کارسازێ کورد یێ ب ناڤێ ئه‌مین ئۆسمانێ کو ل سوێدێ دژی، ده‌ست ب چێکرنا ڤه‌خوارنه‌که ئه‌نه‌رژیێ یا ب ناڤێ “کوردیش ئه‌نه‌رگی درینک” کر.
کوردیش ئه‌نه‌رگی درینک ب ئالایا کوردستانێ هاتیه خه‌ملاندن و نها ل ۱۰ وه‌لاتێن ئه‌ورۆپایێ تێ فرۆتن.
خوه‌دیێ شرکه‌تا کوردیش ئه‌نه‌رگی درینک، ئه‌مین ئۆسمان، ژ ڕووداوێ را بەحسا چیرۆکا پرۆژه‌یا خوه کر.
فکر چاوا چێبوو؟
ئه‌مین ئۆسمان دیار کر کو فکرا پرۆژه‌یێ به‌ری ۲ سال و نیڤان چێبوویه و وی و دو هه‌ڤالێن خوه یێن ژ ڕۆژاڤایێ کوردستانێ (قامشلۆ و حەسەكە) ده‌ست پێ کریه.
خوه‌دیێ شرکه‌تا کوردیش ئه‌نه‌رگی درینک، ئه‌مین ئۆسمان، ژ ڕووداوێ را گۆت:
“دو شرکه‌تێن مه هه‌نه، یه‌ک ژ بۆ ناڤخوه‌یا سکاندیناڤیایێ و یه‌ک ژی ژ بۆ ده‌رڤه یه.
یا ده‌رڤه ب ناڤێ کوردستان ئه‌نه‌رگی درینکێ یه و کوردیش ئه‌نه‌رگی درینک ئا ناڤخوه‌یی یا سکاندیناڤیایێ یه.”
ئه‌مین ئۆسمان دا زانین کو ده‌ستپێکێ وان خوه‌ستیه ناڤێ “کوردستان” ب کار بینن لێ ژ به‌ر کو ل فرانسایێ ئه‌و ناڤ هاتبوویه وه‌رگرتن وان نکاریه.
ئۆسمان دیار کر کو پشترا وان خوه‌ستیه ناڤێ “کورد” ب کار بینن لێ ئه‌و ژی ل ترکیه‌یێ هاتبوویه وه‌رگرتن.
ئه‌مین ئۆسمان هه‌ر وها گۆت:
“مه ناڤێ ‘کوردیش هلبژارت و مه ئالایا کوردستانێ دانی سه‌ر لێ ژ به‌ر ڤێ یه‌کێ، ب تایبه‌تی ژ ئالیێ ترکیه‌یێ ڤه گه‌له‌ک زه‌حمه‌تی ژ مه را هاتن ده‌رخستن.
مه ب ڕێیا پارێزه‌ره‌کی خوه یێ قبرسی کاری ئه‌م وی ناڤی وه‌رگرن.”
“ئه‌م دخوازن ل باشوور و ڕۆژاڤایێ کوردستانێ ژی به‌لاڤ ببه”
کوردیش ئه‌نه‌رگی درینک ل یونانستان و پۆلۆنیایێ د ۲ کارگه‌هان ده تێ چێکرن و نها ل نێزیکی ۱۰ وه‌لاتێن ئه‌ورۆپایێ یێن وه‌کی ئالمانیا، دانیمارکا، نۆروه‌ج، فینله‌ندا، سویسره، به‌لچیکا و هۆله‌ندایێ تێ فرۆتن.
ئه‌مین ئۆسمان دا زانین کو ئارمانجا وان ئه‌وه کو کوردیش ئه‌نه‌رگی درینک ل ته‌ڤاهیا ئه‌ورۆپایێ به‌لاڤ بکن و گۆت:
“پێوه‌ندیێن مه ب باشوورێ کوردستانێ، ڕۆژاڤا و ئامه‌ریکایێ ژی هه‌نه.
ئه‌م دخوازن ل ور ژی ده‌ست پێ بکن.
ئه‌م دخوازن ل باشوور و ڕۆژاڤایێ کوردستانێ ژی به‌لاڤ ببه.”
“کوردیش كۆلا ژی دێ هه‌به”
ئۆسمان ئه‌شکه‌ره کر کو ئه‌و پلان دکن کو د پاشه‌رۆژێ ده به‌رهه‌مێن دن ئێن وه‌کی “کوردیش كۆلا” و ڤه‌خوارنێن بێشه‌که‌ر ژی هلبه‌رینن.
ئۆسمان ل سه‌ر به‌رته‌کان ژی ئانی زمان کو ژ بلی چه‌ند شرۆڤه‌یێن نه‌یینی یێن ل سه‌ر تۆرێن جڤاکی، وان پشتگریه‌که گه‌له‌کی مه‌زن ژ کوردێن ل سه‌رانسه‌ری جیهانێ ستاندیه و ئانی زمان:
“ژ زێده‌تری ۱۰ وه‌لاتان ته‌له‌فۆن ژ مه ڕه هاتن و وان پشتگری دا مه.
ئه‌ڤ یه‌ک ژ بۆ مه هێزه‌که مه‌زنه.”
“ئه‌ڤ قوتی نایێن ئاڤێتن”
خوه‌دیێ شرکه‌تا کوردیش ئه‌نه‌رگی درینک دا زانین کو ژ به‌ر دیزاینا ئالایا کوردستانێ یا ل سه‌ر ڤه‌خوارنێ ئه‌و ل ڕاستی ڕه‌خنه‌یان هاتیه و گۆت:
“ئه‌ڤ قوتی ژ به‌ر کو په‌ره‌یان دکن نایێن ئاڤێتن.
قوتی تێن ڕێساینکرن و زه‌ره‌رێ نادن خوه‌زایێ ژی.
ئه‌م دخوازن ئالایا خوه و ده‌نگێ خوه بگهینن جیهانێ.”
