شاندەیا ھەدەپێ ب دزی چو قەندیل

شانده‌یەکا هەدەپێ ب سه‌رۆکاتیا مه‌رال دانش به‌شتاش سه‌رۆکا فراکسیۆنا ھەدەپێ د پەرله‌مه‌نتۆیا ترکیێ‌ و مەحمود تۆگرول دا‌ سه‌ردانا باژارێ سلێمانیێ ل باشوورێ كوردستانێ  کر.

شاندەیا ھەدەپێ د گه‌ل ته‌ڤگه‌را گۆران و یەنەکێ هه‌ڤدیتن پێکانین. سه‌رۆکا شاندەیا ھەدەپێ داخوویاکرن کو ئه‌و ژ بۆ هلبژارتنێن ئیراقێ پشتگریا هه‌ڤپه‌یمانیا یەنەکێ و گۆران دکن و ژ بۆ یه‌کێتیا کوردا ئەو ل سلێمانیێ نه‌.

ڕایا گشتی باش دزانه‌ کو، سه‌ردانێن ھەدەپێ یێن باشوورێ کوردستانێ چو جارا نه‌  ب تنێ ژ بۆ هنده‌ک هه‌ڤدیتنێن ئالیێن سیاسی یێن باشوورێ کوردستانێ یه‌. هه‌روه‌ها پشتی ڕاگەهاندنا ده‌کلاراسیۆنا/بەیانامەیا ھەدەپێ ل ترکیێ‌ سه‌ردانا ڤێ شاندەیێ بۆ باشوورێ كوردستانێ بالکێشه‌. ژ به‌ر کو پرانی شاندەیێن ھەدەپێ ده‌ما سه‌ردانا باشوورێ کوردستانێ دکن ڕۆلێ قاسدیێ دله‌یزن.

ژ ئالیه‌ک دن ڤه‌، د ڤێ ده‌ما کو رێ و ئاوایێن چاره‌سه‌ریا پرسا کورد ل ترکیێ تێ گۆتوبێژ کرن ب ئاوایەكی گەلەك ڤەكری دیار دبە كو د ناڤا هنده‌ک بەرپرسێن  ھەدەپێ دا‌ دیتنێن جودا هه‌نه‌.ھندی ئەڤدلا  ئۆجەلانە ھەر ژ ڕۆژا ئه‌ول ڤه‌  وی گۆتیه‌ کو ئه‌ڤ پرس، پرسا كوردی، د پەرله‌مه‌نتۆیا ترکیێ‌ دا‌ تێ چاره‌سه‌ر کرن. نها ده‌مرتاش جودا داخوویانیا دده‌ و ب ئیسرار دبێژه‌ “ئه‌م پارتیه‌کا ترکیێ‌نه‌ و وه‌ک هه‌موو پرسگرێکا ئه‌م چاره‌سه‌رکرنا پرسا کورد ژی د پەرله‌مه‌نتۆیێ دا‌ دبینن و موخاتەب ژی هەدەپه‌ یه‌. لێ ئالیێن دن و پرانی دبێژن کو خوه‌دیێ بریارێ ئیمرالی یه‌. ده‌مرتاش  د هه‌ر دەلیڤەیێ دا‌ په‌سنێ ئۆجەلان دده‌، لێ ئیمرالی موخاتەب نابینه‌. ئه‌ڤ ژ هه‌لوه‌ستا وی یا ل دژی ئاکەپێ ده‌ردکه‌ڤه‌ پێش.

گه‌له‌ک ئاشکه‌ره‌یه‌ کو قه‌ندیل گوھ ناده‌تە ئیمرالی، د ئه‌سلێ خوه‌ دا ده‌مرتاش پتر نێزنگی قه‌ندیل دیتنێن خوە ڕادگەهینه‌. هه‌روه‌ها دیار دبە کو ده‌مرتاش دخوازه‌ ب پشتگریا قه‌ندیل ڕۆلێ ئۆجەلان بله‌یزه‌. ئه‌ڤ پرسگرێکا د ناڤا ھەدەپێ ده‌ یه‌. لێ هه‌تا  ڤێ گاڤێ ژی جهێ بریارێ قه‌ندیله‌. ژ ڤێ ژی دوار دبە كو ئەگەرێ بنگه‌هین یێ سه‌ردانا شاندەیا ھەدەپێ بۆ باشوورێ کوردستانێ هه‌ڤدیتنێن د گه‌ل قه‌ندیلن داكو ل سەر پرسگرێک و بوویەرێ قەومین ھەلوەستا قەندیل بزانن.

ل ترکیێ‌، هه‌تا گاڤا داویێ  ئه‌ردۆگان دکاره‌ ب کا‌رتا ئیمرالی بلەیزە‌. ئۆپۆزسۆنا  ترکیێ ڤێ هه‌لوه‌ستا ئه‌ردۆگان دزانه‌ و دخوازه‌ ژ نها ڤه‌ ھەدەپێ بده‌ پێش و ڕۆلێ ئیمرالی کێم بکه‌. ژ به‌ر کو دەما هلبژارتنێن شاره‌داریان دا‌  ھەدەپێ گوھ نەدا ئیمرالی و  پشتگریا ئۆپۆزسیۆنێ كر، ئۆپۆزسیۆن ژی وێ ھەلوەستا ھەدەپێ وه‌ک کێمبوونا ڕۆلێ ئۆجەلان دنرخینه‌.

هه‌ر جار سه‌ردانێن شاندەیێن ھەدەپێ بۆ باشوورێ کوردستانێ ھەم  د مه‌دیایا پەکەکێ دا و ھەم ژی د مه‌دیایا ترکیێ‌ دا گه‌له‌ک دهاتن نرخاندن. لێ ڤێ جارێ هه‌ردو ئالی ژی بێده‌نگبوون. دێ د ڕۆژێن پێشیا مه‌ دا‌ سه‌ده‌مێ سه‌ردانا شاندەیا ھەدەپێ پتر بێ زانین. به‌رێ خوه‌ بدەنێ د چه‌ند ڕۆژێن ل پێشییا مه‌ دا‌ دێ د داخوویانیێن بەرپرسێن ھەدەپێ دا‌ ئەگەرێ بنگه‌هین یێ سه‌ردانا سلێمانیێ دیار بن.

2021.09.30

نێرین/شرۆڤه‌

نێرین / شیرۆڤە