێن مه‌زن کر. لێ ئەمریكایێ ژی ژ تۆنا وان بلندتر به‌رسیڤ دا ئیرانێ. د ناڤ بوویه‌ران دا‌ عیراقێ گه‌له‌ک ئاشکه‌ره‌ دیار کر کو هه‌ڤالبه‌ندێن ئیرانێ یه‌، لۆما ژی د مه‌جلیسا عیراقێ دا بریار هات گرتن کو له‌شکه‌رێن ئەمریكایێ ژ عیراقێ ده‌رکه‌ڤن. به‌رسیڤا ئەمریكایێ ژی ئه‌ڤ بوو کو ئه‌و دێ ژ عیراقێ ده‌رنه‌که‌ڤن.

لێ کورد و سوونیێن عەرەب به‌شداری جڤینا مه‌جلیسێ نه‌بوون و ده‌نگ نه‌دان کو  له‌شکه‌رێن ئەمریكایێ ژ عیراقێ ده‌رکه‌ڤه‌.

هیچ شک نینە‌  کو گه‌له‌ک ئالیێن دن یێن ڤێ رووداوێ هه‌نه‌. دڤێ مرۆڤ پرئالی مژارێ شرۆڤه‌ بکه‌.

كه‌ره‌کته‌را قاسم سوله‌یمانی ب هه‌ر ئاوایی ئیرانێ ته‌عریف دکه‌. لۆما هه‌گه‌ر ئیران ناس نه‌به‌، قاسم سوله‌یمانی نایێ ناس کرن.

ئیرانا ئایتووڵاهان ئۆلیگارشیه‌کا ئۆلی یه‌…

ل ئیرانێ سالا ۱۹۷۹ئ دا‌ گوهه‌رتنا ره‌ژیمێ پێک هات. هه‌موو گه‌لێن ئیرانێ ل به‌ندێ بوون کو پشتی کو دیکتاتۆریا شاھی وه‌ره‌ رووخاندن، رژیمه‌کا‌ ده‌مۆکراتیک دێ ئاڤا ببه‌. لێ ووسا نه‌بوو. پشتی کو ر‌ژیما دیکتاتۆری یا سه‌کووله‌ر هات رووخاندن، ل جیێ وی ر‌ژیمه‌کا‌ ئۆلیگارشیک و تۆتالیته‌ر یا ئۆلی ئاڤا بوو.

لۆما ژی  ل ئیرانێ ر‌ژیم، نه‌بوو ر‌ژیما هه‌موو گه‌لێن مسلمان ژی. به‌س بوو ر‌ژیما شیعیان. لێ ده‌ما کو هه‌ر کو وه‌خت ده‌رباس بوو، ر‌ژیم نه‌بوو ره‌ژیما هه‌موو شیعیان ژی، ر‌ژیم بوو ئۆلیگارشیا ئایه‌توڵاهان و بورۆکراسیا له‌شکه‌ری و ئیستیخباراتێ. ب هه‌ر ئاوایی بوو دژمنێن نه‌ته‌وه‌یێن ل ئ̇رانێ. مافێن گه‌لان ناس نه‌کر.

ئیرانێ د ده‌ستپێکێ دا‌ ئیمپه‌راتۆریا ئیسلامی ژ بۆنا خوه‌ کر ئارمانج. لێ پشت را‌ ده‌رکه‌ت هۆلێ کو ئه‌و ئیمپه‌راتۆریا شیعیان دخوازه‌. د ناڤ شیعیان دا ژی ئه‌لیتا ئایه‌تووڵاهان بوون ده‌ستهلاتدار و دیکتاتۆر.

مەزلوومێن ده‌ما دیکتاتۆریا شاھی، بوون زالیم و ده‌ستهلاتدارێن فاشیست و ئۆلیگارشیک و تۆتالیته‌ر. ده‌ست ئاڤێتن ژیانا هه‌موو ئینسانان کو ژیانا هه‌موو ئینسانان کۆنترۆل بکن. ده‌ستهلاتداریه‌کا هه‌سنی چێ کرن.

ئه‌و که‌س و هێزێن کو د رووخاندنا دیکتاتۆریا شاھی دا‌ ببوون ئالیکار، د ناڤ ده‌مه‌کا‌ کورت دا‌ هاتن تەسفیه‌ کرن. ب تایبه‌تی ژی تەسفیا کوردان بوو ئارمانجا رژیمێ.

به‌رپرسیارێن رژیمێ ژی، وه‌ک كه‌ره‌کته‌را رژیمێ هاتن په‌ژراندن. ده‌زگه‌هێن ده‌وله‌تێ گۆر ڤێ كه‌ره‌کته‌رێ ئاڤا بوون و ده‌ستهلاتدار بوون. ئه‌و که‌س و ده‌زگه‌هێن بوون به‌رپرسیار ژی، مرۆڤکوژ و باربار بوون. ژ کووشتنا مرۆڤان کێفخوه‌ش بوون.

ل ئیرانێ سالێن بهووری هه‌ر رۆژ ۳٥ که‌س دهاتن ئیعدام کرن. پاسداران و پارازڤانێن شۆره‌شێ ب کێیفی ئینسان کوشتن و هین ژی دکوژن. ئیعداما کوردان ب تایبه‌تی دۆم دکه‌.

قاسم سوله‌یمانی یه‌ک ژ ڤان که‌سێ مرۆڤکوژ و ب هه‌ر ئاوای

که‌سه‌کی ده‌ستهلاتدار بوو.

ئیران دژمنێ ئەمریكایێ و ئه‌ورووپایێ و سیسته‌ما سۆسیالیست و دنیایا ئیسلامی یه‌…

ر‌ژیما ئیسلامی و دیکتاتۆریا  ئایه‌تووڵاهان ژ بۆنا کو خوه‌دیێ ئارمانجا ئیمپه‌راتۆریا ئیسلامی بوو، ژ هه‌موو دنیایا ئیسلامی را‌ بوون دژمن.

ر‌ژیم  د هه‌مانده‌م دا‌ بوو دژمنێ ئەمریكایێ و ئه‌ورووپایێ ژی. دژمنتیا ئیرانێ ل دژی ئەمریكایێ تێ فاهم کرن، له‌ورا دیکتاتۆریا شاھی ب ئەمریكایێ را گرێدایی بوو. لێ دژمنتیا وان یا ئه‌ورووپایێ نه‌خوه‌زایی بوو. خومه‌ینی ل ئه‌ورووپایێ ژیان کربوو.

ئایه‌توڵاهان ژ بۆنا کو ئۆلیگارشیه‌کا ئیسلامی ئاڤا کرن، لۆما ژی بوون دژمنێ یه‌کیتیا سۆڤیه‌تان و چینێ ژی.

ئه‌و دژمنتیا بوو سه‌ده‌م کو ب هه‌زاران له‌شکه‌رێن ئەمریكایێ بێن کووشتن.

ئه‌ڤ د هه‌مانده‌م دا دهات وا‌تایا ئیعلانکرنا شه‌رێ سیاسی و دیپلۆماتیک و له‌شکه‌ری ل دنیایێ. ئه‌ڤ یه‌کا ب خوه‌ ل هه‌رێما رۆژهلاتا ناڤین و ل دنیایێ شه‌ر فرۆشی و فره‌هکرنا هه‌گه‌مۆنیایا ده‌وله‌تا ئیرانێ یه‌.

د ئه‌ڤ سیاسه‌تا را‌ژیما ئایه‌تووڵاهان دا‌ قاسم سوله‌یمانی خوه‌دیێ رۆله‌کی گرینگ بوو.

قاسم سوله‌یمانی دژمنێ کوردان بوو…

ده‌ما کو ئایه‌تووڵاهان ل ئیرانێ بوون ده‌ستهلاتدار، گه‌لێن ئیرانێ و کوردان باوه‌ر کر کو ل ئیرانێ ده‌مۆکراسیه‌کا پلورال دێ ئاڤا ببه‌، کوردستان، هه‌رێمێن عەرەبان، به‌لووجیان دێ ببن ئۆتۆنۆم. ووسا نه‌بوو. ل ئیرانێ ماف و ئازادیێن ئینسانان، مافێن نه‌ته‌وه‌یان و نه‌ته‌وه‌یا کورد ب هه‌ر ئاوایی هاتن په‌رچقاندن.

پشتی دیکتاتۆریا شاھی هات رووخاندن، کورد ل کوردستانێ دێفاكتۆ ده‌ستهلاتدار بوون. لێ د داویا  سالا ۱۹۷۹ دا ر‌ژیما ئایه‌تووڵاهان ئێریشی کوردستانێ کر.

وێ ده‌مێ کورد مه‌جبوور بوون کو ده‌ست ب شه‌رێ پێشمه‌رگه‌تی بکن. هه‌زار مخابن پشتی ده‌مه‌کێ شه‌رێ پێشمه‌رگه‌تی شکه‌ست خوار.

پارتی و به‌رپرسیارێن رۆژهه‌لاتا کوردستانێ چوون ل باشوورێ کوردستانێ جیوار بوون.

ل باشوورێ کوردستانێ ژی، ب بریارا قاسم سله‌یمان تەڤكوژی پێک هاتن.

ده‌وله‌تا ئیرانێ ب ده‌ستێ قاسم سوله‌یمانی، ل رۆژهه‌لاتا کوردستانێ تەڤكوژی پێک ئانی. ل سه‌ر ناڤێ پەکەکێ رێخستن ئاڤا کر. پشتگریا پەکەکێ کر. ل باشوورێ کوردستانێ ب وا‌سته‌یا یەنەکێ ل سه‌ر ته‌ڤگه‌را کوردستانێ ده‌ستهلاتداری و باندۆر دانی. د داگیركرنا که‌رکوکێ دا‌ ب هێزا حەشدا شەعبی رۆله‌کی گرینگ لێهیست. ل رۆژاڤایێ کوردستانێ خرابی کر. ل سووریێ ب ته‌ڤایی ژ بۆنا کو رژیما بەعسێ بژی تەڤكوژی کر. ئه‌و وه‌ک قه‌سابێ حه‌له‌بێ و حەمایێ و حومسێ هات ناس کرن. ل باکوورێ کوردستانێ ژی پلانکارێ شه‌رێ خه‌نده‌کانه‌. ژ بۆنا کو پێشیا مداخه‌له‌یا ده‌وله‌تا ترک ل سووریێ بگره‌، ئه‌ڤ شه‌رێ خه‌نده‌کان ئۆرگانیزه‌ کر. د ڤان شه‌ران دا ب هه‌زاران جوانێن کوردستانێ هاتن کووشتن.

ئیرانێ دژمنتیا گه‌لێن ل ئیرانێ و مخاله‌فه‌تا هووندر، ب ده‌ستێ قاسم سوله‌یمانی دمه‌شاند…

وه‌ک من ل ژۆر ژی دیار کر، ئیران دژمنێ هه‌موو گه‌لێن ئیرانێ یه‌. ل ئیرانێ ماف و ئازادیێن شه‌خسی و کۆڵه‌کتیف هاتنه‌ خه‌سپ کرن.

ئیران ئیجازه‌ ناده‌ کو مخه‌له‌فه‌تا نه‌ته‌وه‌یێن بنده‌ست، مخاله‌فه‌تا ده‌مۆکرات و لیبه‌رال و هه‌تا یێن ئیسلامی کو نه‌ هه‌ڤالێن ئایه‌تووڵاهانه‌، ژیانا خوه‌ بدۆمینه‌.

لۆما ژی گه‌لێن ئیرانێ ژ بۆنا کو داخوازێن خوه‌ بدەست بخب سه‌رلدانا سڤیل پێک ئانین. هه‌زار مخابن هه‌ر سێ سه‌رهلدانێن سڤیل ژی هاتن شکاندن. ب̇ هه‌زاران که‌س هاته‌ کووشتن.

هێزێن کو قاسم سوله‌یمانی ژێ را سه‌رۆکاتی دکر، مخاله‌فه‌تا هووندر و ته‌ڤگه‌را نه‌ته‌وه‌یێن بنده‌ست نەهشت کو پێش بکه‌ڤن. پێشیا وان گرت. خرابی لێ کر.

 ل ئیرانێ لنگ بوون سه‌ری و قاسم سوله‌یمانی به‌رپرسێ لنگان بوو…

ل ئیرانێ سنفا ئاریستۆکرات یا بوورژووازی و جڤاکی هات تەسفیه‌ کرن. ئاریستۆکراسیا ئۆلی ژی ب زهنیه‌تا فاشیزان و ئۆلیگارشیک هات تەسفیه‌ کرن، به‌س گرووبه‌کس فاشیست و ئۆلیگارشیک ما.

ب واته‌یه‌که‌ دن ل ئیرانێ لنگ بوون سه‌ری. ڤێ یه‌کێ ژی هۆڤیتی و تەڤكوژی و بارباری و فاشیزم پێش خست.

قاسم سوله‌یمنائی ئاڤاکارێ که‌مه‌ره‌ شیعا و خوه‌دیێ کۆلۆنی/ئه‌یاله‌تێن نوو یێن ئیرانێ بوو…

ئیرانێ ژ بۆنا که‌مه‌را/ھیلالا شیعیان ئاڤا بکه‌، هه‌موو ده‌رفه‌تێن خوه‌ یێن ده‌وله‌تبوونێ پێک تینه‌.  ل هه‌موو ده‌وله‌تان و وه‌لاتان شیعیان ئۆرگانیزه‌ دکه‌، چه‌کدار دکه‌، ئالیکاریا مالی دده‌ وان. ئه‌و ئۆرگانیزاسیۆنێن شیعیان ل هه‌مبه‌ری گروپێن مخالیف و هێزێن ئەمریكایێ و ئه‌ورووپایێ ته‌رۆرێ پێک تینن.

ئیرانێ ب ریا که‌مه‌را شیعیان، لوبنان، یه‌مه‌ن، عیراق، سووریه‌، فلیستین ژ بۆنا خوه‌ کریه‌ کۆلۆنی/ئه‌یاله‌ت.  ل وان وه‌لاتان ده‌ستهلاتداره‌. حکومه‌تا ئاڤا دکه‌ و حکومه‌تا خراب دکه‌.

د ڤێ مژارێ دا ژی قاسم سوله‌یمانی به‌رپرسیار بوو.

ئه‌و کارا  ب هێزێن کو د بن ده‌ستهلاتداری و هه‌گه‌مۆنیایا وی ده‌ یه‌ دمه‌شیا.

قاسم سوله‌یمانی سه‌رۆکێ هێزا پارازگه‌ر یا شۆره‌شێ و هێزا قودسێ، و حەشدا شەعبی بوو…

قاسم سوله‌یمانی ب ڤان هێزان ته‌رۆرێ چێ دکر، تەڤكوژی پێک دانی. ئه‌یاله‌ت ئاڤا کر و برێڤه‌ بر. د ناڤ گه‌لێن رۆژهلاتا ناڤین دا ترسه‌کا بێ سینۆر چێ کر و فاشیزما ئیسلامی مه‌شاند.

قاسم سوله‌یمانی ئافراندارێ شه‌رێ وه‌کاله‌تێ یه‌…

قاسم سوله‌یمانی، مه‌تۆده‌کی نوو یێ شه‌ر ئافراد. ئه‌و ژی شه‌رێ وه‌کاله‌تێ یه‌. وی ل هه‌موو وه‌لاتان شه‌رێ وه‌کاله‌تێ مه‌شاند. ل لووبنانێ، ل یه‌مه‌نێ، ل سوور‌یێ، ل عیراقێ د ڤان شه‌ران دا‌ گه‌له‌ک سه‌رکه‌فتی بوو. ب ئاوایه‌کی رێكخستنی ئینسان کوشتن. که‌سێ ژی نکاری پێشیا وی بگره‌.

قاسم سوله‌یمانی داگیركەرێ که‌رکوکێ یه‌ و ژ بۆنا کو باژارێ سلێمانیێ ژ ده‌وله‌تا فه‌ده‌رال‌ یا کوردستانێ ڤه‌قه‌تینه‌ هه‌ول دا…

بۆنا ڤێ ژی د ناڤ یەنەکێ دا گروپه‌کا‌ خیانه‌تێ چێ کر. پشتی ره‌فه‌راندوومێ سه‌رخوه‌بوونا کوردستانێ،  هێزا حەشا شەعبی و گروبا خیانه‌تێ که‌رکوک داگیر کر. خوه‌ستن کو ده‌وله‌ته‌ فه‌ده‌رال یا کوردستانێ تێک ببن. لێ ل هه‌مبه‌ری پێشمه‌رگه‌یان ب سه‌رنه‌که‌تن.

ئەمریكایێ ل دلێ ئیرانێ خست و قاسم سوله‌یمانی کووشت…

د ناڤبه‌ینا ئەمریكایێ و ئیرانێ ب ده‌هان سالانه‌ کو شه‌رێ سیاسی، ئابۆری، له‌شکه‌ری دۆم د̇که‌. د ئه‌نجامێ دا‌ ئەمریكایێ ل دلێ ئ̇رانێ دا و قاسم سوله‌یمانی کوشت. له‌ورا ئه‌و دلێ ئیرانێ بوو. ئیرانێ خواست کو به‌رسیڤا قاسم سوله‌یمانی بده‌. لێ ئه‌و به‌رسیڤا به‌دیلێ قاسم سوله‌یمانی نه‌بوو.

دیاره‌ کو شه‌رێ د ناڤبه‌ینا ئه‌مه‌ریکا و ئیرانێ دا دێ ب ئاوایه‌کی دن بدۆمینه‌.

دیاربەكر 2020.01.08

ئیبراهیم گوچلو

نێرین / شیرۆڤە