شاندەیا ئیمرالی، پشتی هه‌ڤدیتنا یه‌که‌م دگه‌ل ئۆجەلان، سه‌ردانا پرانیا پارتیێن سیاسی یێن د پەرله‌مه‌نتۆیێ ترکیێ دا کرن. هنده‌ک پارتیان وه‌ک، ئی پارتییێ داخوازا هه‌ڤدیتنا شاندەیا ئیمرالی قه‌بوول نه‌کر. لێ گه‌لۆ ژ بۆ چ شاندەیا ئیمرالی دگه‌ل هودا پارێ هه‌ڤدیتن نه‌کر کو، ئەو ژی د پەرلەمەنتۆیا ترکیێ دا یە؟ ئه‌ڤ پرسه‌که و هه‌تا به‌رسڤا ڤێ پرسێ نەیێ دایین گه‌له‌ک تشت نایێن تێگەهاندن.
ژ ئالیه‌ک دن ڤه شاندەیا ئیمرالی ژ پەرله‌مه‌نته‌رێن ده‌مێ سڕ سوره‌یا و په‌رڤین بولدان پێکتێ. لێ پشتی هه‌ڤدیتنا یه‌که‌م دگه‌ل ئۆجەلان ئەحمه‌ت تورک ژی ته‌ڤلی شاندەیێ بوو و د هه‌ڤدیتنێن ب ئالیێن سیاسی را ئاماده بوو. لێ گه‌لۆ ژ بۆ چ ئەحمه‌ت تورک ل گه‌ل هه‌یه‌تێ نه‌چوو ئیمرالی؟ ئه‌ڤ ژی پرسه‌که.
ئەحمه‌ت تورک، ل گۆرا پرانیا ئالیێن سیاسی یێن ترکیێ و هه‌تا یێن کوردان ژی، که‌سایه‌ته‌ک قەبوولکریە. تورک ل گۆرا ده‌وله‌تێ ژی قەبوولکریە. یا ئالیێن سیاسی یێن ترک ئه‌ڤ هه‌لوه‌ستا ل هەمبه‌ر تورک تێ فام کرن، لێ یا کوردا نایێ فام کرن. گه‌لۆ تورک ب چ پیڤانێ که‌سایه‌ته‌ک ماقوله؟ خوه‌زی ئه‌وێن وی ماقول دبینن بکاربوونا سه‌ده‌مێ ڤێ یه‌کێ ئاشکه‌ره بکران.
د ڕاستیا خوه دا تورک، ژ بۆ ده‌وله‌تێ د ناڤا پەکەکێ دا پشتی ده‌مه‌کی بوو وه‌ک گەرانتیەکێ. گوه نه‌دن وێ یەکێ کو ل شوونا وی دا قەیوم هاتیه تەعین کرن. ئه‌ڤ ژی له‌یزتکێن ئۆسمانیانه.
گه‌لۆ دەربارێ سه‌ردانا دویه‌م ژ بۆ چ چو داخوویان نه‌هاتن دایین کو به‌حسا ناڤه‌رۆکا هه‌ڤدیتنا دگه‌ل ئۆجەلان بکن. شاندەیا ئیمرالی ٤ ده‌مژمێران دگه‌ل ئۆجەلان هه‌ڤدیتن کر. ممکنه پشتی ئه‌رێکرنا ده‌زگه‌هێن ئستخباراتا ده‌وله‌تێ شاندەیا ئیمرالی ب داخوویانیه‌کی به‌حسا ناڤه‌رۆکا هه‌ڤدیتنا ب ئۆجەلان ڕه بکه. لێ یا هه‌ری گرینگ هه‌تا وه‌ک ڤێ گاڤێ قه‌ندیل ژ بۆ داخوازیێن ئۆجیلان نه ئاماده‌یه. نه‌خوه‌شیه‌ک مه‌زن ناڤبه‌را ئۆجەلان و قه‌ندیل دا هه‌یه. دا‌موده‌زگه‌هێن گرێدایی پەکەکێ نه رەحه‌تن و هه‌موو نه ل گه‌ل ڤێ پێڤاژۆیێنه.
ژ ئالیه‌ک دن ڤه، ڕوودانێن ل سووریێ و ل سه‌ر بەنداڤا تشرینێ ڕوو ددن د بنگه‌هێ خوه دا ڕه‌د کرنا بانگا موحته‌مه‌ل یا ئۆجەلان ه. تو ژ ئالیه‌کی ڤە هه‌ڤدیتنا قاشۆ ژ بۆ پێڤاژۆیه‌کا بێ ناڤ دکی و ژ ئالیه‌ک دن ڤە ژی شه‌ره‌ک بێ واته به‌رده‌وام دکی. سه‌ده‌مێ ڤێ نایێ گۆتوبێژ کرن.
قه‌ندیل ئه‌گه‌ر داخوازیا ئۆجەلان یانی بانگا کو ترکیێ دخوازه ب سه‌رێ خوه نکاره ببه خوه‌دی هه‌لوه‌ست. ئه‌ڤ یه‌ک پێوه‌ندیێن پەکەکێ یێن ئیران و ئیراقێ ڤه ژی گرێداییه.
هه‌تا ئیران بکاربه ناهێله قه‌ندیل ل گۆرا داخوازیا ئۆجەلان ببه خوه‌دی هه‌لوه‌ست.
مه‌دیایا پەکەکێ گێژ بوویه، هه‌ڤدیتنێن هه‌ری گرنگ دگه‌ل ئۆجەلان چێدبن، مالباتا ئۆجەلان وی دبینه، شاندەیا ده‌م پارتییێ سه‌ردانا ئیمرالی دکه قاشۆ ژ بۆ پێڤاژۆیه‌کی ب سه‌عه‌تان دجڤن و د ڤێ ده‌ربارێ دا داخوویانیان ددن. ل سه‌ر ناڤێ ئۆجەلان ل گه‌ل ئالیێن سیاسی هه‌ڤدیتنا دکن. لێ هێشتا مه‌دیایا پەکەکێ به‌حسا ته‌جریتێ دکه. باوه‌ر بکن ئه‌گه‌ر ته‌جریته‌ک ل سه‌ر ئۆجەلان هه‌به تەجریتا قه‌ندیل ه.
شه‌رێ ئیرۆ ل ده‌ردۆرا بەنداڤا تشرن دبه، نه ب ئیرادەیا ئۆجەلانه ،لێ ب ئاوایه‌کی پەکەکە ڤێ یه‌کێ ل سه‌ر هەسەد فه‌رز دکه و د ئنسیاتفا یەپەگێ دا شه‌ر تێکرن.
گه‌لۆ ئه‌ڤ ده‌ڤه‌را تشرین د ئه‌ردنگاریا کوردستانێ یه یان نا؟ گه‌لۆ ده‌ڤه‌را تشرین ئاخا کێ یه؟ پەکەکە ژ بۆ کێ ل ده‌ڤه‌را تشرن شه‌ر دکه و دبه سه‌ده‌ما کوشتنا جوانێن کورد؟
ل ڤێ ده‌رێ پرۆبله‌م نه سیاسه‌تا پەکەکێ یه، پرۆبله‌ما مه‌زن هێژا نەتێگەهشتنا ئالیێن کورد یا سیاسه‌تا پەکەکێ یه.
مخابن هه‌تا ئه‌ڤ هه‌لوه‌ستا دووڕوو یا ئالیێن کورد هه‌به، دێ پەکەکە ژی ڤێ سیاسه‌تا خوه ل سه‌ر حه‌سابێ تێکبرنا ده‌ستکه‌فتیێن کوردستانی به‌رده‌وام به و دێ یێن وه‌ک سڕ سوره‌یا یێ ترک و په‌رڤن بولدان یا عه‌ره‌ب نوونه‌رتیا کوردا بکن و ژ کوردان پتر دێ به‌رژه‌وه‌ندیێن ده‌وله‌تێ بپارێزن..
ئه‌گه‌ر سیاسه‌ت ئه‌ڤ به دێ حالێ مه کوردان ژی ئه‌ڤە به کو،هه‌تا کورد ب ئاوایه‌کی ب سیاسه‌تا پەکەکێ تێ بگەهن..ئه‌ڤ نه ڕه‌خنه‌یه‌که ته‌سبیته‌ک سیاسی یا ته‌ڤگه‌را کورد ده…تایبه‌تی ژی ل باکورێ کوردستانێ…
٢٠٢٥\١\٢٤
نێرین/شرۆڤه
