مالباتێن شه‌هیدان: ئازادکرنا داعیشیان خیانه‌ته‌

بریندار و مالباتێن شه‌هیدێن پێشمه‌رگه‌ ل سه‌ر ئازادکرنا 176 ته‌رۆریستێن داعیشێ ژ ئالیێ یەكێتیا نشتمانیا كوردستانێ (یەنەکە) ڤە دلگرانیا خوه‌ و نه‌رازیبوونا خوه‌ ده‌ردبرن و به‌حسا وێ یەكێ دكن كو‌ ئه‌ڤ كارێ یەنەكێ كری ‌ خیانه‌ته‌ ل خوینا شه‌هیدێن پێشمه‌رگه‌.

ده‌رباز عەبدولا پێشمه‌رگه‌یێ بریندارێ شه‌رێ دژی ته‌رۆریستێن داعیش ژ رۆژنامه‌یا وشه‌ را دبێژە كو ‌ یەنەکێ 51% ێ ژ وێ ئاخا کو ب خوینا مه‌ هاتبوو ئازادکرن فرۆت و تێر نه‌خوار و نھا چه‌کدارێن گرتیێن داعیش ژی ل به‌رانبه‌ر په‌ره‌ و ده‌ستخوه‌شیێ ئازاد کرن. یەنەکە ئه‌و تشتا کو پێشمه‌رگه‌ پێ نه‌خوه‌ش بە وێ دکه‌.

هه‌ر وها دبێژە: ئه‌وێن ئەڤ کارە کری، بازاری ب ئاخ و خوینا کوردان دکن و پێگه‌ها نشتمانی ل جه‌م کوردان لاواز دکن و خوین و که‌دا مه‌ پێشمه‌رگه‌یان ب ڤالا ددن. ئه‌و ره‌فتارێن یەنەكێ جهێ دلگرانیا مه‌ یه‌ و ئێش و ژانێن ب مه‌ زێدە دكە‌ و برینێن مه‌ کورتر دکه‌. ب چ مافه‌کی و چ ره‌وایه‌تیه‌ک تێدا هه‌یه‌ كو وان که‌سێن خوینا مه‌ رژاندی، نها ب ڤی ئاوایی راده‌ستی سه‌رۆکێن هۆزێن وان دکن و وه‌کی جه‌ژنانه‌ وان ئازاد دکن. ئه‌ز د وێ باوه‌ریێ دا مه‌، ئه‌گه‌ر چاره‌نڤیسا پارێزگه‌ها سلێمانی و هه‌له‌بچه‌ بکه‌ڤه‌ ده‌ستێ یەنەکێ دێ وه‌کی که‌رکووکێ بکن و داویا وێ خێر نابە. ژ به‌ر کو ئه‌وان هیچ تشته‌ک نه‌مایه‌ دژی گه‌لێ مه‌ ئه‌نجام نه‌دن.

مه‌نیجه‌ عەبدولکه‌ریم دایکا پێشمه‌رگه‌یه‌کێ شه‌هیدێ ده‌ستێ داعیشێ ژی دبێژه‌: مه‌ چ ده‌مه‌کی هێڤی نه‌دکر یەنەکە هه‌لوه‌سته‌کا‌ وها بکه‌ کو کوژه‌رێن کورێن مه‌ ب گولبارانێ بشینن ناڤا مالباتێن وان و ئه‌م ژی ب وان دیمه‌نان رۆندکان ببارینن. دڤیابا شه‌رم ژ مه‌ كربایە کو مه‌ جه‌رگێن خوه‌ ب ڤێ ئاخێ پاراست. لێ به‌لێ پاداشتا وان ئه‌ڤه‌ بوو کو کوژه‌رێن زارۆکێن مه‌ ئازاد بکن. ب بێ هیچ دادگه‌هی و سزایه‌ک، ژ بۆ وێ یه‌کێ نها ژ کورێ خوه‌ را‌ دبێژم خوینا ته‌ هاته‌ فرۆتن، ب په‌ره‌ و کورسی ژ ئالیێن یەنەکێ ڤه‌ هاته‌ فرۆتن

نێرین / شیرۆڤە