هۆتۆڤەلی: ئه‌م ب هه‌ڤکاریا کوردان سه‌ربلندن

جیگرا وه‌زیرێ ده‌رڤه‌ یێ ئسرائیلێ تزپی هۆتۆڤه‌لی د جڤینا پارلامه‌نتۆیا ئیسرائیلێ دا ئاشکه‌ره‌ کر کو دیالۆگا وان دگه‌ل ئه‌مریکایێ به‌رده‌وام دکه‌ و ئه‌و دگه‌ل مافێن کوردانن.
تزپ هۆتۆڤه‌لی هه‌روها ئاشکه‌ره‌ کر کو ئه‌و دگه‌ل کوردان هه‌ڤپه‌یمانن و ژ ئێریشێن ترکیێ بۆ سه‌ر ڕۆژاڤایێ کوردستانێ ژی نیگه‌رانن.
د به‌رده‌وامیا ئاخافتنا خوه‌ دا تزپ هۆتۆڤه‌لی دا زانین کو ئه‌و ئاماده‌ نه‌ ئالیکاریێ بۆ ڕۆژاڤایێ کوردستانێ ژی بشینن و وها گۆت: ”ترکێن زالم ڤێ جارێ ژی ل کوردستانا سوریێ ب قرکرنا کوردان ڕابوون! ئه‌م دێ ڤێ ئێریشبازیا ترکان ب چ ئاوایی قه‌بوول نه‌کن. ژ ده‌ستپێکا ئێریشێن وان ڤه‌ و هه‌تا نها وه‌ک ده‌وله‌تا ئسرائیلێ، چ ژ ده‌ستێ مه‌ هاتیه‌ مه‌ د ناڤ دنیایێ دا کریه‌. ئه‌م دێ هه‌تا کو کورد نه‌بن خوه‌دی ده‌وله‌ت، هه‌ر و هه‌ر ڤێ ئالیکاریێ ب کوردان ڕا بکن. ئه‌م ب هه‌ڤکاریا کوردان خوه‌ سه‌ربلند دبینن.”

سه‌رۆکوه‌زیرێ ئیسرائیلێ، بنیامین نه‌تانیاهو ژی ئێرشا ترکیێ ل سه‌ر ڕۆژاڤایێ کوردستانێ ب حشکی شه‌رمه‌زار کربوو ڕاگهاندبوو، ئیسرائیل ب دژواری ئێرشا ترکیێ ل سه‌ر ده‌ڤه‌رێن کوردان ل سوریێ شه‌رمه‌زار دکه‌ و ترکیێ و گروبێن ئالیگرێن وێ وه‌لاتی ل سه‌ر قرکرنا ئه‌تنیکی ل دژی کوردان هشیار دکه‌.

نه‌تانیاهو دایه‌ خویاکرن کو ئیسرائیل ئاماده‌ یه‌ ئالیکاریێن مرۆڤی بگهینه‌ گه‌لێ کورد ل سوریێ.

نێرین / شیرۆڤە