دەمرتاش: دەولەتا مە جمهوریەتا ترکیێ یە

“ژ گوهه‌رتنا مه‌زن را ئاماده‌بن. بلا هه‌رکه‌س ده‌ستبده‌ هه‌ڤ و ل ته‌نشتا هه‌ڤودو بسه‌کنن. پیڤانا مه‌ یا هه‌ڤبه‌ش “جومهوریه‌تا ده‌مۆکراتیک” ه‌. مالامه‌ یا “هه‌ڤبه‌ش ترکیێ یه‌. ده‌وله‌تا مه‌ یا هه‌ڤبه‌ش جومهوریه‌تا ترکیێ یه‌.

ل باکورێ کوردستانێ کێشه‌یاکا جڤاکی هه‌یه‌ کو، که‌سه‌ک هه‌ولناده‌ به‌حسا وێ بکه‌. به‌شه‌ک ژ جڤاکێ دایه‌ دووڤ سیاسه‌تا په‌که‌کێ، په‌که‌که‌ و هه‌موو ئالیێن پێڤه‌ گرێدایی چ بێژن ئه‌وه‌. ئیعتراز نینه‌. به‌رێ خوه‌ بدن سیاسه‌تا په‌که‌کێ گه‌لۆ ئه‌ڤ سیاسه‌ت چه‌وانه‌ و چیه‌؟ ئه‌و سیاسه‌ت ل دژێ کی تێ کرن؟

به‌ری هه‌ر تشته‌کی د بنگه‌هێ سیاسه‌تا په‌که‌کێ دا دژبه‌ریا ده‌وله‌تا ترک نینه‌ و به‌ره‌ڤاژی سیاسه‌تا په‌که‌کێ هێڤێنێ خوه‌ ژ که‌مالیزمێ وه‌رگرتیه‌ و پاراستنا ده‌وله‌تێ ژ خوه‌ره‌ کریه‌ ئارمانجا سه‌ره‌کی. ئه‌ڤه‌ ٤۰ سالن جڤاکا کورد تێکدده‌، هه‌ولدده‌ کوردا د ناڤ ده‌وله‌تا ترکی دا بحه‌لینه‌. فۆرموولا سیاسه‌تا په‌که‌کێ و هه‌موو داموده‌زگه‌هێن ب وێ ڤه‌ گرێدا یی ئه‌ڤ سیاسه‌ته‌یه‌.

هه‌ده‌په‌ د چارچۆڤه‌یا سیاسه‌تا په‌که‌کێ دا ڕۆژه‌کی ل هه‌مبه‌ری ده‌وله‌تێ و سیاسه‌تا ده‌وله‌تێ یا دژێ کوردا ده‌رنه‌که‌تیه‌ و ده‌رناکه‌ڤه‌ ژی. دژاتیا حوکومه‌تێ، ئاک پارتیێ و ئه‌ردۆگان دکه‌. ئه‌ڤ یه‌ک وه‌لێ تێ فام کرن کو دژاتیا ده‌وله‌تێ دکه‌. نها ل ترکیێ، جه‌هه‌په‌، چه‌پێن ترک و چه‌پێن ناسیۆنالست ژی هه‌می دژی ده‌ستهلاتا ئاک پارتیێ نه‌، لێ ئه‌و هیمێن ده‌وله‌تا ترک یا کو ل سه‌ر ژناڤبرن و ئینکارا کوردا هاتیه‌ ئاڤاکرن دپارێزن. ترسا وان یا هه‌ری مه‌زن ئه‌وه‌ کو ئه‌ڤ هیمێن بنیاتا ده‌وله‌تێ ڕۆژه‌کی بهه‌رفن. هه‌ده‌په‌ ژی به‌شه‌ک ژ ڤێ سیاسه‌تێ یه‌.

ئیرۆ ئاک پارتی ده‌ستهلاتا و نوونه‌رتیا ده‌وله‌تێ دکه‌، سبه‌هی دبه‌ پارتیه‌ک دن وه‌ره‌ سه‌ر ده‌ستهلاتێ. لێ ژ بۆ جڤاکا کورد ژ ئالیێ مافێن نه‌ته‌وه‌یی ڤه‌ تشته‌ک نایێ گوهه‌رتن. ژ به‌ر کو، هه‌ده‌په‌ ژی د ناڤ دا، هه‌موو پارتی خوه‌دیێ به‌رنامه‌یه‌کی نه‌ و ڤه‌کری دبێژن کو، ده‌ما ببن ده‌ستهلات دێ چ بکن. لێ د ڕۆژه‌ڤا وان یا سیاسی دا پرسا کورد نینه‌. هه‌ده‌په‌ ژی وه‌ک پارتیه‌ک یا موخاله‌فه‌تێ ته‌ڤدگه‌ره‌ و ژ بۆ مافێن کوردان نه‌ خوه‌دیا چو به‌رنامه‌یه‌کی یه‌.

ژ ئالیه‌ک دن ڤه‌ د ناڤا هه‌ده‌پێ دا ئه‌ڤه‌ ده‌مه‌که‌ زرنا ده‌مرتاش تێ لێدان. هه‌تا د گه‌له‌ک جڤاتان دا پرانیا خه‌لکێ گرێدایی هه‌ده‌پێ ژ ئۆجه‌لان پتر به‌حسا ده‌مرتاش دکن و وی ژ ئۆجه‌لان پتر دحه‌بینن.

سه‌لاحه‌دین ده‌مرتاش د گرتیگه‌هێ دا ڕۆژانه‌ دیتن و هه‌لوه‌ستێن خوه‌ ب داخوویانیا و ب ڕێیا مه‌دیایا جڤاکی ڕادگه‌هینه‌. چو ئاسته‌نگ ژێ ڕا نینن. ده‌مرتاش نها ژ به‌رێ پتر پۆپووله‌ره‌.

ده‌مرتاش هه‌ری داوی تویته‌ره‌ک ڕاگه‌هاند و تێ دا دبێژه‌: “ژ گوهه‌رتنا مه‌زن ڕا ئاماده‌بن. بلا هه‌رکه‌س ده‌ستبده‌ هه‌ڤ و ل ته‌نشتا هه‌ڤودو بسه‌کنن. پیڤانا “مه‌ یا هه‌ڤبه‌ش “جومهوریه‌تا ده‌مۆکراتیک” ه‌. مالامه‌ یا هه‌ڤبه‌ش ترکیێ یه‌. ده‌وله‌تا مه‌ یا هه‌ڤبه‌ش جومهوریه‌تا ترکیێ یه‌.

گه‌لۆ ئه‌ڤ گۆتار هه‌وجه‌یی نرخاندنه‌کێ یه‌؟ چ جوداهی د ناڤبه‌را ڤێ گۆتارێ و گۆتارێن سه‌رۆکێن پارتیێن ترک دا هه‌یه‌. ئه‌ردۆگان ژی، باخچه‌لی ژی، کلچدارۆگلو ژی هه‌موو ژی هه‌ر ڤێ یه‌کێ دبێژن. ده‌مرتاش ڕاستیا خوه‌ دبێژه‌، لێ کێشه‌ ئه‌وه‌ کو کورد ڤێ یه‌کێ تێناگه‌هن. جڤاک هاتیه‌ گێژ کرن. ژ به‌ر هندێ ژی ئه‌ڤ گۆتن گه‌له‌ک نایێن شرۆڤه‌ کرن. پارتیێن کورد ب خوه‌ ژی گه‌له‌ک گوه نادن ڤان گۆتنا و شرۆڤه‌یه‌کێ ل سه‌ر ناکن. گه‌لۆ ژ بۆ چ پارتیێن کورد بێ ده‌نگ دمینن؟

گه‌له‌ک ڤه‌کری سه‌لاحه‌دین ده‌مرتاش هه‌ولدده‌ کو شڤانه‌تیا که‌رییه‌کێ په‌زی بکه‌ و به‌رێ وی په‌زی بده‌ هه‌ڤشییێ ده‌وله‌تێ.. رێیا ته‌ ڤه‌کریبه‌…

نێرین / شیرۆڤە