بێژنە پەكەكێ ڤێجا بەسە

باشوورێ کوردستانێ ده‌ستکه‌فتیه‌ک هه‌ری به‌ر ب چاڤ ئا نه‌ته‌وه‌یا کورده‌. باشوور تێکبچه‌ هه‌مێ هێڤیێن کوردا یێن سه‌دسالا ژی وندا دبه‌. باشوور د ڕێیا سه‌رخوه‌بوونێ دا سه‌ربکه‌ڤه‌ کوردستان ڕزگار دبه‌ و هێڤیێن نه‌ته‌وا کورد ب هێز دبن و خه‌ونا کوردا ل سه‌ر ڕوویێ ئه‌ردێ دبه‌ ڕاستیه‌ک.

ده‌ما مرۆڤ د ڤێ چا‌رچۆڤه‌یێ دا‌ ل باشوور بنه‌ره‌ و نرخاندنا بکه‌، دێ پتر بکاربه‌ هه‌لوه‌ستا هێزێن چه‌کدار ل ده‌ڤه‌رێ و له‌پتا وان بنرخینه‌ و ل هەمبه‌ر بوویه‌ران ببه‌ خوه‌دی هه‌لوه‌ست.

گه‌ره‌ک هه‌یینا چه‌کدارێن پەکەکێ د ڤێ په‌رسپه‌کتیفا سیاسی دا‌ بێ شرۆڤه‌ کرن. ژ به‌ری هه‌ر تشته‌کی باشوورێ کوردستانێ نه‌ قادا خه‌باتا پەکەکێ یه‌. لێ مخابن پەکەکە ب سیاسه‌تا خوه‌ یا خه‌له‌ت ده‌ست تاڤێژه‌ ناڤا گه‌له‌ک ئالیێن سیاسی ل باشوور، ژ بۆ ڤێ ژی هنده‌ک ئالیێن سیاسی ده‌ما خه‌له‌تیا پەکەکێ دبینن ژی نه‌وێرن ده‌نگێ خوه‌ ده‌رێخن.

نها ڕاستییه‌ک ڕوو دایه‌. چه‌کدارێن پەکەکێ ئێریشێ هێزه‌کا پێشمه‌رگا کریه‌ و د ئه‌نجام دا پێشمه‌رگه‌یه‌ک شه‌هید بوویه‌. چه‌کدارێن پەکەکێ ل شنگالێ خوه‌ د بن سها حه‌شدا شه‌عبی دا‌ دپارێزن و وه‌ک ملیسه‌ک حه‌شدا شه‌عبی ته‌ڤدگه‌رن ژیان ل ئێزدیان زه‌حمه‌ت کرنه‌ و ناهێلن خه‌لک ڤه‌گه‌رن سه‌ر جھ و وارێن خوه‌.

ل باکورێ کوردستانێ و به‌شێن دن گه‌ره‌ک هه‌لوه‌ستا ئالیێن سیاسی، سییاسه‌تمه‌دار و ڕه‌وشه‌نبیرا گه‌له‌کی ڤه‌کری به‌ و یه‌ک تشته‌کی بێژن و ب هه‌لوه‌ستا خوه‌ ڕێ ل خرابی و ته‌خریباتێن پەکەکێ ل باشوور بگرن. دڤێ بێژن: پەکەکە به‌سه‌ و بسه‌کنه‌. ژ ڤێ پێده‌ هه‌ر هه‌لوه‌ستا تێ دانین دبه‌ پاله‌ک ژ پەکەکێ ڕا‌ . گه‌ره‌ک ئه‌ڤ یه‌ک ڤه‌کری بێ زانین.

نا شه‌رێ “براکوژ”یه‌ یان تشته‌ک دنه‌ هه‌موو ڤاله‌یه‌ دێ پەکەکە چ جارا گوھ ناده‌ که‌سه‌کی یا دزانێ دخوینه‌. قه‌ندیل د ڕۆژا مه‌ دا‌ ئاسته‌نگا هه‌ری مه‌زنه‌ ل هەمبه‌ر ده‌ستخستنا مافێن نه‌ته‌وەیی.

ژ ئالیه‌ک دن ڤه‌ هنده‌ک ئالیێن به‌رێ دگۆتن کو باشوور بیبۆکا چاڤێ مه‌یه‌، ئیرۆ ژ بۆ به‌رژه‌وه‌ندیێن بەسیت ل هەمبه‌ر کریارێن پەکەکێ بێ ده‌نگ دمینن و د بن سها هەدەپێ دا‌ بوویه‌را دنرخینن. یانی پشتگریا پەکەکێ دکن و ب ڤی ئاوایی دبن شریکێ کریارێن پەکەکێ.

دڤێ ئه‌م زه‌لال بن ئه‌م ئه‌و که‌س و ئالیێن دبێژن ئه‌م ل سه‌ر ڕێبازا بارزانی هه‌ولدانا سیاسه‌تێ دکن، دڤێ زه‌لال بن و نابە خوه‌ هرڤه‌ ورڤه‌ ببن بینن ژ بۆ به‌رژه‌وه‌ندیه‌ک بەسیت ل دژێ به‌رژه‌وه‌ندیێن کوردستانی و نه‌ته‌وەیی ببن خوه‌دی هه‌لوه‌ست.

گه‌ره‌ک ئه‌م بکاربن کریارا پەکەکێ ل باشوورێ کوردستانێ شه‌رمه‌زار بکن. دڤێ یان پەکەکە ژ باشوور ده‌رکه‌ڤه‌ یان ژی ڕێزێ ل سه‌روه‌ریا حوکومه‌تا کوردستانێ بگره‌ و ل سه‌ر ئاخا د بن ده‌ستهلاتداریا حوکومه‌تا کوردستانێ دا ل گۆرا یاسایێن هه‌یی بمینه‌.

دڤێ ب یه‌ک ده‌نگی بێژن پەکەکێ ڤێجا به‌سه‌.

ئیسکان ئایدن

دامه‌زه‌رێ پارتیا ده‌مۆکرات ئا کوردستانا ترکیه‌

پدک-ت

نێرین / شیرۆڤە