به‌ڵگه‌نامەیێن دیرۆكى دناڤبه‌را ڤه‌شارتنێ و پاراستنێ دا

 سه‌ردار هێتوتى

به‌ڵگه‌نامێن دیرۆكى دناڤبه‌را ڤه‌شارتنێ و پاراستنێ دا، دیرۆكێ وندا دكه‌ن

 ئه‌ڤ وه‌ڵاتێ خۆدان دیرۆك، د هه‌مى بیاڤێن دانه‌ناسینا ڕاستیا دیرۆكى دا یێ ژار و به‌له‌نگازه‌. ڤه‌كوله‌رێن شوینه‌وارى ب كارێ خۆ یێ دیاركرنا ژیێ هه‌ر شوینه‌واره‌كى نارابن،  چونكى حكومه‌ت نه‌یا هاریكاره‌.

ھەر چەندا كو ئه‌ڤرۆ زێده‌تر ژ 20 زانكۆیان ل كوردستانێ هه‌نه‌، لێ دیرۆكنڤیس نه‌شیاینه‌ شاشیێن دیرۆكى یێن د ناڤا دیرۆكا مه‌ دا و ئه‌وێن كو ژ لایێ نه‌یارێن كوردڤه‌ هاتیه‌ نڤیسین سه‌ره‌ڕاست بكه‌ن.  هه‌روه‌سا ڤه‌كوله‌رێن ده‌ستنڤیسان ژى نه‌شیاینه‌ بگه‌هنه‌ وان ده‌ستنڤیسێن كه‌ڤنار،  چونكى گه‌له‌ك ژ وان ژ لایێ  بكران ڤه‌ ل ڤى وه‌ڵاتى هاتینه‌ كرین و ل به‌غدایێ یان جهێن دیتر هاتینه‌ فروتن و هنده‌ك ژى ژ وان هێشتا د ناڤا سندوقێن گرتى و د قولاچكێن خانیان دانه‌ و خۆدانێن وان نه‌یێن به‌رهه‌ڤن وان به‌ڵگه‌نامەیان راده‌ستى كه‌سێن شه‌هره‌زا بكه‌ن.

 له‌ورا دبێژم: زیندانكرنا ده‌ستخه‌ت و به‌ڵگه‌نامەیان د ڤى سه‌رده‌مى دا دكه‌ڤیته‌ د خانه‌یا بێفامیێ دا چونكى زیانێن مه‌زن دگه‌هینه‌ دیرۆكێ و ڤه‌كوله‌ران،  ژ به‌ر كو ئه‌و نه‌شێن ڤه‌كولینان ل سه‌ر ئاستێن جدا بكه‌ن.

 پاراستنا وان به‌ڵگه‌نامەیا و ده‌ستنڤیسان د ناڤا سندوق و خزینك و ره‌فێن  په‌رتۆكخانان دا چ خزمه‌تێ ناگه‌هینیت، به‌لكو خزمه‌ت ئه‌وه‌ كو ب رێكا كه‌سێن ڤه‌كوله‌ر بشێن بگه‌هینه‌ دیرۆكا ڕاست یا زانین و زانست و شوینه‌وار و قه‌ومینێت سه‌رده‌مێ كه‌ڤن، له‌ورا باشترین خزمه‌ت و پاراستن به‌ڵاڤكرنا وانه‌ د ناڤه‌ندێن فه‌رمى یێن وه‌كى ڕۆژنامه‌ و گۆڤار و تیڤى یاندا.

لێ ده‌مه‌كه‌ من گوهـ ل وێ یه‌كێ بویه‌ كو خۆدانێن هنده‌ك به‌ڵگه‌نامەیان نه‌یێن به‌رهه‌ڤن كو وان به‌ڵگه‌نامەیێن ژ باپیرێن وان بۆ ماى ڕاده‌ستى ڤه‌كوله‌ران بكه‌ن.

 دێ پرسم: هه‌ر به‌ڵگه‌یه‌ك خۆدانێ وێ تا چ سه‌رده‌م دێ شێت پارێزیت؟ ئایا دزانین ڤه‌هێلانا وان چ تاوانه‌كه‌ ده‌رحه‌قێ دیرۆكێ دا؟ ئایا پشتى وى كور و نفشێ دیڤ دا یێ به‌رهه‌ڤه‌ وان به‌ڵگه‌نامەیان بپارێزن و بهایێ وان بزانن؟ له‌ورا مه‌ هیڤیه‌ به‌رى كو ئه‌و به‌ڵگه‌نامەیێن دیرۆكى ژ ناڤ بچن بلا خۆدانێن وان بده‌نه‌ ده‌ست كه‌سێن شه‌هره‌زا د ڤى بیاڤى دا و ئه‌ڤرۆ ژى ل سه‌ر ئاستێ ده‌ڤه‌را به‌هدینان سه‌نته‌رێ قۆبه‌هان بۆ ڤه‌كولینا به‌ڵگه‌نامەیا و ده‌ستنڤیسان هه‌یه‌ و تاكه‌ لایه‌نه‌ كو گرنگیێ ب وان به‌ڵگه‌یان دده‌ و بلا بگه‌هینه‌ ده‌ستێن شه‌هره‌زایێن ڤى بیاڤى د سه‌نته‌رێ ناڤبرى دا، داكو ژناڤچوونێ بهێنه‌ پاراستن.

دھۆك

2021.01.16

نێرین / شیرۆڤە