چێکرۆ ب خوه‌ کرۆ خرابکرۆ ب خوه‌ کرۆ

ده‌ستکه‌فتیێن باشوورێ کوردستانێ و ھەروەسا نێزیکبوون و هه‌ڤکاریا هێز و پارتیێن رۆژاڤایێ کوردستانێ، بوونه‌ دڕی و که‌له‌م  د چاڤێن نه‌یارێن کورد و کوردستانێ را دچن. تێکبرنا ده‌ستکه‌فتیێن باشوور و رۆژاڤایێ کوردستانێ نه‌ ته‌نێ ژ داگیرکه‌ران را، هه‌روه‌ها ژ پارتیێن تاشه‌رۆن و خێرنه‌خوازێن کوردستانێ را‌ ژی بوونه‌ سه‌رێشاندن و ئه‌ڤ پارتیێن خێرنه‌خواز ژ بۆ تێکبرن و نەھێلانا ڤان ده‌ستکه‌فتییان، ئیرۆ د رێزا داگیرکه‌ران دا‌ جھ دگرن و ب ناڤتێدان و پشتگرییا وان ئێریشێن دژمنانه‌ دبن سه‌ر ده‌ستکه‌فتیێن باشوور و رۆژاڤا.

پشتی لهه‌ڤهاتنا هه‌ولێر و به‌غدایێ یا ل سه‌ر ئارامیا شنگالێ، ئێریش و دژمناتیا پارتیا كاركەرێن كوردستانێ (پەکەکە) و چاپه‌مه‌نیا وێ یا ل هه‌مبه‌ر پارتیا دەمۆكراتا كوردستانێ (پەدەکە) و بارزانیان زێده‌تر بوو. یا بالکێشتر، چاپه‌مه‌نیا ده‌وله‌تا ترک و چه‌پێن ترک ژی ب هه‌مان ئێریشان دژمناتیا پێشمه‌رگه‌یێن کوردستانێ، پەدەکێ و بارزانیان دکن. ئانگۆ، چاپه‌مه‌نیا پەکەکێ، ده‌وله‌تێ و چه‌پێن ترک ژ هه‌مان کۆزکێ شه‌رێ پێشمه‌رگه‌، پەدەکێ و بارزانییان دکن و د ئه‌نجامێ دا‌ پەکەکە ئێریشی پێشمه‌رگه‌ کر و خوینا پێشمه‌رگه‌ رژاند. هه‌لبه‌ت د ڤان پرۆڤاکاسیۆن و ئێریشان دا دڤێ رۆلا ئیرانێ ژی نەھێتە ژبیرکرن.

 مه‌ به‌رێ ژی گۆتبوو، هه‌وجه‌ ناکه‌ ئه‌م ب دووڤدرێژی به‌حسا پەکەکێ و کریارێن وێ بکن. پەکەکە ژ رۆژا رۆژ دا‌ ژ بۆ یه‌ک ئارمانجێ ده‌رکه‌ت هۆلێ. ئه‌و ژی ئاسته‌نگکرن و تێکبرنا ده‌ستکه‌فتیێن ته‌ڤگه‌را رزگاریخوازا ملەتێ کورده‌. و سه‌ده‌ما کو پەکەکە ل هه‌ر چار به‌شێن کوردستانێ ب جھ بوویه‌ و دژمناتییا نه‌ته‌و-ده‌وله‌تبوونا مله‌تێ کورد دکه‌ ژی ئه‌وە‌. پەکەکە د خه‌تا خوه‌ دا‌ زه‌لاله‌ و باش دزانه‌ كا چ دخوازه‌ و چ ناخوازه‌. باش دزانه‌ ئارمانجا وێ چیه‌ و نه‌ چیه‌. ئه‌ساس یا گرنگ و ئالۆز ئه‌ڤه‌ کا پەدەکە و بارزانی چ دخوازن و زێده‌یی 40 سالانه‌ چما ئه‌وقاسی گرنگی دانه‌ پەکەکێ و ئالیکارییا وێ کرنه‌. پەدەکە یا کو پەکەکە ل باشوور ب جھ کر، پاره‌ و چه‌ک دانێ و هه‌تا ب راده‌یه‌کێ شریکێ گونه‌هێن پەکەکێ یه‌، دێ چاوا ژ ڤێ به‌لا کو وێ ب ده‌ستێ خوه‌ ئانیه‌ سه‌رێ خوه‌ رزگار ببه‌، نه‌ دیاره‌. لێ تشته‌ک ئا‌شکه‌ره‌ و زه‌لاله‌، هه‌تا پەکەکە ل باشوور به‌ دێ پەدەکە و بارزانی نکاربن ب ره‌حه‌تی رازێن و راکه‌ڤن. هه‌تا پەکەکە ل باشوور به‌ دێ نکاربن خوه‌ ژ شه‌رێ ناڤخوه‌یی رزگار بکن. سیاسه‌تا گه‌رمک و نه‌رمک و مته‌وازعیبوونا پەدەکێ و بارزانییان پەکەکە خورتتر و وێره‌کتر دکه‌. پەکەکە ب زۆرا چه‌کان  ‌ ل سه‌ر سه‌رێ مله‌تێ کورد هاتیه‌ فه‌رزکرن و دڤێ نەھێتە ژبیرکرن کو نه‌ ب زۆرێ به‌ ژی ده‌ست ژ کریار و ئێریشێن خوه‌ به‌رناده‌. هه‌لبه‌ت ئه‌م نه‌ ئالیگرێ شه‌رێ ناڤخوه‌یی و براکوژییێ نه‌. لێ مخابن راستیا ته‌حل ئه‌ڤه‌.   

ئه‌نجامێن هلبژارتنێن ئەمریکایێ ئیرۆ-سبێ وێ ئاشکه‌ره‌ ببن. تام د ڤێ ده‌ما کو چاڤێ کوردان و دنیایێ ل سه‌ر هلبژارتنێن ئەمریکایێ یه‌، پەکەکە ئێریشی کارمه‌ندێن گومرکێ و پێشمه‌رگه‌یان دکه‌، وان دکوژه‌ و بۆرییا په‌ترۆلا کوردستانێ دته‌قینه‌. ئه‌ڤ پرۆڤۆکاسیۆن و کوژتن ته‌ڤ ژ بۆ ده‌ستپێکرنا شه‌ره‌کی ناڤخوه‌یی تێن کرن و بێ گومان ترسا سه‌رکه‌فتنا جۆ بایدن ژی د ڤان پرۆڤاکاسیۆن و ئێریشان دا‌ هه‌یه‌. جوبایدن وه‌ک دۆستێ کوردان تێ ناسکرن و هه‌که‌ وه‌ک سه‌رۆکێ ئەمریکایێ بێ هلبژارتن، ترسا پەکەکێ و ده‌وله‌تێن ل پشتا وێ ئه‌ڤه‌ کو جۆ باید‌ن زێده‌تر پشتگریا کوردان بکه‌ و رێ ژ سه‌رخوه‌بوونا کوردستانێ را ڤه‌که‌. ژ به‌ر ڤێ یه‌کێ، ب پرۆڤاکاسیۆن  دخوازن د ڤێ ده‌م و پێڤاژۆیا حه‌ساس و زیز دا‌ پەدەکێ و بارزانیان بكێشن  ناڤ شه‌ره‌کی ناڤخوه‌یی و ئارامیا باشوورێ کوردستانێ تێک ببن، دا کو شه‌رت و مه‌رجێن کوردستانه‌ک سه‌ربخوه‌ بێن لپاشخستن یان ژی ژ هۆلێ بێن راکرن.

ملەتێ کورد و ب تایبه‌ت ژی پەدەکە و بارزانیان ژ ده‌ستێ شه‌رێ ناڤخوه‌یی و براکوژیێ پر کشاندنه‌، پر ئێشیانه‌. ئه‌ڤ بێ گومانه‌. لێ جارنا حه‌سابێ سووکێ و مالێ ل هه‌ڤ ده‌رناکه‌ڤه‌ و به‌لا تێ بەر ده‌رییێ مرۆڤی. ل ڤێرە دو رێ ل به‌ر پەکەکێ و پەدەکێ و بارزانییان هه‌نه:‌

یه‌ک: یان دڤێ پەکەکە رێزێ ژ حکوومه‌تا کوردستانێ و بریارێن وێ را بگره‌ و د بن سیوانا بریارێن حکوومه‌تێ دا‌ ته‌ڤ بگه‌ره‌، خوه‌ ژ پرۆڤۆکاسیۆن و ئێریشان دوور بگره‌. یان ژی دڤێ ته‌رکا باشوورێ کوردستانێ بکه‌ و ژ وێرێ ده‌رکه‌ڤه‌ (کو ئه‌ڤ ژی خه‌یاله‌).

دو: یان دڤێ پەدەکە و بارزانی قیما خوه‌ ب ره‌وشا نها و ئێریشێن پەکەکێ بینن و وه‌ک هه‌ر جارێ بێده‌نگ بمینن، یان ژی دڤێ ده‌ست ژ سیاسه‌تا نه‌رمک به‌ردن و ده‌ستکه‌فتیێن باشوورێ کوردستانێ قوربانی پەکەکێ و سیاسه‌تا وێ نه‌کن. هه‌گه‌ر پەدەکە و بارزانی نه‌خوازن باشوور ژی وه‌ک باکور کاڤل و وێران ببه‌، دڤێ کومێ خوه‌ ده‌ینن به‌ر خوه‌ و چاره‌یه‌ک بنگه‌هین ژ ڤیرووسا “كۆرۆنایێ”  را‌ ببینن.

نوری چه‌لیک

2020.11.07

نێرین / شیرۆڤە