سەردانا مەسرور بارزانی و ئالا کوردستانێ

سه‌ردانا سه‌رۆکوه‌زیرێ کوردستانێ یا ترکیێ‌ و هه‌ڤدیتنا دگه‌ل وه‌زیرێ ده‌رڤه‌ یێ ترکیێ‌ و د گه‌ل سه‌رۆککۆمار ئه‌ردۆگان را‌ پێکانین خوه‌دییێ گرنگیه‌ک تایبه‌ته‌.

وه‌ک تێ زانین پشتی حوکومه‌تا هه‌رێما کوردستانێ ب سه‌رۆکاتیا مه‌سرور بارزانی دا هاتی دامه‌زراندن، ئه‌و ژ ئالیێ ترکیێ‌ ڤه‌ هاتبوو ڤه‌خواندن. لێ مه‌رجێن هه‌رێمێ و بوویه‌رێن ل عیراقێ و رۆژاڤایێ کوردستانێ روو دایین بوو سه‌ده‌مه‌ک کو ئه‌ڤ سه‌ره‌دان ده‌مه‌کی ده‌ره‌نگ که‌ت.

سه‌ردانا سه‌رۆکێ حوکومه‌تا کوردستانێ یا ترکیێ‌ ب ئاوایێن جودا هاته‌ نرخاندن. هنده‌ک ئالیێن سیاسی ب پۆپولستی بوویه‌ر نرخاندن و ل گۆرا سیاسه‌تا خوه‌ یا ئیفلاسکری هه‌ولدان سهه‌کێ بێخن سه‌ر ڤێ سه‌ردانێ و ڤێ بوویه‌را ئه‌رێنی.

دان خوویاکرن کو نه‌ ده‌ما ڤێ سه‌ره‌دانێیه‌ و سه‌ده‌م ژی هه‌لوه‌ستا ترکیێ‌ یا ل رۆژهلاتێ فراتێ و رۆژاڤایێ کوردستانێ دان نیشاندان. ژ خوه‌ گه‌له‌ک ڤه‌کریه‌ کو ل کوردستانا باشوور و تایبه‌تی پارتیا دەمۆکراتا کوردستانێ (پەدەکە) چ بکه‌ بلا بکه‌ چ جارا ژ ئالیێ سیاسه‌تا پەکەکێ و ده‌ردۆرا وان ڤه‌ ب ئه‌رێنی نایێ نرخاندن. سیاسه‌تا پەکەکێ هه‌ر گاڤه‌کێ، هه‌ر هه‌لوه‌سته‌کی، هه‌ر کریاره‌کێ ژ بۆ خوه‌ مه‌شروع  و راست، ژ بۆ خه‌ینێ خوه‌ ژی چه‌وت دنرخینه‌. ئه‌گه‌ر هه‌تا ڤێ گاڤێ ئه‌ڤ سیاسه‌تا پەکەکێ و ده‌ردۆرا وان نه‌هاتبه‌ فام کرن ئه‌ڤ ژی کێشایا وانه‌ کو ڤێ سیاسه‌تێ ناخوازن تێ بگەهن.

ژ به‌ری هه‌ر تشته‌کی سیاسه‌تا ده‌ستهلاتداریا کوردستانێ د ده‌ربارێ رۆژاڤایێ کوردستانێ دا ڤه‌کری و ئه‌شکه‌ره‌یه‌. ل هەمبه‌ر هه‌موو خه‌له‌تییێن سیاسه‌تا پەکەکێ، پەدەکە ل رۆژاڤایێ کوردستانێ خوه‌دی ده‌ردکه‌ڤه‌ و خه‌لکێ ده‌ڤه‌رێ ناهله‌ ته‌نێ.

ده‌ستهلاتداریا کوردستانێ ب ڤه‌کری ل دژێ بوویه‌رێن چه‌کدارێن ئۆپۆزسیۆنا سوریه‌ کو ترکیێ‌ پشگریا وان دکه‌، ره‌خنه‌ دکه‌ و ب توندی ل دژێ وان بوویه‌را ده‌ردکه‌ڤە.

د هه‌ڤدیتنا مه‌سرور بارزانی د گه‌ل وه‌زیرێ ده‌رڤه‌ چاوشۆگلو، بارزانی ب ڤه‌کری ل دژێ گوهه‌رتنا ده‌مۆگرافی کو ژ ئالیێ ترکیێ‌ ڤه‌ هه‌ولدان هه‌یه‌ کو بێ کرن ده‌رکه‌ت و ترکیێ‌ ژی د ڤێ ده‌ربارێ دا وه‌ک ته‌میناته‌ک دا کو دێ که‌سه‌ک ژ ده‌رێ داخوازیا خوه‌ ل ده‌ڤه‌رێن جودا نه‌یێن ب جی کرن.

بێ گومان گه‌له‌ک بابه‌ت هه‌نه‌ کو بێنه‌ گۆتوبێژ کرن، لێ ده‌ما مرۆڤ ل دیمه‌نێن هه‌ڤدیتنا دنێره‌ و ئالا کوردستانێ ل پشتا سه‌رۆکوه‌زیرێ کوردستانێ دبینه‌ ، ئه‌ڤ ب خوه‌ هه‌ر تشته‌کی زه‌لال دکه‌. ئه‌و سیاسه‌تا ئالا کوردستانێ ل هه‌موو ده‌ڤه‌را بلند بکه‌ و ئه‌و سیاسه‌تا د بن سها ئالا کوردستانێ دا‌ بێ کرن راسته‌ و ده‌ستکه‌فتیه‌ک ژ بۆ کورد و کوردستانێ یه‌.

گه‌ره‌ک هه‌موو کوردێن باکور جاردن ب دیتنا ئالا کوردستانێ ل ئه‌نقه‌ره‌یێ که‌یفخوه‌ش ببن و ڤێ یه‌کێ ژ بۆ خوه‌ وه‌ک ده‌ستکه‌فتنه‌ک سیاسی ببینن.

نها ل ترکیێ‌ گه‌له‌ک دۆز هه‌نه‌ کو، سه‌ده‌م بلندکرنا ئالا کوردستانێ یه‌. لێ ئیرۆ ئه‌و ئال ده‌ما ل ناڤا ناوه‌ندا ترکیێ‌ ل ئه‌نقه‌ره‌یێ ب ئاوه‌یه‌ک فه‌رمی بێ راکرن چ واته‌یا کو دۆزێن ژ بۆ بلندکرنا ئالا کوردستانێ ژی نامینه‌ و ئه‌و دۆز هه‌موو دپه‌لشن و تێکدچن.

ئه‌گه‌ر ئه‌ڤ سه‌ردانا سه‌رۆکوه‌زیرێ کوردستانێ و داخوویانیێن سه‌رۆکوه‌زیر د ڤێ سه‌ردانا خوه‌ دا دایین، ب ئاوایه‌ک واقعی بێ نرخاندن، دێ به‌رژه‌وه‌ندیێن کوردستانێ باش بێنه‌ دیتن. ئیرۆ بێهنا ده‌وله‌تبوونێ ژ کوردستانا باشوور دهێت کو ژ ئه‌نجاما ڤێ سیاسه‌تا راست وواقعی یە ‌.

سیاسه‌تا ب شیعارا تێ کرن چ ئه‌نجامه‌کی ناده‌. پۆپولیزم د سیاسه‌تێ دا‌ ئاگر گه‌ش دکه‌ ،لێ ئه‌و ئاگر د داویێ دا‌ خوه‌دیێ خوه‌ دشه‌وتینه‌.

٣٠/١١/٢٠١٩

دارا بیله‌ک

نێرین / شیرۆڤە