نچیرڤان بارزانی سه‌رۆکێ هه‌رێما کوردستانێ ب هەلکەفتا ۳٦ئه‌مین سالڤه‌گه‌را ئه‌نفالا بادینان سلاڤان ل گیانێ پاکێ ۱۸۲ هه‌زار قوربانیێن ئه‌نفالێ کو ژ گه‌رمیانێ هه‌تا گوندێ داوی یێ بادینانێ بوونه قوربانیێن تاوانێن ڕژێما هینگێ یا ئیراقێ دکە و بانگ ل حکومه‌تا ئیراقێ دکە کو د هه‌موو واران دا قه‌ره‌بووکرنا مالباتێن لێقەومیێن ئه‌نفالێ بکە.
سه‌رۆکێ هه‌رێما کوردستان هه‌رێما کوردستانێ دبێژە: مافێن وێ یێن ده‌ستووری به‌رهه‌ما گیانێ پاک، خوینا ب هه‌زاران شه‌هیدان، ڕۆندکێن ب هه‌زاران داییکێن جه‌گه‌رشه‌وتی، ئه‌نفال، کیمیاباران، تێکۆشین و قوربانیدانا گه‌لێ کوردستانێ یه، ژ به‌ر هندێ ئه‌رکێ مه هه‌مووانه کو ئه‌م وان ده‌ستکه‌فتیان بپارێزن. ته‌ڤی هه‌موو پرسگرێک و ناکۆکیان ژی دڤێ وه‌لات ببه ئارمانج مه
په‌یاما سه‌رۆک نێچیرڤان بارزانی ب بۆنه‌یا ئه‌نفالا بادینان
ئه‌م ئیرۆ ۳٦ئه‌مین سالڤه‌گه‌را خه‌مگین ئا ئه‌نفالا بادینان ب بیر تینن کو، ژ ۲٥ێ ته‌باخێ هه‌تا ٦ێ ئیلۆنا ۱۹۸۸ێ د قۆناخا داوی یا ئه‌نفالێ دا پێک هات و باندۆر ل خه‌لکێ سڤیل، ئاڤ، هه‌وا، ئاخ و خوه‌زایا ناڤچه‌یێ کر. سلاڤ ل گیانێ پاکێ ۱۸۲ هه‌زار قوربانیێن ئه‌نفالێ کو ژ گه‌رمیانێ هه‌تا گوندێ داوی یێ بادینانێ بوونه قوربانیێن تاوانێن ڕژێما هینگێ یا ئیراقێ.
دادگه‌ها بلند یا تاوانان یا ئیراقێ ئه‌نفال وه‌که جینۆساید، تاوانێن شه‌ر و تاوانێن ل دژی مرۆڤاهیێ ناسکریه، له‌وما ئه‌م بانگ ل حکومه‌تا ئیراقێ دکن کو د هه‌موو واران دا قه‌ره‌بووکرنا مالباتێن لێقەومیێن ئه‌نفالێ بده. ل هه‌رێما کوردستانێ ژی دڤێ ئه‌م باشتر خزمه‌تا مالباتێن وان بکن و ل سه‌ر ئاستا ناڤده‌وله‌تی هه‌ولێن خوه ژ بۆ ناسکرنا ئه‌نفالێ وه‌ک جیۆساید به‌رده‌وام بکن.
هه‌رێما کوردستانێ و مافێن وێ یێن ده‌ستووری به‌رهه‌ما گیانێ پاک، خوینا ب هه‌زاران شه‌هیدان، ڕۆندکێن ب هه‌زاران داییکێن جه‌گه‌رشه‌وتی، ئه‌نفال، کیمیاباران، تێکۆشین و قوربانیدانا گه‌لێ کوردستانێ یه، ژ به‌ر هندێ ئه‌رکێ مه هه‌مووانه کو ئه‌م وان ده‌ستکه‌فتیان بپارێزن. ته‌ڤی هه‌موو پرسگرێک و ناکۆکیان ژی دڤێ وه‌لات ببه ئارمانج مه و مه هه‌موویان ل هه‌ڤ بجڤینه.
ب ڤێ مناسه‌به‌تێ ئه‌م دووپات دکن کو دڤێ ل ئیراقێ ده‌رس ژ ڕابردو بێ وه‌رگرتن و مافێن هه‌موو پێکهاته‌یان بێ پاراستن دا کو ئه‌م هه‌موو ب هه‌ڤ ڕا کار بکن ژ بۆ مسۆگه‌رکرنا پاشه‌رۆژه‌کا باشتر ژ بۆ نفشێن مه یێن نها و پاشه‌رۆژێ.
سلاڤ ل گیانێ شه‌هیدێن ئه‌نفالێ و هه‌موو شه‌هیدێن کوردستانێ به. سپاس ژ بۆ خه‌لکێ قه‌هره‌مان یێ هه‌ولێر و ده‌ردۆرا وێ کو د ڕۆژێن دژوار دا ل جێژنیکان هاتن ئالیکاریا مه‌خدوورێن بادینان. میهره‌بانی و هه‌لوه‌ستا وان یا وه‌لاتپارێزی چو جاری نایێ ژبیرکرن.
نێچیرڤان بارزانی
سه‌رۆکێ هه‌رێما کوردستانێ
٢٠٢٤/٨/٢٥
