عیبادەت و نڤێژا ل دووڤ مەلایێن ترك

نه‌یارێن کورد و کوردستانێ، دیسا ده‌ست ب فه‌ن و فێلبازیێن دیرۆکی دکن. دخوازن د ناڤ مڵه‌تێ کورد دا، دوبه‌ندی و ئیخانه‌تێن مه‌زن پێک بینن. گاڤا کو مڵه‌تێ کورد پرسگرێکێن د ناڤ خوه‌ دا چاره‌سه‌ر دکن، نه‌یارێن کوردان ژی ده‌ست ب فێل و فێلبازیێ دکن، پرسگرێک و دوبه‌ندیتیێ د ناڤ کوردان دا ده‌ردخن، ب له‌ز و به‌ز خرابیێ ل کوردان دکن.

ژ بۆ ڤێ یه‌کێ ژی ل ئالیەکی بێخیره‌ت، ل ئالیەکی دن ژی ده‌وله‌تێن داگیرکه‌ر، پارتی و رێڤه‌به‌رێن وان، رۆژ ب رۆژ وه‌ک گورێن هار ل کۆمکوژییێن د دیرۆکێ دا هاتنه‌ کرن، تینن بیرا کوردان و دبێژن، “ئه‌م مسلمانن و ژ ئۆمه‌تا محه‌مه‌دن.”

ب ده‌ره‌و و سه‌خته‌کاریێ دیسا ده‌ست دئاڤێژن ئۆل و براتیا گه‌لان. هه‌موو گۆتنێن وا ده‌ره‌ون، ژ رۆژا ئه‌ول هه‌تا ئیرۆ، نه‌ دگەل کوردان بوون دۆست نه‌ ژی ب هه‌لوه‌ستا ئۆل و ب براتیێ ته‌ڤگه‌رییان.

ب نه‌یارتی و ب کین و ب گه‌ماریێن خوه‌ یێن قرێژ، گه‌ف ل کوردان خوه‌رن و ئیرۆ ژی دخوەن.

مخابن چوار ده‌وله‌تێن داگیرکه‌ر، ب ئێریشێن له‌شکه‌ری و سیاسی ل کوردستانا ئازاد و ل سه‌ر رۆژاڤایێ کوردستانێ دکن، داکو ده‌ستکه‌فتنێن کوردان ژ هۆلێ راکن.

ل دژبه‌ری ڤان پیلانێن داگیرکه‌ران، دڤێ کورد زێده‌ ل سه‌ر یه‌کێتی و یه‌کده‌نگیێ راوەستن و خوه‌ ب هێز بکن.

مخابن، کورد هێشتا ژی ب پەژراندنا  ئیدیۆلۆژیێن شاش و ئه‌ندامه‌تییا پارتیان، نه‌یارتییا هه‌ڤدو دکن. بێده‌وله‌تی و به‌له‌نگازییا خوه‌ ژبیر کرنه‌، که‌تنه‌ شۆپا پارتی و ئیدیۆلۆژییێن داگیرکه‌ران و شه‌رێ هه‌ڤدو دکن.

کورد ژ بۆ دۆزا براتیێ و هه‌ڤالبه‌ندییا مله‌تێن داگیرکه‌ر کار و خه‌باتێ دکن. ل باکورێ کوردستانێ رۆژانه‌ د مزگه‌فتێن ترکان دا ل دووڤ مه‌لا‌یێن ترک نڤێژێ دکن. د رۆژێن ئینێ دا خوتبه‌یا کو تێ دا په‌سنێ داگیرکه‌ران ددن، گوهداری دکن. مه‌لا‌یێن ترک د خوتبه‌یێن خوه‌ دا، کوردان شه‌رمه‌زار دکن. ئه‌و کوردێ ژ بۆ دین و ئیمانێ دچن مزگه‌فتێن ترکان ژ بۆ خوه‌ ژی ژ بۆ باڤ و کالێن خوه‌ چو سه‌وابه‌ک ناکن. ته‌نێ ئه‌خاره‌تێ دبهیزن و ژ گۆتنێن وان را ب دل و جان ئان ژی بێحه‌مدی ئامین دبێژن.

لێبه‌لێ، ژ بۆ کوردێن ئۆلپه‌ره‌ست ژی رێ و رێبازێن دن هه‌نه‌. ئه‌و دکارن د مالێن خوه‌ دا نمێژ بکن، ئان ژی د مزگه‌فتان دا ئیترازێن خوه‌ بینن زمان.

د ده‌ما داگیرکرنا عه‌فرینێ دا، د هه‌موو مزگه‌فتێن ترکان دا ئایه‌تێن ژ بۆ فه‌تحێ دهات خوه‌ندن.

مه‌له‌یێن ترک د گۆتارێن  خوه‌ دا گۆتن، مال و ملکێ گه‌لێ رۆژاڤا وه‌ک غەنیمه‌ته‌ و ژ بۆ ده‌ست بدن سه‌ر، فه‌توا ددان. نشته‌جیهێن عه‌فرینێ ژی 100% کوردێن مسلمان بوون.

ژ وی رۆژێ هه‌تا ئیرۆ، کوردێن مسلمان هێ ژی ل دووڤ مه‌لایێن ترک و د مزگه‌فتێن وان دا عیباده‌ت و نمێژێ دکن.

کوردێن مسلمان ژ بۆ فلستینییان ب ده‌ھ هه‌زاران دادکه‌ڤن کۆلانان، لێ ژ بۆ برایێ خوه‌ یێن کورد تلیا خوه‌ بلند نه‌کرن.

لۆما دبێژن بنده‌ستی کۆله‌تی یه‌. ده‌ما مرۆڤ کۆله‌تیێ قه‌بوول بکه‌، وێ ده‌مێ دبه‌ بێخیره‌ت ژی.

ئه‌و بوویه‌رێن ل باکورێ کوردستانێ دقه‌ومن، ئه‌و ژی وه‌ک ب روحێ کۆله‌تیێ ڤە گرێدایینه‌.

ژ بۆ زمان  ژی خرابە، کوردێن باکورێ کوردستانێ ئه‌و عیباده‌تێ ل په‌ی ترکان بۆ زمانێ خوه‌ ژی بێده‌نگن. ژ بۆ زمانێ خوه‌ قه‌رسن و ب ترکی ب ژن و زارۆکێن خوه‌ را قسه‌ دکن.

ئیرۆ ل ترکیێ ژ بۆ زمانێ کوردی و ژ بۆ ده‌رسێن بژارته‌ ماف هه‌یه‌. کێمترین بیست میلیۆن کورد ل باکورێ کوردستانێ دژین. هه‌تا ئیرۆ ژ بۆ ده‌رسا بژارته‌ ژی چو تشته‌ک نه‌کرنە. لێ ژ بۆ براتیا ئۆلی و براتیا گه‌لان ب هه‌زاران ده‌ردکه‌ڤن کۆلانان. گه‌لۆ جما ژ بۆ زمانێ خوه‌ گاڤ ناڤێژن. ئه‌و مافێ کو ژ بۆ ده‌رسا بژارته‌ هاتییه‌ دایین، دڤێ کورد لێ خوه‌دی ده‌رکه‌ڤن و وه‌ک دەرفەتەك ب کار بینن. ئه‌ڤ یه‌ک نه‌ به‌س به‌ ژی ژ بۆ بکارئانینا زمان گاڤه‌ک بالکێشه‌. ئه‌و ماف ب سالانه‌ هه‌یه‌، ئه‌وێن ڤێ دەرفەتێ  بکارناینن خه‌تا دکن. ژ بۆ پێشکه‌تنا زمان، چ ژ ده‌ست تێ دڤێ بھێتە‌ کرن.

ژ به‌ر کو، هه‌بوونا زمان هه‌بوونا مله‌تێ کورده‌. ده‌ما زمان وندا ببه‌ دین و ئیمان ژ نامینه‌. ل دژی بێخیره‌تی و کۆله‌تیێ یه‌کسه‌ر زمانێ کوردی ئه‌ڤزه‌له‌. ژ بۆ هێزبوونا روحێ نه‌ته‌وه‌یی، ژ بۆ عیباده‌تێ ژی زانیبوونا زمانێ کوردی ل سه‌ر هه‌موو کوردان فه‌رزه‌.

سیراچ ئۆگوز

2020.01.10

نێرین / شیرۆڤە